Sandane 14:3-23

³Wason nan sabatixi xaxilitaren dɛ, koni fekolonne falane e rakantanma nɛn.

⁴Xa tura mi na, sagani gelima nɛn, bayo ɲingen fangan nan xɛɛ biin tɔnɔn gboma ayi.

⁵Sere tinxinxin mi wulen falama, koni wule seren wulen nan falama.

⁶Magele tiin fe kolonna fenma nɛn, a mi a toma. Koni fe kolonna sɔtɔn mi raxɔlɔ xaxilimaan xɔn.

⁷I makuya xaxilitaren na, amasɔtɔ fe kolonna falan mi a dɛ.

⁸Xaxilimana a mirima a sigati kiin nan ma, na nan a fe kolonna ra. Koni xaxilitaren yanfan naxanye soma, ne nan a daxuyaan na.

⁹Tagi yitɔnna bɔtɛ mi xaxilitarene xa, koni ɲɛnige faɲiyaan toma muxu faɲine nan tagi.

¹⁰Muxun nan a bɔɲɛn xɔlɔ feen kolon, muxu gbɛtɛ mi nɔɛ a sɛwan fan kolonɲɛ.

¹¹Muxu ɲaxine banxin kalama nɛn. Koni muxu faɲine bubun sabatima nɛn.

¹²Kirana nde tinxin adamadiin yɛɛ ra yi, koni a raɲanma sayaan nan ma.

¹³Muxun gelɛ nɛn, a bɔɲɛn tɔrɔxi, dɔnxɛn na sɛwan yi findi sunun na.

¹⁴Dɛnkɛlɛyataren wasama nɛn a kɛwanle tɔnɔn na, koni muxu faɲin fisa a xa.

¹⁵Fe kolontaren la fena ngaan na, koni xaxilimana a mirima nɛn a sigati kiin ma.

¹⁶Fekolonna gaxun fe ɲaxin na nɛn, a masiga a ra, koni xaxilitaren susuma a ra nɛn, a so a yi.

¹⁷Naxan xɔlɔn mafurɛn, na xaxilitareyaan nan ligama, kɔtade ɲaxin naɲaxu muxune ma.

¹⁸Kɔmɔyaan nan fe kolontarene yii e kɛɛn na, koni kolonna luxi alo xaxilimane mangaya taxamaseri kɔmɔtina.

¹⁹Muxu ɲaxine e mafelenma muxu faɲine nan bun ma, fe ɲaxi rabane yi lu tinxin muxune dɛɛn na.

²⁰Yiigelitɔɔn naɲaxu hali a lanfane ma, koni nafulu kanna xɔyine wuya.

²¹Naxan a adamadi boden naɲaxuma, hakɛ kanna nan na ra. Koni sɛwan na kanna xa naxan kininkininma yiigelitɔne ma.

²²Naxanye fe ɲaxini tɔnma, ne mi lɔma ayi ba? Koni naxanye fe faɲin mirima, hinanna nun lannayaan ne nan xa.

²³Tɔnɔn wali xɔdɛxɛ birin yi koni falan gbansanna fama yiigelitɔyaan nan na.