Sandane 8:3-36

³A sɔnxɔma taan kirane nun a so dɛɛne ra, a naxa,

⁴“N na ɛ tan yamaan nan xilima. N falan tima adamadiine birin nan xa.

⁵Ɛ tan fe kolontarene, ɛ ɲɔxɔ lu. Ɛ tan xaxilitarene, ɛ findi xaxilimane ra.

⁶Ɛ tuli mati bayo n ma falan kɛndɛ. N fala faɲine nan tima ɛ xa.

⁷N dɛɛn ɲɔndin nan falama, bayo wule falane raɲaxu n ma.

⁸N dɛ falane birin tinxin, e sese mi findixi wulen na hanma yanfana.

⁹E birin fixa xaxilimaan yɛɛ ra yi. Naxanye bata kolonna sɔtɔ, ne e yatɛxi ɲɔndin nan na.

¹⁰Ɛ n ma xaranna fen dangu gbetin na, e nun kolonna dangu xɛma kɛndɛn na.

¹¹Amasɔtɔ fe kolonna fisa bɔxɔ bun nafunla xa. A dangu muxun waxɔn seene birin na.”

¹²“N tan, fe kolonna, n feene famuma. N muxun malima a xa kolonna sɔtɔ a yi feene yɛ fen.

¹³Alatala yɛɛragaxun kui, fɔ i fe ɲaxin naɲaxu. N tan, n wason nun yɛtɛ yigboon nun kɛwali ɲaxine nun wule falane raɲaxuxi.

¹⁴N gbeen nan maxadin nun miriya kɛndɛn na. N tan nan xaxilimaya yɛtɛɛn na. N tan nan gbee sɛnbɛn na.

¹⁵Mangane mangayaan ligama n tan nan baraka yi, kuntigine yi tɔnne dɔxɔ tinxinni.

¹⁶Yamana kanne nun muxu gbeene kiti tinxinxin sama n tan nan xɔn.

¹⁷N nafan naxanye ma, n fan ne rafanma nɛn. Naxanye n fenma, ne n toma nɛn.

¹⁸N nafunla nun binyen fima e ma nɛn, e nun hɛrisigɛn naxanye buma e nun tinxinyana.

¹⁹N ma finma seene dangu xɛma kɛndɛn na, N tɔnɔn naxan fima, na dangu gbeti kɛndɛn na.

²⁰N kira tinxinxin nan xɔn, kiti kɛndɛn sama naxan xɔn.

²¹N nafan naxanye ma n kɛɛn soma nɛn ne yii, n yi e banxine rafe nafunla ra.

²²Alatala n tan nan da a wali fɔlɔn na, benun a wali singe bodene, to mi na ra.

²³N nafala nɛn xabu waxati fɔlɔne, benun dunuɲa yɛtɛn xa da.

²⁴N barɛ, fɔxɔ ige yo mi yi na, tigi mi yi na igene yi minɛ dɛnaxan yi.

²⁵Benun geyane xa dɔxɔ, benun geyadine xa malan, n yi da.

²⁶Ala munma yi bɔxɔn nun burunne da, hanma a gbangbanna xɔri singena.

²⁷A to yi kuyen dama, n yi na, a to yi koren danna kɛrɛndɛnma tilinna ma,

²⁸a to kundane sa kore, a yi sɛnbɛn fi tilin igene xunne ma,

²⁹a yi danna sa fɔxɔ igen ma alogo igene nama dangu na ra a yi bɔxɔn bɛtɛn sa.

³⁰Na waxatini n yi walima a dɛxɔn alo a yii rafala kuntigin na. N yi sɛwaxi lɔxɔ yo lɔxɔ a yɛtagi, n ɲaxan a fe ra

³¹n ɲaxan a dunuɲa daxin na, a bɔxɔna. N yi sɛwa adamadiine fe yi.”

³²“Iki, n ma diine, ɛ tuli mati n na. Sɛwan na kanna xa, naxan na bira n ma kiraan fɔxɔ ra.

³³N nɛma ɛ xuru falane tiyɛ, ɛ tuli mati, ɛ yi fe kolonna sɔtɔ, ɛ nama ɛ mɛ a ra.

³⁴Sɛwan na kanna xa naxan na n xuiin namɛ, naxan na lu n konna dɛ ra lɔxɔn birin a n ma banxin dɛɛn kantan.

³⁵Amasɔtɔ naxan na n sɔtɔ, na bata siimayaan sɔtɔ, a mɔn yi Alatala kɛnɛn.

³⁶Koni naxan munma n to, na a yɛtɛ nan tɔrɔma. Naxan na n naɲaxu, sayaan nan nafan na ma.”