Sinik Abem 10:6-22

⁶Aka alam win asek Saimon iniman kal gulámin kinim aso tein be. Kale ami am be yak kaoko Sol wok mewso kal ko.” Akeisa.

⁷Kale ensel Koniliyas weng bakadaba ayo unane, Koniliyas alam wok fakudawin kinim alew so un tabudin kinim mak Koniliyas alaso bom Got suksukin kinim so iyo gán dáyama tadiwe,

⁸aka ensel weng bakodawa uyo bakoyam nadanade kinim bidi imadála Saimon Bita finang Yowba abiw uniw ko.

⁹Kale kinim ika leiw tad bi iw sidiwo tad bi tad abiw dukum mewso tadaniwe, Bita akal atan tad gubidim bikida tam am konal kal Got weng bakanlawon kale tam una ko.

¹⁰Kale aka tam Got weng bakanla bomo imin tew dukum kuw keidawa, ufek ufek mak wanono kal bom kei bada kinim madik ita imin kidel bom fu bidiw kei bom kanabiw kawákal aka wisin utama ko.

¹¹Kale aka wisin tem katam fenomo abid tikin kaí bikiduno, kalomo ilim kal dukum mak kinang kinang alalew taw uyo kinim fakudin taw keidiw falak falak madák abu ka.

¹²Kale aka ilim kal taw tem buwok bo utamomane, sák adikum teng yán alalew kámin iniman uyo fako kaok unbu ade iniman atud so bakan dim faimkun so atim so el kámin awon so uyo kaok unbu ka. Kalane,

¹³beta kaw tam kal weng mak Bita bakodaw, “Bita, kan todal nadawe bo abom wananalo!” Akane,

¹⁴Bita ayo weng atung fakadu bakodaw, “Kamokim atin bá be, naka ufek ufek takoyo kalesu uyo atin wanomi bá.” Kalane,

¹⁵beta weng uyo alo bakodaw, “Got ufek ufek kidel ku bula wanin kuwo kalesa uyo kaba bako bula takoyo kalin bá.” Ak badane,

¹⁶weng uyo sawil bakodaw bakodaw bi bid alewbino fakadá bakodaw nadane alo ilim kál dukum uyo wabising aluk asiki abid tikin unane,

¹⁷beta Bita aka wisin utama bo aket diking dakung bom um mit fena, alo Koniliyas am kinim imadála tasiw. Ikil Saimon am fen tad bi tad nadiwe ika abiw tum dám fakosiw awsom kal tod bom nadiwe

¹⁸ika kinim madik gánya bom, “Saimon am win mak Bita, be am tein benako?” Kalaniwe,

¹⁹Bita aka ulum kanom wisin utama bo aket fukan bom keimalano, Sinik Abem ayo bakodaw, “Saimon, kinim alewbino ika kam fen kábiw.

²⁰Kale kan tod dák bakano abin abe mew kinim iso unalo! Kaba aket kakan kakanin bá, watawo kaleyo bá, kinim bidi nata imadáli tadbiw ko.” Akane,

²¹Bita aka madák nadanade kinim bakoyam, “naka kibilim fen kábiw kaí, kalakabi ka. Kiba watawo kale tadiw?” Yakane,

²²kinim ika weng atung fakadu bakodaw, “nuka Koniliyas ami weng tudow dim taduw. Kale aka un tabudin kinim 1000 kal imi kin modin kinim. Aka kukuw kidel fakudin kinim ade Got win kufádawin kinim ade aka Yu kayak ika am win kufádawábiw. Kale ensel abem ata bakodaw, tad kamadew yak alam am dádano kam weng mak bakodaw kidilono kale imadála taduw.” Akiwade,