Text copied!
CopyCompare
Sunbin-Got em Kitakamin Weng - Sion - Sion 9

Sion 9:9-37

Help us?
Click on verse(s) to share them!
9Angbiwi, mali kawtiw i bokolomeliw: “Fein! E kunum bakate te!”, angbiliw kate, mali i bokolomeliw: “Babo! E akatetew kunum mak ete te!”, ange ange kesiliw kale. Kebiliwi, akalem ete bokolomele: “Babo! Nakalem bo!”, yangse kale.
10Yangei, i bokolewomeliw: “Nono kelew ete, kom kiin be ken kembelew a?”, dangsiliw kale.
11Dangiwi, e yan weng bokoyemomele: “‘Yesus’, dangakabiliw kunum be tawal fokoluko, kasuk tuw kelewsomi, nem kiin dim dukunemeko, namdako, bokonemomele: ‘Ku kuamin ok Siloam elo uneko, kukalem kiinguen gingem unolewka!’, nange kembe te. Nem uneko, kiinguen ging kembi ding dim bakate, kiin sukul kenemse be kiin golnemei, mesesem kiin so atebabi te.”, yangse kale.
12Yangei, i dakalalomeliw: “Kunum be nal kel be ya?”, dangiwi, e yan weng bokoyemomele: “Nakal akokow so. Nal kel be yake?”, yangse kale.
13Yangei, i kunum beelo Falisi kunum im fukun debele unsiliw kale.
14Yesus e kanelewse eisneng be Suda kawtiw im finengdakamin ding Sabat ding kel kelewse kale.
15Keko beli, Falisi kunum i kiin golse kunum beelo em dim kanese beem mongom e dakalasiliw kale. Dakalamiwi, e yan weng bokoyemomele: “Kunum be nem kiin dim tawal dukunemei, ne kiinguen gingen unii, kiin e golse te.”, yangse kale.
16Yangei, mali Falisi kunum i bokolomeliw: “Sunbin-Got e Yesus elo dabalalinba kese te. Nimtew angom? E finengdakamin ding Sabat ding akate aluwkabe kasike!”, angsiliw kale. Angsiliw kate, mali Falisi kunum i bokolomeliw: “Kunum sili sili nam kukuw so kele tewe, e ki keko, kunum beemdiw auk so kitil so eisneng mak nam kele tew te!”, ange ange kesiliw kale. Ange ange keko, im ibolow fukunin e amen amen kuw dolo dolo kesiliw kale.
17Keko kasike, i kiin golse kunum elo iti dakalalomeliw: “Ku kunum beem dulum elote nimtew ibolow fukunew a? Kunum kiin kilelse kunum be nimin kunum ete ya?”, dangiwi, e yan weng bokoyemomele: “E Sunbin-Got em bontem dim bakamin kunum ete te!”, yangse kale.
18Yangei, Suda kawtiw im kak yetebiliw kunum i kiin golse kunum beelo atemsiliw kate, “Dil akate, e kiin sukul kunum kele kembe sako?”, yangeko, “Fein!”, danginba kesiliw kasike, i kunum bem auk so alew so gaaneko,
19ilo dakalalomeliw: “Kunum kale yukalem bakayembiliw: ‘Auk dukusu ding akate, e kiin sukulse te!’, yangakabiliw kunum ete sako? Kunum bakate tewe, nono keko, kiin goleko, atebabe ya?”, yangsiliw kale.
20Yangiwi, i yan weng bokoyemomeliw: “Feinka! E nukalem kiin sukul so aul dukusuluw min ete te.
21Kate, kante em kiin gol kolewse yake? E nono kelete, kiin golse yake? Alik alik be nukati akokow so te. Akalem ete tanbel kese kasike, yu elo dakalalina!”, yangsiliw kale.
22Beem ding dim bakate, kak yetebiliw kunum i weng kitil weng mak bokolomeliw: “Nimin kawtiw ite mak bokolomeliw: ‘Yesus e Mesaya te!’, angiw tewe, nu ilo nukalem wensankabuluw am dim ka em dulum elo yenbakalaluwi, i iti kawtem elo nam teliw te.”, angsiliw kasike, kiin golse kunum beem auk so alew so bi Suda kawtiw im kak yetebiliw kunum biim angan finganeko, kilele fitew kaim dim weng bokoyeminba keko, weng okiw dasiliw kale.
