Sang'hano 10:4-26

⁴Kolinelio kamulola bunhuu msenga ayo wa kuulanga kwa bwembwe kamulongela, “Go mkulu, kuna choni?” Msenga wa kuulanga kamwidika, “Mulungu kanogelwa kumpula kwako na sang'hano ya kuwataza wakiwa, nayo hakusemwa bule.

⁵Watume wanhu sambi baha, wachole Yopa kwa munhu imoja yokemigwa Simoni Petulo.

⁶Heyo mgeni mna ikae ya munhu yokemigwa Simoni, muwamba ng'hwembe, kokala behi ya Bahali.”

⁷Abaho msenga ayo wa kuulanga kasegela, Kolinelio kawakema wasang'hanaji zake wabili na mkalizi wake imoja wa iwasang'hanaji zake, yomdumba Mulungu.

⁸Kawalongela kija kilawilile, abaho kawatuma wachole Yopa.

⁹Siku diyagwe viwakalile mnzila behi na Yopa, imisi Petulo kachola kudigati da uchanha kumpula Mulungu.

¹⁰Kona nzala na kalonda kuja kinhu chochose, lujo vilukalile lotandigwa, Mulungu kamulagusila kinhu.

¹¹Kona ulanga ugubuka na kona kinhu kamba mgolole mkulu uwambigwe mhande zake nne wohumulusigwa hasi.

¹²Mgati yake kukala na wanyama wose na wang'onyo wotambala na ndege.

¹³Kahulika sauti yomulongela, “Petulo, lamuka uchinje uje!”

¹⁴Lakini Petulo kalonga, “Aka, Mndewa, sinakuja bule kinhu kigomigwe hebu kihile.”

¹⁵Sauti imulongela kabili, “Sekeuvikeme viha vinhu viyatendile Mulungu vinoge.”

¹⁶Mbuli ino ilawilila miyanza midatu, abaho kinhu acho kigaligwa kuulanga.

¹⁷Petulo viyakalile kokanganya fambulo da kinhu acho, wanhu watumigwe na Kolinelio wavika hana ing'anda ya Simoni, na wakala wemile haulongozi wa ulwivi.

¹⁸Wakema, wauza, “Vino hano hana mgeni yoyose yokemigwa Simoni Petulo?”

¹⁹Petulo kakala yang'hali yogelegeza fambulo da kinhu acho, baho Loho Yang'alile kamulongela, “Tegeleza! Kuna wanhu wadatu wokuzahila.

²⁰Avo sekeunyawenyawe, itande uchole nao, kwavija niye iyo niwatumile.”

²¹Avo Petulo kahumuluka kawalongela wanhu wao, “Niye iyo yumumzahila. Muwinza choni?”

²²Wamwidika, “Mkulu Kolinelio katutuma. Munhu ayo kanoga na komdumba Mulungu na katogoligwa ng'hani na Wayahudi. Msenga yang'alile wa kuulanga kamulongela yakugoneke gweye ukayake. Muladi yahulike chondaulonge.”

²³Petulo kawagoneka wanhu awo kumwake, ikilo acho kawagwaa hanhu ha kuwasa. Imitondo yake kaitanda kachola nao na wanhu wayagwe wamtogole Yesu kulawa Yopa wachola nayo.

²⁴Imitondo yake wavika mwiisi ya Kaisalia. Kolinelio kakala kowabeta, hamoja na ndugu na mbwiga zake wa behi yawagoneke.

²⁵Petulo viyakalile behi kuvika, Kolinelio kenuka kamcholela, kagwa kingubanguba kamtambikila.

²⁶Petulo kamwinula, kamulongela, “Inuka, niye mwenyego na munhu kamba gweye.”