SKUTKI 11:1-20

¹Paľis šunde o apoštola the o phrala andre Judsko, hoj the o manuša, save nane Židi, priile le Devleskero lav.

²Sar avľa o Peter upre andro Jeruzalem, dovakerenas leske o pačabnaskere Židi

³a phende: “Geľal andro khera ke ola, save nane občhinde (obrezimen) a chahas lenca!”

⁴O Peter lenge chudľa sa te vakerel avri:

⁵“Somas andro foros Joppa, modľinavas man a dikhľom viďeňje. Avelas pre mande andral o ňebos vareso sar bari lepeda, so avelas tele le štare agorenca a doavľa dži paš ma.

⁶Mištes man andre zadikhľom a dikhľom štarpindrengere džviri, dzive džviri, olen, save pes cirden pal e phuv, the le čiriklen.

⁷A šunďom o hangos, savo mange phenďa: ‘Ušťi Peter, murdar a cha!’

⁸Me phenďom: ‘Na Rajeja! Mek šoha (ňikda) na geľa andre miro muj vareso melalo abo nažužo!’

⁹O hangos andral o ňebos mange pale phenďa: ‘Ma phen melalo pre oda, so o Del žužarďa!’

¹⁰Ada sa pes ačhiľa trival a paľis sas savoro pale ilo upre andro ňebos.

¹¹Takoj paloda doavle trin murša, saven bičhade ke ma andral e Cezarea, paš o kher, kaj bešavas.

¹²O Duchos mange phenďa, hoj te džav lenca a te na odcirdav man lendar. Avle manca the kala šov phrala a geľam andro kher ke oda murš.

¹³Vakerelas amenge, hoj dikhľa andre peskero kher le aňjelos, savo ačhiľa angle leste a phenďa leske: ‘Bičhav andre Joppa vajkeci muršen a vičin le Šimon, saves vičinen Peter.

¹⁴Ov tuke vakerela o lava, savenca aveha zachraňimen tu the calo tiro kher.’

¹⁵Androda, sar chudľom te vakerel, avľa pre lende o Sentno Duchos, avke sar angloda pre amende.

¹⁶A avľa mange pre goďi oda lav le Rajeskero, sar phenďa: ‘O Jan bolelas le paňeha, ale tumen avena bolde le Sentne Duchoha.’

¹⁷Te len o Del diňa ajso daros sar the amen, save pačanďiľam andro Raj Ježiš Kristus, akor ko som me, hoj man te ačhavav le Devleske?”

¹⁸Sar oda šunde, preačhile te vakerel. Lašarenas le Devles a phende: “The le manušenge, save nane Židi, diňa o Del, hoj pes te visaren ke leste a te el len o dživipen.”

¹⁹Andre ola pharipena, so avle akor, sar murdarde le Štefan, pes rozdenašle ola, save pačanas le Rajeske. Gele dži andre Fenicija, Ciprus the Antiochija. Vakerenas o evaňjelium ča le Židenge a ňikaske avreske.

²⁰Ale varesave lendar sas the andral o Ciprus the Cirenija a sar avle andre Antiochija, vakerenas the le Grekenge avri pal o Ježiš Kristus.