23Beem mongom ete auk so alew so bi yan weng bokoyemomeliw: “Akalem ete dakalalina! Tanbelse kasike.”, yangsiliw kale.
24Kaneko beli, Falisi kunum bi kiin golse kunum be iti gaalewiwi, e telei, i bokolewomeliw: “Sunbin-Got em kiin dim e weng fawtuk weng ayem mak bokoko, kilele bokoyema! Nu kilele kal keluwete: Kunum be ibolow sili sili nam kunum ete kasike.”, dangsiliw kale.
25Dangiwi, e yan weng bokoyemomele: “Kunum be ibolow sili sili nam kunum yake, mani ba yake? Nakati akokow so te. Kate, nakalem ete kilele kal kelite: Sua kel akate, ne kiin sukul so kebisi kate kame, kiin golnemei, atebabi kunum nete te.”, yangse kale.
26Yangei, i dakalalomeliw: “Kasike, e nono kekemse ye? E nono deiw ete kom kiin sukul be kilekemse ya?”, dangiwi,
27e yan weng bokoyemomele: “Sua kel akate, ne kilele bokoyemsi kate, yu nimtew angom ete wosulinba keko, itit dakala dakala kebiliw a? Nimtew angom ete yu nem yangi weng be iti kililomin ibolow kelewbiliw a? Yukati akalem gelewkabiliw kunum kelomin ibolow kebiliw sako?”, yangeko, dakalase kale.
28Dakalalei, i elo weng milewsomi, bokolewomeliw: “Kukalem ete kaleem gelewkabelew kunum ka! Kate, alik alik numi e Moses em gelewkabuluw kunum nute te.
29Ku kilele kilila! Nu kilele kal keluwete: Sunbin-Got e fein Moses eso bokolewse kate, kunum beem dulum elote ‘Nal ete talse yake?’, angeko, atin kuw akokow kebuluw te.”, dangsiliw kale.
30Dangiwi, e bokoyemomele: “Yakai, kunum min yutaka! Ibo! E nem kiin sukul golnemse kate, yu ‘Nal ete talese yake!’, angeko, akokow kebiliw sako?
31Feinka! Sunbin-Got e ibolow sili sili nam kawtiw im geenin fian be wosulinba kekabe kate, nimin kunum waneng ite mak em wiin daoko, em ibolow fukunin be gelewbiw tewe, e kunum waneng biim geenin fian be fein wosulewkabe te.
32Kawin dim kaleem talfut kese ding dim elote, kameem ding bakate, auk dukusu ding dim kabalak e, kiin sukul so kese kunum mak em kiin golse sang gel mak beemdiw nu kililinba kekabuluw te.
33Sunbin-Got e kunum kale dabalalinba kese tewe, e ki keko, kanelewse eisneng mak kanelinba kese tew te. Feinka! Sunbin-Got e kunum be kaleelo dabalase te.”, yangse kale.
34Yangei, i yan weng bokolewomeliw: “Ai kutaka! Kauk dukusu dak akate, sili sili nam e kulo atin kuw kasi kokembelei, kuso kait be kate kame, ku nulo kukuyembelew a? Babo!”, dangeko, elo ikalem wensankabiliw am dim kalo anbakalaliwi, e ki keko, iti kawtem elo nam une te.
35Kaneko beli, Yesus e kililete: “Falisi kunum i kiin golse kunum beelo ikalem wensankabiliw am dim ka em dulum elo anbakalaliwi, e ki keko, iti kawtem elo nam une te!”, dangiwi, e kilise kale. Em kilise ding dim bakate, e kunum beelo fenem unse kale. Fenem uneko, elo atemse ding dim bakate, e bokolewomele: “Ku Kawtiw Aul nelo ‘Fein!’, nangbelew a?”, dangei,
36kunum be yan weng bokolewomele: “Kamok Fian kutaka! Kawtiw Aul be kante a? Kunum be nelo kukunemew tewe, ne elo ibolow ‘Fein!’, dangoki te!”, dangse kale.
37Dangei, e yan weng bokolewomele: “Kaso ateme ateme keko, weng bakabuluw kunum nete bikale te!”, dangse kale.

Read Sion 9Sion 9
Compare Sion 9:9-37Sion 9:9-37