Sandane 17:2-28

²Walikɛ xaxilimaan fisa wali kanna diin xa, naxan yagi feen nabama. Na walikɛ sifan kɛɛn sɔtɔma nɛn na denbayani.

³Gbetin nun xɛmaan nasɛnsɛnma sulun tɛɛn nan na, koni Alatala nan adamadiine bɔɲɛn fɛsɛfɛsɛma.

⁴Fe ɲaxi rabaan fala ɲaxin nan namɛma. Wule falana a tuli matima fala xɔlɛn nan na.

⁵Naxan na yiigelitɔɔn magele na bata yiigelitɔne dali mangan nayelefu. Naxan na sɛwa a bodena tɔrɔn na, na feen saranma na kanna ra nɛn.

⁶Mamandenne findixi fonne xunna kenla nan na. Fafane fan findixi diine xunnayerenna nan na.

⁷Yɛtɛ yigbo falane mi daxa kɔmɔn dɛ, wulen fan mi lan mangan dɛ.

⁸Finma seen luxi nɛn alo xiriyana a fi muxun xa. A na siga dɛdɛ, a feene sɔnɔyama nɛn.

⁹Naxan muxune mafeluma e hakɛn na, na xanuntenyaan nan fenma. Koni naxan luma muxune hakɛne fe rabirɛ e ma, na xɔyimane taxunma nɛn.

¹⁰Maxadi keden peen xaxilimaan maliyɛ dangu bosaan yɛ kɛmɛ ra xaxilitaren ma.

¹¹Fe ɲaxi rabaan murutɛn nan tun fenma, koni xɛra kininkinintaren sigama nɛn a xili ma.

¹²A fisa i naralan sube xaɲɛn na naxan ma diiye baxi a yii, benun i xa naralan xaxilitaren na a xaxilitareyani.

¹³Naxan na fe faɲin ɲɔxɔ fe ɲaxin na fe ɲaxin mi a masigɛ na kanna banxin na mumɛ.

¹⁴Fe matandi rakenla luxi nɛn alo i na igen nati gbiligbinla bɔ a ra. A yi fisa i yi na feen lu na, benun yɛngɛn xa bira ayi.

¹⁵Naxan yoon fima kala tiin ma e nun naxan tinxin muxun yalagima ne firinna sese mi rafan Alatala ma.

¹⁶Gbetin tɔnɔn nanse ra xaxilitaren yii? A mi na rawalima fe kolonna sɔtɔ feen na. A xaxili yo mi na.

¹⁷Muxun xɔyina a xanuxi waxatin birin. Muxuna ngaxakedenna daxi tɔrɔ waxatine nan ma fe ra.

¹⁸Xaxilitaren nan muxu gbɛtɛna donla goronna tongoma, a yi a yɛtɛ dɔxɔ tolimani a xa.

¹⁹Yɛngɛn nafan naxan ma, hakɛn fan nafan na kanna ma. Naxan na a yɛtɛ yigbo, na gbalon nan fɔxɔ ra.

²⁰Bɔɲɛ ɲaxin mi hɛrin sɔtɔma. Naxan fala tinxintaren tima, na biran tɔrɔn nin.

²¹Naxan na xaxilitaren bari, na yagima nɛn, kɔmɔn baba mi sɛwama.

²²Bɔɲɛ sɛwaxin kɛndɛyaan nan nasɔnɔyama, koni nii fɔrɛn fatin soma a ra nɛn.

²³Muxu ɲaxin dimi yi seen nasuxuma mayifuun nin a kiti ɲaxin sa.

²⁴Xaxilimaan biraxi fe kolonna nan fɔxɔ ra, koni xaxilitarena a yɛɛne rasigama bɔxɔn nan xun xɔn.

²⁵Dii xaxilitarena a baba raxɔlɔma nɛn a findi xɔlɛn na a nga xa.

²⁶A mi lan tinxin muxun xa yangin. Sariya mi a ra muxu kɛndɛn yi bulan.

²⁷Naxan na a dɛɛn suxu, na bata fe kolonna sɔtɔ. Xaxilimaan sabari nɛn.

²⁸Hali xaxilitaren yatɛxi fekolonna ra, xa a sabari. Xaxilimana a dɛɛn suxɛ nɛn.