Sandane 20:17-27

¹⁷Balon naxan sɔtɔn wulen xɔn, na ɲaxun muxun dɛ. Koni ndedi na liga, a luma nɛn alo a dɛɛn nafexi gɛmɛ xɔnna nan na.

¹⁸Maxadi xuine ramɛ alogo i waxɔn feene xa kamali. Xa i sigama yɛngɛni, xaxinla fen.

¹⁹Muxu mafalane wundo feene nan makɛnɛnma, nayi, naxan falan tima ɲaxi ra, i nama lu na fɔxɔ ra.

²⁰Naxan a fafe nun a nga rayarabima, na lɛnpun tuma nɛn a lu dimini.

²¹Kɛɛn naxan sɔtɔxi sinma na mi fama barakadeni dɔnxɛn na.

²²I nama a fala, i naxa, “N fe ɲaxin ɲɔxɔma nɛn.” I yigin sa Alatala yi, a i rakisima nɛn.

²³Liga se tinxintarene raɲaxu Alatala ma. Sikeli tinxintaren mi fan.

²⁴Alatala nan adamadiine san tidene ragidima, nayi muxun nɔɛ a sigaden kolonɲɛ di?

²⁵Naxan na dɛ xuiin tongo bɔtɛ rabani, a xa sena nde fi Ala ma, na luxi alo a suxi nan fa a ra a na a miri na fe ma na xanbi ra.

²⁶Manga xaxilimaan muxu ɲaxine raxuyama ayi nɛn alo maala na yife, a yi e ɲaxankata alo malo bɔnbɔna.

²⁷Adamadiin niin findixi lɛnpun nan na a xa, Alatala naxan fixi a ma alogo a xa a bɔɲɛn kui fe tilinxine fɛsɛfɛsɛ.