Sandane 18:6-23

⁶Xaxilitarena falane fe matandin nan nakelima, a bɔnbɔ a dɛ xuiin ma.

⁷Xaxilitaren dɛna a halagima nɛn, a fala xuine findixi luti ratixin nan na a xa.

⁸Nafigina falane luxi nɛn alo donse ɲaxumɛn naxan godon muxun kui.

⁹Naxan tunnaxɔlɔ a wanli na nun se kalan birin muxu keden.

¹⁰Alatala xinla muxun natangama alo yin barakaxina, tinxin muxuna a gima nɛn a siga a kui, a lu makantanni.

¹¹Nafulu kanna kɛɛn findixi a taa makantanxin nan na. A miriyani, yinna na a ra naxan mi nɔɛ kalɛ.

¹²Muxuna wasona a xalin kalan nan ma, koni binyen sɔtɔma yɛtɛ magodon nan xɔn.

¹³Naxan yabin tima benun a xa a tuli mati, daxuyaan nan na ra, e nun yagina!

¹⁴Muxuna limaniyaan nan a malima a fureni. Koni xa a nii yifɔrɔ a ma, nde a rasɛwama?

¹⁵Xaxilimaan fe kolonna nan sɔtɔma a bɔɲɛni. Fekolonne e tuli matima fe kolonna nan na.

¹⁶Finma seen kiraan nan nabima a fi muxun yɛɛ ra, siga muxu gbeene fɛma.

¹⁷Naxan singe na a yaxaseri masa, na maliga yo kanna ra, han a yɛngɛfaan yi fa maxɔdinna ti.

¹⁸Masɛnsɛnna sɔnxɔ sɔnxɔne raxunbelima nɛn, a yɛngɛne ɲan sɛnbɛmane tagi.

¹⁹Xa muxuna a ngaxakedenna konbi na bɔɲɛn xɔdɔxɔma ayi nɛn a ma dangu taa makantanxin yinna ra. Fe matandine xɔdɔxɔ manga banxin dɛɛn balan wurene xa.

²⁰Muxun fala xuine nan balon sɔtɔma a xa. Falan naxan minima a dɛ, na nan a ralugoma.

²¹Sayaan nun siimayaan binla findixi falan nan na. A rafan naxan ma, na a tɔnɔn sɔtɔma nɛn.

²²Naxan na ɲaxanla sɔtɔ, na bata hɛrin sɔtɔ, a Alatala fanna nan sɔtɔxi.

²³Yiigelitɔɔn falan tima mafanna nin, koni nafulu kanna yabi xɔdɛxɛn nan tima.