Sandane 31:4-26

⁴I tan Lemuyɛli, a mi daxa mangane xa, a mi daxa mangane yi manpaan min, kuntigine mi lan e bira dɔlɔn fɔxɔ ra

⁵alogo e minxin nama ɲinan tɔnne xɔn, e fa muxu ɲaxankataxine yanfa kitini.

⁶Ɛ dɔlɔn lu na muxune xa naxanye halagima, naxanye niin nafexi xɔlɛn na, ɛ manpaan lu ne xa.

⁷Ne na e min, e ɲinanma e yiigelitɔyaan xɔn nɛn, e tɔrɔyaan mi fa rabirama e ma.

⁸Dɛtarene xun mafala, i muxu nɔxine birin mali e kitine yi.

⁹I falan ti, i kitin sa tinxinni, i yiigelitɔne nun tɔrɔ muxune xun mayɛngɛ kitini.

¹⁰Nde nɔɛ ɲaxalan faɲin sɔtɛ? A tɔnɔn dangu bɔxɔ bun nafunle ra.

¹¹A xɛmɛn xaxili tixi a tan nan na, a munanfanna mi ɲanɲɛ mumɛ!

¹²A fe faɲin nan ligama a xa, a ɲaxin mi a ra, a siin sogen birin yi.

¹³A yɛxɛɛ xabe garin nun gɛsɛ futu garin nan fenma a e rafala dugin na sɛwani.

¹⁴A faan balon na nɛn sa keli wulani alo yulaya kunkine.

¹⁵A kurunma nɛn subaxa, a kudin so a denbayaan xa, a fa a walikɛ ɲaxanle ti e wanle ra.

¹⁶A na miri xɛɛna nde ma, a yi a sɔtɔ, a nakɔɔn sa a tɔnɔ sɔtɔxine gbetin na.

¹⁷A wanle dɛ suxuma tunnafanna nin. A wali a yiin na sɛnbɛni.

¹⁸A a kolon a feene sɔnɔyama nɛn, a lɛnpun mi tuma kɔɛɛn na.

¹⁹A gɛsɛn wurundun a yiin na, a gɛsɛn sɔxɔn dugin na.

²⁰A yiine dɔxɔn yiigelitɔne bun. A yiin ti tɔrɔ muxune xa.

²¹A mi gaxun xunbenla fe ra a denbayaan xa, amasɔtɔ e birin marabɛri baxi dugi faɲin nan na.

²²A bitinganne rafalama, a marabɛri baxi taa dugine nun dugi mamiloxine nan na.

²³A xɛmɛn yatɛxi fonne malanni, a dɔxɔma taan fonne yɛ.

²⁴A taa dugi domane rafalama, a e mati, a tagi xidine rafala yulane xa.

²⁵Sɛnbɛn nun binyena a ma alo domana. A na a miri waxati famatɔne ma, a gele.

²⁶A falan tima fe kolonna nin, a muxune xaran hinan falane ma.