5Meatin tai ro ekonek koa mesai sua hanu sav tai ka teindan outel emun (38).
6Navong Iesu les meatin enek mul matil ekonek, mundem kilea matil mukok avong taveah ramat. Sakini, mai veni ka visi vit, “?Em vati avem vamai ris vatahos?”
7Ka meatin koa mesai vit kesi mini “Asuv, meatin tovuol kilea vakataunau maha en meterumrum ten oai enek navong oai mukur. Veni navong nasak visi maha keke makul ien, meatin sav va mulamu enau ka mukul ien.”
8Ka Iesu viteni mini vit, “!Mea! Lum lat vulum ka kual kiha ris teim.”
9Hatte tas, meatin enek, aven mai ris tahos. Sakini, lum lat vulin koa matil ien ka mual va ris teim sen. Koanek kur out en Sabat.
10Navong meatin enek koa Iesu sak revi mul mual va, hetetamen keil onen Siu keil alesi ka avul kati avit, “!Ei, Sabat kosa! Mengkatien keil orer viteni keke romaltei kovahous vulum koa komatil ien kosa.”
11Ka meatin enek vit kesi vit, “Meatin koa sak revi avek viteni minau keke malum lat vuluk ka moual maha ris teim.”
12Keil avisi avit, “?Isei varei viteni minuk kovoumon koanik?”
13Ka meatin enek reingeingeni keke isei mumoni. Veni navong lekat Iesu en vangi meatin keil, lesi keke vuol tuai.
14Rovitei tuetin, Iesu va en teahu ten Eim Votut. Ka navong mual ien, votin meatin enek ka viteni mini vit, “?Kolesi? Kotahos tuai. Ka kilei kati keke konoumontei mun tisaen. Hemukonek, vahesa etai tounah koa hetisa mok hesut keik.”
15Evus, meatin enek eva, lekat hetetamen keil onen Siu keil, ka viteni min keil keke meatin koa sak revi aven, isen Iesu.
16Navong hetetamen keil ekek alei kilea isei varei sak revi meatin enek en Sabat, uva keke avasak purun Iesu.
17Ka navong aselus tisa ven asa koa mumoni, Iesu vit kesi vit, “Tata onak en out nesa mum lisenges, ka inau namul naleisungein sakien onen.”
18Selusien koanik sakin hetetamen keil avuroh kati mok ka aling rendemien one keke avouasi vamat. Veni, en rendemien one, Iesu rali koteh mengkatien ten Sabat. Ka, koa tisa mok, kei mul vati lat kei mai vinvin en Ahi, veni mul viteni keke Ahi vi Tata kati onen.
19Navong Iesu lei kilea keke hetetamen keil onen Siu keil avuroh kati veni viteni vit Ahi vi Tata kati onen, viteni min keil vit, “Anatin eli naviteni min kami, inau navi Natin Ahi. Ka narmumon etai tounah vousil rendemien onak sasok. Ka asas koa nales Tata onak mul mumoni, kei varei inau, Natnali, namul naleisungeini.
20Tata onak, envatien onen mul enau, ka mul rie lati minau marmari tounah keil koa kei mul mumoni. Ka hetie lati minau tounah keil koa hemarite mok keke inau numoni koa helin tounah koa miles inau namumoni tuai, ka hesakin kami mihetimanin eni.
21Ka en sakien koa Tata onak kilea vasakin meatin tai vamea ran matien ka vasan moulien mini, inau mun koa navi Natnali nakilea masan moulien min koakeil ek vati masani min keil.
22En usite sav, Tata onak kei rolei rahittei usite onen meatin keil, ka ling umen enek en hek keke malei rahit usite onen meatin vasi keil.
23Tata onak mumoni mukonek vasakin meatin vasi keil avahouhou minau koa navi Natnali en vati sakien koa amul avouhou mini. Ka koakeil arvouhoutei minau koa navi Natnali, arie lati keke arvouhoutei min Tata onak koa san inau namita.
