Sion 9:3-14

³Iesu vit kesi vit, “Rovitei ven tisaen keil onen, vuo tisaen keil onen tata ka mama onen koa mumon meten meatin enek var navong avasi. Kei vi metovar mukok keke Ahi kilea vatie lat keihoen onen vaka en moulien onen.

⁴Navong meneai mul veah ritin, reheles rehoumon umen onen Ahi koa sila inau. Veni vongien mul mai, ka, en avong enek, meatin sakras emun voum.

⁵Ka navong namul veah en out netan, inau navi meneai teni.”

⁶Navong viten selusien enek evus, Iesu mutiv en atan ka mumoni vi tanmelmel. Evus, sahula tanmelmel enek en meten keilu onen metovar.

⁷Evus, Iesu viteni mini vit, “Kiha kikas veinam en Meterumrum Saelom.” (Isen Saelom, aneite teni vi ‘sila.’) Sakini, metovar enek va ka kas veinan. Navong kasi evus, kilea valele ka va ris teim sen.

⁸Navong onen keil ka koakeil akilea mul viram en meatin keil ven mani alesi, amutimanin avit, “?Mukave? ?Vi anatin keke koanik vi metovar koa, lisenges, melesi mul rondan ka viram en meatin keil ven mani?”

⁹Keil koa avit, “Anatin, kei keinek.” Ka keil koa mun avit, “Vuo, vi meatin sav koa melesi suvali.” Ka kei varei viteni vit, “!Vi inau varei!”

¹⁰Ka amules avisi avit, “?Asa kur out koa sakinuk kokilea kovalele vamukok?”

¹¹Kei vit kesi vit, “Meatin tai, isen Iesu, mumon tanmelmel ka sahula en metok keilu. Evus, viteni minau keke niha en Meterumrum Saelom ka nikas veinak. Navong namumoni, hatte tas, nakilea malele.”

¹²Meatin keil avisi avit, “?Ka meatin enek mul kave?” Ka meatin enek vit kesi vit, “Nareingeingeni.”

¹³Onen keil amulamun meatin koa mulamu vi metovar va min Farasi keil.

¹⁴Navong Farasi keil ales meatin enek, avisi keke meten maluv mukave keke lele mukok. Sakini, meatin enek viteni min keil vit, “Iesu ling tanmelmel en metok keilu. Ka navong nakas veinak, nakilea malele suk.” Ka Farasi keil avotini keke Iesu mumon tanmelmel ka mum revi meten metovar enek en Sabat.