Sandane 13:2-18

²Muxun balo faɲin sɔtɔma a fala xuine nan xɔn. Koni tinxintarene kunfaxi gbalon nan xɔn.

³Naxan na a dɛɛn suxu, na a niin natangama nɛn. Naxan falan tima ɲaxi ra, na bɔnɔn nan fenma a yɛtɛ xa.

⁴Muxu narixin kunfama seene xɔn anu sese mi a yii. Koni naxanye walima, ne wasama nɛn feu.

⁵Wulen naɲaxu tinxin muxun ma. Koni muxu ɲaxin xunna godon nun yagin nan xilima a yɛtɛ ma.

⁶Fɛ mi naxan sigati ki ra, tinxinyaan na rakantanma nɛn. Koni fe ɲaxin nan yulubitɔɔn nabirama.

⁷Muxuna nde a yɛtɛ findima se kanna ra, anu sese mi a yii. Muxu gbɛtɛ a yɛtɛ findima setaren na, anu nafulu gbeena a yii.

⁸Muxuna nafunla nɔɛ a xunbɛ nɛn. Anu, muxune mi e kɔnkɔma yiigelitɔɔn tan ma.

⁹Tinxin muxune luma sɛwan nin kɛnɛnyani. Koni muxu ɲaxine luxi nɛn alo lɛnpun na tu.

¹⁰Wason yɛngɛne nan nakelima. Koni naxanye e tuli matima maxadi xuine ra, fe kolonyaan ne nin.

¹¹Seen naxanye sɔtɔxi a ɲaxin na mafurɛn, ne sigan ɲanɲɛ nɛn. Koni naxanye sɔtɔxi a faɲin na ndedi ndedi, ne xun masama nɛn.

¹²Yigi makuyen muxun tunnaxɔlɔma a ma nɛn. Koni muxun waxɔn feen na liga a xa, na a nii yifanma a ma nɛn alo siimaya wudin yɛtɛna.

¹³Naxan na a mɛ maxadi xuiin na, na kanna a saranna sɔtɔma nɛn. Naxan fan na yamarin suxu, na fan a saranna sɔtɔma nɛn.

¹⁴Fe kolonne xaranna fama nii rakisin nan na, a muxun ba sayaan lutin na.

¹⁵Xaxilimaan muxune kɛnɛn. Koni yanfantenna kiraan mi raɲanma a ma.

¹⁶Xaxilimaan feen ligama a kolonna nan xɔn. Koni xaxilitarena a daxuyaan nan nawangama.

¹⁷Xɛra ɲaxin birama kɔntɔfinla nin. Koni xɛra tinxinxin dandanna nan tima.

¹⁸Naxan mi a tuli matiyɛ a xuru falane ra, na yiigelitɔyaan nun yagin sɔtɔma nɛn. Koni naxan na a tuli mati a sɔnna fala muxune ra, na binyama nɛn.