24Anatin eli naviteni min kami, koakeil vasi along selusien keil onak ka akur anatin keke Ahi san inau numai, keil varei ikur moulien ten lisenges. Koakeil enek, Ahi herlei rahittei mun usite one keke vasan mahien min keil. Koakeil enek amaluv tuai ran keihoen ten matien, ka akur moulien koa sakras vavus.
25“Anatin eli naviteni min kami, avong mul emai keke koakeil umat ilong ren Natin Ahi ka imoul eris ran matien. Anatin, avong koanek mai tuai.
26Tata kur keihoen keke vasan moulien. Ka en vati sakien enek, kei maen keihoen minau, Natnali, keke nakilea masan moulien min meatin keil.
27Ka, veni navi Natin Meatin, Tata onak san keihoen minau keke malei rahit usite onen meatin keil ka nisan mahien housili.
28Minatimanintei en selusien keil onak. Veni avong mul emai keke koakeil umat tuai ilong rek.
29Ka navong ilonge, keil imemea ran tehitan keil one. Koakeil amum mal en moulien one, keil imea ran matien ka ikur moulien koa sakras vavus. Ka koakeil amum romaltei, keil imea ran matien ka iha ikur mahien koa sakras vavus.”
30Ka Iesu selus eris vit, “Inau, narmumon etai tounah vousil rendemien onak sasok. Navong nalei rahit usite tai, rendemien onak musil asa koa Ahi viteni minau. Anatin, asa koa naviteni mal veni narsantei vousil rendemien onak, ka namul nasan asas koa Ahi Tata koa sila inau numai en vati.
31Munak vi inau sasok koa namul naselus en usite onak, mal keke minakurtei anatin eni.
32Ka veni Tata onak mul san selusien usil inau, mal keke mihekur anatin enau, veni nakilea keke selusien onen usil inau vi anatin.
33Ka navong kami misila meatin keil onami uva avales Sion Baptis, asa koa kei viteni usil inau vi anatin.
34Ka en usite onak, narlingtei desien onak en asa koa meatin keil ten out netan enges amul aviteni usil inau. Ka navit usil selusien koa Sion viteni usil inau keke kami mikilea mivakur anatin eni ka Ahi houtut moulien onami heka ien.
35Veni Sion suval laet tai koa mukan ka ritin. Ka, ten avong havivi enges, kami misi kami keke mivato en meneai ten hihiseien onen.
36“Ka tounah tai mul selus keih imok en usite onak mulin asa koa Sion viteni. Umen keil koa Tata sani minau moumoni, keil amul aselus en usite onak avit navi Natnali anatin. Anatin, umen keil onak amul arie lati keke Tata varei san inau numai. Ka num vasin tounah koa lingi en hek keke moumoni.
37Ka Tata koa san inau numai, kei mun selus en usite onak. Ka kami mirlongtei veah ren vuo mirlestei veinan.
38Mirie lati keke selusien onen tovuol en moulien onami, veni mirkurtei anatin enau koa kei sani.
39“Kami mimul milehkao keke milekat anatinien en selusien ten Tus Votut veni mimundemi mivahotin moulien ten lisenges vaka ien. Ka vati selusien keil enek amul aselus usil inau.
40Ka avaseini, kami miseseini mivamai venau keke mivakur moulien ten lisenges vaka venau.
41“Rovitei tounah minau munak meatin keil asan masmasien minau vuo arsantei.
42Veni nakilea kami, ka nakilea keke envatien en Ahi tovuol en tinomi.
43Avaseini numai en isen Tata onak, kami mirkur revitei inau. Ka munak meatin sav tai hemai en isen sasen enges, kami mihekur revi kei.
44Kami mimumon tounah keke mivasakin kami mivasan masmasien min kami eris. Ka mirmumontei tounah keke mivakur masmasien vaka ven Ahi varei. Sakini narmutimanintei keke mirkurtei anatin enau.
45“Ka minandemtei keke hehi inau koa nisan selusien tai heha kat usite onami navong mihelomal en meten Tata onak. Vuo, hehi Mosis varei koa mimul miling desien onami mul ien koa heselus heha kat usite onami.
Sion 5
Sion 5:5-45