SANG'HANO 15:5-22

⁵Abaho, wanhu wayagwe wamtogole Kilisto wakalile ng'ambu ya Mafalisayo wema na kulonga, “Wamhazi wolondigwa wengizigwe kumbi na wagawinze Malagizo ga Musa.”

⁶Watumigwa wa Kilisto na wavyele waiting'hana wailole goya mbuli ino.

⁷Viwagendelele ng'hani kulongelela, Petulo kenuka na kuwalongela, “Ndugu zangu, movitanga kamba mazua gabitile Mulungu kanisagula nie kulawa mmwanza wenu niwapetele Wamhazi Usenga Unogile giladi wahulike na watogole.

⁸Na Mulungu, yoitanga mioyo ya wanhu, kalagusa kamba kawatogola mkuwagwelela Loho wake, kamba viyatendile kumwetu.

⁹Mkuing'aliza mioyo yao na nhamanila, katutenda tweye na hewo tuilinge.

¹⁰Avo habali mulonda kumgeza Mulungu mkuwekila wanahina nila msingo ayo wahenga zetu ama tweye hatuidaha kuipapa?

¹¹Si vivo! Totogola kamba tokomboligwa kubitila ngekewa ya Mndewa wetu Yesu, kamba vija hewo viwokomboligwa.”

¹²Wanhu wose waiting'hane haja wanyamala, wawategeleza Paulo na Banaba viwakalile wowalongela vilaguso na mikanganyo Mulungu iyatendile mwa Wamhazi kubitila hewo.

¹³Viwamambukize kulonga, Yakobo kalonga, “Ndugu zangu, nhegelezeni!

¹⁴Simoni Petulo katusimulila, avija tanhu Mulungu viimnogele kuwasola wanhu kulawa mwa Wamhazi sama ya twaga jake.

¹⁵Mbuli za wahokozi zoigondanya na mbuli ino kamba vizandikwe,

¹⁶‘Zihamala mbuli zino, nobweleganya, na kudizenga kabili hema da Daudi dikalile digwile. Nodizenga chusa haja hadibanangigwe, na kudinula.

¹⁷Avo wanhu wose wasigale wamzahile Mndewa, hamoja na Wamhazi wose, awo wakemigwe mtwaga jangu, kolonga Mndewa yatendile mbuli zino,’

¹⁸zitangigwe songela mwaka.

¹⁹“Avo, vino vivo nilamule kamba, sambituwagaze Wamhazi wamtogole Mulungu,

²⁰ila tuwandikile kamba wakale kutali na vakuja vilavigwe nhosa ha miwegu, ugoni, kuja nyama ifile mkubotigwa, na kuja na kung'wa mulopa.

²¹Kwavija Musa kapetwa m'viwambo vose songela mwaka na mwaka, na mbuli zake zisomigwa mzing'anda za nhambiko Mmazua gose ga Mhumulo.”

²²Abaho, watumigwa wa Kilisto na wavyele na wanhu wose wamtogole Kilisto walamula kuwasagula wanhu kulawa mmwanza wao, wawatume wachole kudiwambo da Antiokia hamoja na Paulo na Banaba. Avo wawasagula wanhu wabili, Yuda, yakalile na twaga da ikabili dikemigwa Balisaba, na Sila, wakalile vilangizi wa wanhu wamtogole Kilisto.