Sion 9:16-23

¹⁶Navong Farasi keil along tunien onen meatin koa mulamu vi metovar, keil koa avit, “Iesu sakras vaka ven Ahi, veni kei rolong kattei mengkatien ten Sabat.” Ka keil koa mun avit, “?Munak vi anatin keke rokatei ven Ahi, mukave suk kei kilea voumon merikel keil ekek?” Mukonek, Farasi keil akur rendemien elu usili.

¹⁷Sakini, Farasi keil avis meatin enek hatte tai ris avit, “Vi keik koa meatin enek mum revi metom keilu keke kokilea kovalele. ?Komundem sa usil meatin enek? ?Vi isei varei?” Meatin enek vit kesi vit, “Inau nakur anatin keke kei vi provet tai.”

¹⁸Navong hetetamen keil onen Siu keil umai ales meatin enek, arkurtei anatin eni keke, mulamu, kei vi metovar tai. Ka akilea suk vi anatin navong avise tata ka mama onen lumai ka avis revi keilu eni.

¹⁹Avis keilu avit, “?Vi anatin keke meatin ekek vi titamil? Ka kamil milvit vi metovar navong avasi. ?Mukonek, mukave suk kei kilea valele kosa?”

²⁰Keilu luvit kesi luvit, “Komal melkilea keke vi titamal. Ka melkilea emun keke meten var navong avasi emai.

²¹Ka melreingeingeni suk mukave kei kilea valele kosa, vuo isei varei sak revi meten keilu. Ka kami mikilea mivahisi, veni kei matu vinvin vaselus en usite onen kei sasen.”

²²Tata ka mama onen meatin enek luviteni mukok veni lumetaun hetetamen keil onen Siu keil. Lulonge keke hetetamen keil avit leini tuai keke meatin vasi keil koa avit lati keke Iesu vi Mesaea, iso lat keil ran eim tahihiseien keil onen Siu keil.

²³Sakini, keilu luviteni min hetetamen keil keke titaealu matu vinvin vaselus en usite onen.