Sang'hano 13:32-46

³²Tweye twiza kuwapetela Mbuli Inogile, mbuli iyalongile Mulungu kwa wahenga zetu kamba koitenda,

³³sambi katutendela, tweye lukolo lwake, kwa kumzilibula Yesu. Kamba viyandikigwe mna ikitabu cha Zabuli ya kabili, ‘Gweye kwa Mwanangu, na lelo nolonga wose wajuwe niye na Tatako.’

³⁴Vino vivo viyalongile Mulungu mbuli ya kumzilibula kulawa kwa wafile, sekeyole mdipanga. ‘Nowanogela kwa unogelwa ung'alile kamba vinimulongele Daudi.’

³⁵Hanhu hayagwe mna ikitabu cha Zabuli holonga, ‘Mulungu hondaumuleke mtumigwa wako yang'alile yole mdipanga.’

³⁶Mbuli ino hailawilile kwa Daudi, kwavija Daudi kasang'hana gayalondile Mulungu, abaho kafa, kazikigwa hamoja na wahenga zake, na lukuli lwake luola mdipanga.

³⁷Lakini haikalile vivo kwa ayo Mulungu yaamzilibule kulawa kwa wafile.

³⁸Ndugu zangu Waizilaeli, tolonda mujuwe, usenga wa nzambi kugeligwa kumgongo wopetigwa kumwenu.

³⁹Munhu yoyose yomtogola Yesu kolekesigwa, lakini mbuli ino haidahike mna Gamalagizo ga Musa.

⁴⁰Avo, muiteganye, sekegawalawilile gaja galongigwe na watula ndagu wa Mulungu.

⁴¹‘Tegelezeni mweye muli wafyosi! Kanganyeni mufe! Kwavija kinhu kinhenda sambi, honda mkitogole bule, hata kamba munhu yahawasimulila!’ ”

⁴²Paulo na Balinaba viwakalile wolawa mng'anda ya kumpula Mulungu, wanhu wawagoneka wabwele mna Isiku iyagwe ya Kubwihila, wawapetele goya mbuli izo.

⁴³Wanhu viwasegele mumting'hano Wayahudi wengi na wanhu haweli Wayahudi waitogole dini ya Kiyahudi wawakweleleza Paulo na Balinaba. Watumigwa wawagangamiza wagendelele kukala mna ing'hekewa ya Mulungu.

⁴⁴Siku iyagwe ya Kubwihila kila munhu kudibuga keza kutegeleza mbuli ya Mndewa.

⁴⁵Wayahudi viwaluwone lunhu lwa wanhu, wona migongo, wakilema kiyalongile Paulo na wamuliga.

⁴⁶Lakini Paulo na Balinaba wagangamala kulonga, “Mbuli ya Mulungu ilondeka tanhu ipetigwe kumwenu. Lakini kwavija muilema na muiyona wenyego hamufaya kuupata ugima wa mazuwa gose, tweye towaleka tochola kwa wanhu haweli wayahudi.