Sarxalkat yi 18:7-28

⁷Bul torxal sa baay, di dëkkoo sa yaay. Sa yaay la, kon bu ko torxal moom it.

⁸«Bul dëkkoo sa soxnas baay, di torxal sa baay.

⁹«Bul dëkkoo sab jigéen, te muy koo bokkal benn baay mbaa koo bokkal jenn ndey, muy ku juddoo ci kër gi mbaa feneen.

¹⁰«Bul dëkkoo sab sët bu jigéen bu sa doom ju góor jur mbaa sa doom ju jigéen, ndax kon torxal nga sa bopp.

¹¹«Bul dëkkoo ku sa soxnas baay am ak sa baay, ndax sab jigéen la.

¹²«Bul dëkkoo sa bàjjan, ndax daa jegewook sa baay lool cig bokk.

¹³«Bul dëkkoo sa ndey ju ndaw, ndax daa jegewook sa yaay lool cig bokk.

¹⁴«Bul torxal sa baay bu ndaw di dëkkoo soxnaam. Sa ndey la.

¹⁵«Bul dëkkoo sa soxnas doom. Sa soxnas doom la. Bu ko dëkkoo mukk.

¹⁶«Bul dëkkoo soxnas koo bokkal benn baay mbaa jenn ndey, nde kon nga torxal sa doomu baay mbaa sa doomu ndey.

¹⁷«Bul boole dëkkoo jigéen, dëkkoo doom ja mbaa sëtam bu doomam ju góor jur mbaa doomam ju jigéen jur ko, ndax dañoo jegewoo lool cig bokk. Loolu ñaawtéef la.

¹⁸«Bul jël jigéen di séq ak moom séy, muy wujjeek doomu ndeyam mbaa doomu baayam joo jëkka jël, li feek kookoo ngi dund.

¹⁹«Bul dëkkoo jigéen ju gis baax, ndax daa sobewu.

²⁰«Bul ànd ak jabaru jaambur, di sobeel sa bopp.

²¹«Bul jébbal kenn ci say doom tuur mi ñuy wax Moleg, ndax waruloo teddadil sa turu Yàlla. Man maay Aji Sax ji.

²²«Bu góor tëdde góor, ni bu doon jigéen. Lu ñaawa ñaaw la.

²³«Bu góor tëdde menn mala, di sobeel boppam, te bu jigéen jox boppam mala, di ànd ak moom. Loolu yàqute la.

²⁴«Buleen sobeel seen bopp ci mboolem defin yooyu, ndax xeet yi ma leen dàqal, noonu lañu daan jëfe, ba sobeel seen bopp.

²⁵Réew ma sax mujj na daj ak sobe, ma wàcce mbugal ca kaw réew ma, ba mu gëq ay nitam.

²⁶«Yeen nag sàmmleen samay dogal ak samay santaane te bu kenn def lenn ci yooyu ñaawtéef, du njuddu-ji-réew, du doxandéem bi ci seen biir,

²⁷ndax kat mboolem ñaawtéef yooyu la waa réew ma leen fa jiitu daan def, ba réew ma mujj daj ak sobe.

²⁸Su ngeen sobeelee réew ma, dinaa leen gëq, na ma gëqe woon xeet ya leen fa jiitu woon.