SANG'HANO 8:6-37

⁶Dale da wanhu vidimuhulike Filipo na vija viwonile mizonza iyatendile, wagategeleza goya gaja gayatendile.

⁷Na vinyamkela wakalile wawavagale wanhu bwando wawalawa kuno woguta nyangi ng'hani, na wanhu bwando wakalile waholole na walemale wahonyigwa.

⁸Avo kukala na ndeng'ha ng'hulu mdiwambo dija.

⁹Kukala na munhu imwe yakemigwe Simoni yakalile yotenda uhawi mdiwambo hijo, na kuwazanya wanhu wa isi ya Samalia, na kuitenda kamba heyo iyo munhu mkulu.

¹⁰Wanhu wose, wadodo na wakulu, wamtegeleza goya walonga, “Munhu ino iyo mhiko ya Mulungu ikemigwa, ‘Mhiko Ng'hulu.’ ”

¹¹Na hewo wamtegeleza goya, kwavija mkipigiti kitali kakala yowazanya ng'hani.

¹²Ila viwamtogole Filipo viyakalile youpeta Usenga Unogile wa Undewa wa Mulungu na twaga da Yesu Kilisto, wose wabatizigwa, wambigalo na watwanzi.

¹³Na Simoni mwenyego katogola, kabatizigwa, na kakala yokiilongoza na Filipo. Abaho, kakanganya mizonza na mbuli za mkanganyo zikalile zotendeka.

¹⁴Na watumigwa wa Kilisto wakalile Yelusalemu, viwahulike kamba wanhu wa Samalia wautogola Usenga wa Mulungu, wawatuma Petulo na Yohana.

¹⁵Viwavikile, wawatambikila ha Mulungu giladi wabokele Loho wa Mulungu.

¹⁶Kwavija Loho wa Mulungu kakala hanamuhumulukila munhu yoyose mdidale jao, ila wakala wabatizigwe mditwaga da Mndewa Yesu diyeka.

¹⁷Abaho, Petulo na Yohana wawekila makono gao, na hewo wabokela Loho wa Mulungu.

¹⁸Simoni viyawene kamba wanhu wabokela Loho wa Mulungu mkwikilwa makono na watumigwa wa Kilisto, avo, kageza kuwagwelela hela Petulo na Yohana yolonga,

¹⁹“Nigweleleni na nie udaho uno, giladi munhu yoyose yondanimwikile makono gangu, yabokele Loho wa Mulungu.”

²⁰Ila Petulo kamwidika, “Udanganhike gweye hamoja na hela zako, kwagiza nhunza ya Mulungu yoguligwa na hela!

²¹Kwabule hanhu hohose muisang'hano ino, kwavija moyo wako haumnogeze Mulungu.

²²Avo, ukileke kilozo kino na umtambikile Mndewa, pengi kokugela kumgongo mkukala na ngelegeza kamba ino mmoyo wako.

²³Kwavija nokona kumema migongo na kwa mkifungo cha mbuli zihile.”

²⁴Simoni kedika, kalonga, “Nitambikileni ha Mndewa, giladi mbuli zose zimulongile sambizinivike.”

²⁵Petulo na Yohana viwamambukize kulonga gaja gawonile na kuwapetela wanhu Usenga Unogile, wabwela Yelusalemu, na kuupeta Usenga Unogile muna iviwambo bwando va Samalia.

²⁶Msenga wa Mndewa wa kuulanga kamulongela Filipo, “Isasale, uchole ng'ambu ya kusi kubitila nzila ya kiwala, ihumuluka kulawa Yelusalemu mbaka Gaza.”

²⁷Avo, Filipo kaisasala kuchola, na viyakalile mnzila, kaiting'hana na kibohola wa Etiopia, yakalile mkulu wa ngama yose ya Kandake, Malikia wa Etiopia. Munhu ino kakala yacholile Yelusalemu kutambika.

²⁸Viyakalile yakalile mdikwama yobwela ukae, kakala yosoma kitabu cha muhokozi Isaya.

²⁹Loho wa Mulungu kamulongela Filipo, “Dikwenhukile kwama dija uilongoze najo.”

³⁰Abaho, Filipo kadikimbilila dikwama, na kamuhulika munhu yosoma kitabu chandikigwe na muhokozi Isaya. Filipo kamuuza, “Vino kogatanga ago guusoma?”

³¹Na heyo kedika, “Nodahaze kuvitanga, bila munhu kunilongoza?” Avo kamgoneka Filipo yakwele uchana yakale hamoja na heyo.

³²Na hanhu hayakalile yosoma handikigwa vino, “Kalongozigwa kamba ng'hondolo yochola kuchinjigwa, na kamba vija mwana ng'hondolo yanyamale haulongozi wa imunhu yomkanha mijusu, na heyo halongile mbuli yoyose.

³³Kageligwa kinyala na kakala bule munhu wa kumgombela. Yalihi yodaha kulusima lukolo lwake, kwavija ugima wake usegezigwa muisi.”

³⁴Mkulu ija kamuuza Filipo, “Nilongele, muhokozi ino kolonga mbuli za munhu yalihi? Kolonga mbuli zake mwenyego ama za munhu iyagwe?”

³⁵Abaho, Filipo kasongela Mzinyandiko zizija Zing'alile, kumpetela Usenga Unogile wa Yesu.

³⁶Viwakalile mnzila wochola, wavika hanhu hakalile na mazi, na ija imkulu kalonga, “Hano hana mazi, avo kinhu chaki kinigomesa ndeke kubatizigwa?”

³⁷Filipo kamulongela, “Kamba kotogola mmoyo wako wose, kodaha kubatizigwa.” Na heyo kedika, kalonga, “Ona, notogola kamba Yesu iyo Mwana wa Mulungu.”