Text copied!
CopyCompare
Lagano da Isambi da Mndewa na Mkombola Wetu Yesu Kilisto - SANG'HANO - SANG'HANO 2

SANG'HANO 2:6-43

Help us?
Click on verse(s) to share them!
6Viwahulike mbuli zino, dale kulu da wanhu diiting'hana. Wose wakanganya, kwavija kila munhu kawahulika wolonga muulonzi wake mwenyego.
7Wakanganya ng'hani na kulonga, “Wanhu wose wano wolonga si wanhu wa Galilaya?
8Avo, vilihi tweye kila munhu mmwanza wetu kowahulika wolonga muulonzi wake mwenyego?
9Wayagwe wenekae wa Palitia, Media, na Elamu, na wayagwe wenekae wa Mesopotamia, Yudea, Kapadokia na wayagwe wolawa Ponto na Asia,
10Filigia na Pamfilia, Misili na ng'ambu za Libia behi na Kilene. Na wahenza wayagwe kulawa mdiwambo da Loma,
11na Wayahudi wose na waja waitogole dini ya Kiyahudi, na wayagwe wanhu kulawa Kilete na Alabu. Na tweye towahulika vowolonga sang'hano ng'hulu ziyatendile Mulungu muulonzi wetu wenyego!”
12Wose wakanganya na kwazanywa, wakiiuza, “Mbuli ino nhegulo yake choni?”
13Ila wanhu wayagwe wawaponeza wolonga, “Wanhu wano wakoligwa!”
14Baho Petulo kema hamoja na watumigwa wa Kilisto longo dimwe na imwe, kenula dizwi kalonga, “Wayahudi wayangu na wanhu wose mkala Yelusalemu, tegelezeni goya, giladi muitange mbuli ino.
15Wanhu wano hawakoligwe kamba vimgelegeza mweye, kwavija sambi saa ndatu imitondo.
16Ila, mbuli ino iyo ilongigwe na muhokozi Yoeli,
17‘Mulungu kalonga, muna gamazua ga kimambukizo, kila munhu nomwitila Loho wangu. Wanenu wa kimbigalo na wa kitwanzi wohokola, wasongolo zenu wokona nzozi, na wavyele zenu wolota.
18Ona, vivija na watumigwa zangu wose, wakimbigalo na wakitwanzi, nowetila Loho wangu mmazua ago, na hewo wohokola.
19Notenda mizonza uchana kuulanga, na vilaguso hasi muisi, kowa na mulopa, moto na yosi kulu.
20Zua dogaluka kuwa ziza, na mulenge wowa mdung'hu kamba mulopa, kipigiti hadinalawila zua dija kulu dili na yenzi da kwiza kwa Mndewa.
21Abaho, munhu yoyose yondayatambike mtwaga da Mndewa, kokomboligwa.’
22“Mweye wanhu wa Islaeli, tegelezeni mbuli zino. Yesu wa Nazaleti iyo munhu yakalile na udaho wa kiungu ugubuligwe kumwenu na mizonza, mbuli za mkanganyo na vilaguso viyatendile Mulungu kumwenu kubitila heyo, kamba vumtanga.
23Munhu ino kalavigwa kamba viyalondile Mulungu na viyatangile songela mwaka, na mweye mumkoma kwa kuwalekela wanhu wehile wamuwambe mumsalaba.
24Ila Mulungu kamzusa, kamkombola kulawa muna gamasungu ga kudanganhika, kwavija havidahike ifa imgoge.
25Kwavija Daudi kalonga yomulonga heyo, ‘Nimona Mndewa haulongozi wangu mazua gose, kwavija kokala ng'ambu ya mkono wangu wa ukulume giladi sambinigudemezwe.
26Avo, moyo wangu wodeng'helela, na lulimi lwangu lotoa lukenze lwa ndeng'ha. Na lukuli lwangu lwose lwokala mditamanilo,
27kwavija huileka loho yangu kuzimu, na humuleka Munhu wako Yang'alile yole mdipanga.
28Kundagusila nzila za ugima, konitenda nideng'he mkukala hamoja na nie.’
29“Ndugu zangu Waislaeli, ndekeni niwalongele bila kudumba kwa mbuli zimpatile tata wetu Daudi. Heyo kadanganhika na kuzikigwa, na dipanga jake da bahano kumwetu mbaka lelo.
30Ila kwavija Daudi kakala muhokozi, kavitanga kamba Mulungu kamduilila kamba imwe wa ng'holo zake komwika mkigoda chake cha undewa.
31Daudi kagatanga gaja gose Mulungu gayalondile kutenda, avo kalonga mbuli ya kuzuka kwa Kilisto, ‘Halekigwe kuzimu, na lukuli lwake halolile mdipanga.’
32Yesu ino kazusigwa na Mulungu, na tweye tose tukala wasindila wa mbuli ino.
33Kenuligwa uchana na kwikigwa mkono wa ukulume wa Mulungu, na kum'bokela Loho wa Mulungu yalalikigwe na Tata, na kutwitila gano gomgona na kugahulika.
34Kwavija Daudi hakwelile kuulanga, ila kalonga, ‘Mndewa kamulongela Mndewa wangu, “Kala kumkono wangu wa ukulume
35mbaka vondaniweke wadumuka zako wawe kamba kigoda cha kwikila magulu gako.” ’
36“Wanhu wose wa Islaeli wolondigwa kuvitanga kamba Yesu ino immuwambile mumsalaba, Mulungu kamtenda kamba Mndewa na Kilisto!”
37Abaho, wanhu viwahulike vino, wahomigwa mmioyo yao, wamuuza Petulo na waja watumigwa wa Kilisto wayagwe, “Ndugu zetu, tutende choni?”
38Petulo kawalongela, “Kila munhu mmwanza wenu yaleke vilozo vake na kubatizigwa mditwaga da Yesu Kilisto giladi msegezeligwe vilozo venu, na kubokela nhunza ya Loho wa Mulungu.
39Kwavija kilagano kino kiza sama yenu mweye, na sama ya wanenu, na sama ya wanhu wose wokala kutali, nhegulo yake sama ya kila munhu yakemigwe na Mndewa Mulungu wetu.”
40Petulo kawalongela mbuli ziyagwe bwando na kuwagong'ondeza, yolonga, “Ikomboleni kulawa muna inhaguso yondaize ya wanhu wa mulelo uno wihile!”
41Wanhu wautogole usenga wake wabatizigwa, na zua dija wongezeka kamba wanhu alufu ndatu.
42Kipigiti chose wakala wobokela mafundo kulawa ha watumigwa wa Kilisto, wakala hamoja, waumogola mkate na kutambika.
43Mizonza na mbuli bwando za mkanganyo zitendigwa kubitila watumigwa wa Kilisto, na wanhu wose wona bwembwe.

Read SANG'HANO 2SANG'HANO 2
Compare SANG'HANO 2:6-43SANG'HANO 2:6-43