Sandane 6:8-30

⁸Anu, a donseen namarama a waxatini, a balon malanma se xaba waxatini.

⁹I tan muxu narixina, i luma saxi han waxatin mundun yi? I kelima xixɔnli waxatin mundun yi?

¹⁰I na i sa, yeriyerinna yi dangu i ma ndedi, i xi ndedi, i yi i yiine filin e bode ma ndedi,

¹¹yiigelitɔyaan yi baga i ma alo mafu tiina, e nun setareyana alo muɲadena.

¹²Muxun naxan wule falane tima fuyantenna na a ra, muxu xaxilitarena.

¹³A yɛɛne magirama bodene yanfadeni, a lanfane rakolon a sanne ra wundoni, a yiine maliga.

¹⁴Tinxintareyaan nan a bɔɲɛni. A fe ɲaxini tɔnma waxatin birin, a yɛngɛne rakelima.

¹⁵Nanara, gbalona a sɔtɔma nɛn xulɛn, a halagi sanɲa ma kedenni a yigitɛgɛ.

¹⁶Se sennin nan na naxanye raɲaxu Alatala ma, han se solofere a mi tinɲɛ naxanye ma mumɛ:

¹⁷Yɛɛ wasoxine, wule fala lɛnne, sɔntarene faxa yiine,

¹⁸bɔɲɛn naxan kɔtɛ ɲaxini tɔnma, sanna naxanye e mafurama siga fe ɲaxi ligadeni,

¹⁹wule seren naxanye wulen falama, e nun muxun naxan yɛngɛne rakelima ngaxakedenmane tagi.

²⁰N ma diina, i fafe a yamarine suxu, i nama i nga xaranna rawolɛ ayi.

²¹E sa i xaxinli habadan, e bira i kɔɛ alo ɲɛrɛna.

²²E tima nɛn i yɛɛ ra i ya sigatine yi. E i kantanma nɛn i ya xixɔnli, i na keli, e yi i kawandi.

²³Amasɔtɔ yamarini itoe luxi nɛn alo lɛnpuna, xaranni ito findixi kɛnɛnna nan na. I xuru falan naxan i sɔnna yitama i ra, na i tima siimayaan kiraan nan xɔn.

²⁴E i ratangama nɛn ɲaxalan yalunxin ma e nun muxu gbɛtɛna ɲaxanla fala ɲaxumɛne.

²⁵I nama kunfa na ɲaxalan sifan xɔn a tofanna ma. I nama tin a i rakunfa a mato faɲin xɔn.

²⁶Amasɔtɔ yalunden na feen yatɛma buru xun kedenna saren nan na, muxu gbɛtɛ ɲaxanla i niin nan fɔxɔ ra.

²⁷Muxun nɔɛ tɛɛn sɛ nɛn a yibaan kui hali a dugin birin mi gan ba?

²⁸Muxun nɔɛ sigan tiyɛ tɛɛ wolonne fari hali a sanne mi gan ba?

²⁹Na luxi nɛn alo muxun na bira muxu gbɛtɛna ɲaxanla fɔxɔ ra, a na a yiin din a ra, na feen saranma a ra nɛn.

³⁰Yamaan mi muɲaden naɲaxuma xa a seen muɲaxi alogo a xa kamɛn ba.