Sandane 15:4-33

⁴Fala faɲin luxi nɛn alo siimaya wudina, koni yanfantenya falan muxun niin nan tɔrɔma.

⁵Xaxilitaren fafe a kawandi xuiin mi rafan a ma, koni naxan a tuli matima a sɔnna fala muxun na, xaxilimaan nan na ra.

⁶Nafulu gbeen luma nɛn tinxin muxuna banxini, koni muxu ɲaxine sɔtɔ seen fama kɔntɔfinla nan na.

⁷Fe kolonne falane kolonna nan naxuyama ayi, koni xaxilitarene bɔɲɛn mi na kiini.

⁸Muxu ɲaxine saraxan findixi haramun nan na Alatala xa, koni muxu faɲine maxandin nafan Alatala ma.

⁹Muxu ɲaxine kiraan naɲaxu Alatala ma. Koni naxan tinxinna fenma na rafan a ma.

¹⁰Naxan na kiraan beɲin, na kanna xuruma nɛn ki xɔdɛxɛni. A mi rafan naxan ma a sɔnna xa fala, na kanna faxama nɛn.

¹¹Alatala laxira nun yahannama yiren birin toma, e faxi fa naxan muxun bɔɲɛni!

¹²Maxadin mi rafan magele tiin ma, a mi sigama fekolonne fɛma.

¹³Sɛwan yɛtagini yalanma nɛn, koni nii yifɔrɛn fama bɔɲɛ kalan nan xɔn.

¹⁴Xaxilimaan kolonna nan fenma a bɔɲɛni. Koni daxuya falan nan tun xaxilitaren dɛ.

¹⁵Yiigelitɔne siimayaan findixi tɔrɔn nan na, koni naxan bɔɲɛ sɛwaxi, na luma ɲaxanxi nɛn waxatin birin.

¹⁶A fisa i ndedi sɔtɔ i lu Alatala yɛɛragaxuni, benun i xa nafulu gbeen sɔtɔ kɔntɔfinli.

¹⁷Bogi seene gbansanna donna fisa xanuntenmane tagi, dangu ɲinge raturaxin suben donna ra xɔnnantenyani.

¹⁸Muxu bɔɲɛ gbeen yɛngɛn nan nakelima. Koni muxu diɲaxin tan yɛngɛn naxunbelima nɛn.

¹⁹Muxu narixina kiraan nafexi ɲanle nan na, koni muxu faɲina kiraan malaxun nɛn.

²⁰Dii xaxilimana a baba rasɛwama nɛn, koni xaxilitarena a nga xurunma nɛn.

²¹Xaxilitareyaan findixi sɛwan nan na xaxilitaren xa, koni xaxilimana kiraan tinxin nɛn.

²²Maxaditareyaan nan fe yitɔnxine kalama, koni e sɔnɔyama nɛn xa maxadi tiine wuya.

²³Sɛwan na ra muxun xa, a na yabi faɲin ti. Falan naxan tima a waxatini, na tɔnɔn gbo han!

²⁴Xaxilimana dunuɲa yi gidin kiraan tema nɛn han kore xɔnna, a yi a tanga laxira ma.

²⁵Alatala wasodene banxine rabirama nɛn, koni a kaɲa gilɛna bɔxɔn danne luma nɛn e kiini.

²⁶Miriya ɲaxine mi rafan Alatala ma, koni fala faɲine sariɲan.

²⁷Tɔnɔ sɔtɔ ki ɲaxin nafan naxan ma, na kanna gbalon nan nasoma a denbayani, koni naxan mi dimi yi seene rasuxuma mayifuni, na siimayaan sɔtɔma nɛn.

²⁸Tinxin muxuna a mirima nɛn, benun a xa yabin ti, koni muxu ɲaxin fala ɲaxin nan tima han!

²⁹Alatala makuya muxu ɲaxine ra, koni a tinxin muxune maxandi xuine ramɛma nɛn.

³⁰Yɛɛ yiyalanna muxune bɔɲɛn nan nasɛwama, xɛrayaan fala faɲin muxun sɛnbɛ soma nɛn.

³¹Naxan na a tuli mati maxadi xuine ra naxanye muxun nakisima, na kanna luma nɛn fe kolonne yɛ.

³²Naxan na tondi xurɛ, na mi rafan a yɛtɛn ma, koni naxan na a tuli mati a sɔnna fala muxune ra, na xaxinla nan sɔtɔma.

³³Fe kolonna sɔtɔma Alatala yɛɛragaxun nin, yɛtɛ magodon nan fama binyen na.