SANG'HANO 2:13-32

¹³Ila wanhu wayagwe wawaponeza wolonga, “Wanhu wano wakoligwa!”

¹⁴Baho Petulo kema hamoja na watumigwa wa Kilisto longo dimwe na imwe, kenula dizwi kalonga, “Wayahudi wayangu na wanhu wose mkala Yelusalemu, tegelezeni goya, giladi muitange mbuli ino.

¹⁵Wanhu wano hawakoligwe kamba vimgelegeza mweye, kwavija sambi saa ndatu imitondo.

¹⁶Ila, mbuli ino iyo ilongigwe na muhokozi Yoeli,

¹⁷‘Mulungu kalonga, muna gamazua ga kimambukizo, kila munhu nomwitila Loho wangu. Wanenu wa kimbigalo na wa kitwanzi wohokola, wasongolo zenu wokona nzozi, na wavyele zenu wolota.

¹⁸Ona, vivija na watumigwa zangu wose, wakimbigalo na wakitwanzi, nowetila Loho wangu mmazua ago, na hewo wohokola.

¹⁹Notenda mizonza uchana kuulanga, na vilaguso hasi muisi, kowa na mulopa, moto na yosi kulu.

²⁰Zua dogaluka kuwa ziza, na mulenge wowa mdung'hu kamba mulopa, kipigiti hadinalawila zua dija kulu dili na yenzi da kwiza kwa Mndewa.

²¹Abaho, munhu yoyose yondayatambike mtwaga da Mndewa, kokomboligwa.’

²²“Mweye wanhu wa Islaeli, tegelezeni mbuli zino. Yesu wa Nazaleti iyo munhu yakalile na udaho wa kiungu ugubuligwe kumwenu na mizonza, mbuli za mkanganyo na vilaguso viyatendile Mulungu kumwenu kubitila heyo, kamba vumtanga.

²³Munhu ino kalavigwa kamba viyalondile Mulungu na viyatangile songela mwaka, na mweye mumkoma kwa kuwalekela wanhu wehile wamuwambe mumsalaba.

²⁴Ila Mulungu kamzusa, kamkombola kulawa muna gamasungu ga kudanganhika, kwavija havidahike ifa imgoge.

²⁵Kwavija Daudi kalonga yomulonga heyo, ‘Nimona Mndewa haulongozi wangu mazua gose, kwavija kokala ng'ambu ya mkono wangu wa ukulume giladi sambinigudemezwe.

²⁶Avo, moyo wangu wodeng'helela, na lulimi lwangu lotoa lukenze lwa ndeng'ha. Na lukuli lwangu lwose lwokala mditamanilo,

²⁷kwavija huileka loho yangu kuzimu, na humuleka Munhu wako Yang'alile yole mdipanga.

²⁸Kundagusila nzila za ugima, konitenda nideng'he mkukala hamoja na nie.’

²⁹“Ndugu zangu Waislaeli, ndekeni niwalongele bila kudumba kwa mbuli zimpatile tata wetu Daudi. Heyo kadanganhika na kuzikigwa, na dipanga jake da bahano kumwetu mbaka lelo.

³⁰Ila kwavija Daudi kakala muhokozi, kavitanga kamba Mulungu kamduilila kamba imwe wa ng'holo zake komwika mkigoda chake cha undewa.

³¹Daudi kagatanga gaja gose Mulungu gayalondile kutenda, avo kalonga mbuli ya kuzuka kwa Kilisto, ‘Halekigwe kuzimu, na lukuli lwake halolile mdipanga.’

³²Yesu ino kazusigwa na Mulungu, na tweye tose tukala wasindila wa mbuli ino.