Sandane 28:1-12

¹Muxu ɲaxina a gima nɛn hali muxe mi a fɔxɔ ra, koni tinxin muxun tan susu alo yata sɛnbɛmana.

²Xa yamanan dugurenne murutɛ, kuntigine wuyama ayi nɛn na yi. Koni manga xaxilimaan naxan fe kolon, na a ligama nɛn yamaan yi e raxara.

³Yiigelitɔɔn naxan sɛnbɛtarene ɲaxankatama na luxi nɛn alo kala ti tulen naxan mi balo luma na.

⁴Naxanye sariyan beɲinma ne muxu ɲaxine nan tantunma, koni naxanye sariyan suxuma ne xɔlɔma nɛn e ma.

⁵Muxu ɲaxine mi kiti kɛndɛn kolon koni naxanye Alatala fenma ne a birin famuma.

⁶Yiigelitɔɔn naxan sigan tiin tinxinni, na fisa nafulu kanna xa naxan kira yifuxin xɔn.

⁷Naxan na sariyan suxu, dii xaxilimaan nan na ra, koni naxan na lu fuyantenne yɛ, na fama yagin nan na a baba ma.

⁸Naxan na dahamu gbeti donla tɔnɔ gbeene xɔn na a malanma muxu gbɛtɛn nan xa naxan hinanma sɛnbɛtarene ra.

⁹Xa muxuna nde a tunla ba sariyan na alogo a nama a mɛ, hali a na sali, na yɛtɛɛn haramuxi.

¹⁰Naxan na muxu faɲine xali kira ɲaxin xɔn, na biran yinla nan na a naxan gexi. Koni fɛ mi naxan na, na hɛrin nan sɔtɔma a kɛɛn na.

¹¹Nafulu kanna a mirixi nɛn a fe kolon, koni yiigelitɔ xaxilimana a kɛɲaan nakɔrɔsima nɛn.

¹²Tinxin muxune na nɔɔn sɔtɔ, binye gbeen na a ra, koni xa muxu ɲaxine keli, birin a luxunma nɛn.