Sandane 30:16-33

¹⁶E tan ni i ra: Laxira nun gbantan nun bɔxɔn naxan mi wasama igen na, e nun tɛɛn naxan mi a falan mumɛ, a naxa, “Na lan.”

¹⁷Muxun naxan yɛɛ yoma a baba ma, naxan tondima a nga xuiin suxɛ, xude xɔn xaxane a yɛɛne gema nɛn a kui, dugane yi e don.

¹⁸Se saxan na naxanye dangu n na, han naanin n mi naxanye famuxi.

¹⁹E tan ni i ra: Singbinna kirana kore, saɲina kirana gɛmɛn fari, kunkina kirana fɔxɔ igen xun ma, e nun banxulanna kirana sungutunna konni.

²⁰Ɲaxalan yalunden kɛɲaan ni ito ra: A na a dɛge, a a dɛɛn nasugusugu, a yi a fala, a naxa, “N mi sese ligaxi a ɲaxin na.”

²¹Bɔxɔn xuruxurunma se saxan bun, han naanin a mi tiyɛ naxan bun.

²²E tan ni i ra: Konyin na findi mangan na, kɔmɔn na lugo donseen na,

²³ɲaxalan naɲaxuxin na futu, e nun konyi gilɛn na a kanna kɛɛn tongo.

²⁴Sube naanin xurun bɔxɔn ma koni e tan nan fekolonna sɔtɔxi:

²⁵Dondonle fanga mi na, koni e e donseen namarama a waxatini.

²⁶Fanye ra siine sɛnbɛ mi na, koni e sodene rafalaxi gɛmɛne nin.

²⁷Manga mi tuguminne xun na, koni e birin minima e gali yɛ ma.

²⁸Dangene suxɛ nɛn yiin na, koni e toma manga banxine kui.

²⁹Se saxan na naxanye rayabu, han naanin naxanye sigati kiin tofan.

³⁰Yatana, susulaan subene tagi, naxan mi a gima muxu yo bun,

³¹donton kanbaxina, hanma kɔtɔna, e nun mangana a ganli.

³²Xa i bata i yɛtɛ yigbo xaxilitareyani, xa i bata kɔtɛni tɔn, nayi, i dɛɛn suxu.

³³Amasɔtɔ muxun na nɔnɔn naxi, na nan findin fɛnɛn na, i na muxun ɲɔɛɛn din, wunla nan minima, i mɔn na xɔlɔn nakeli, na raɲanma yɛngɛn nan ma.