Sandane 12:4-26

⁴Ɲaxalan kɛndɛn nan a xɛmɛna xunna kenla ra. Koni ɲaxalan yagitaren luxi nɛn a xɛmɛn xa alo xɔri xɔlɛ furena.

⁵Tinxin muxune miriyane findixi kiti kɛndɛn nan na. Koni muxu ɲaxine fe yitɔnxine yanfan nan tima.

⁶Muxu ɲaxine falane findixi faxa ti woson nan na. Koni muxu faɲine dɛ xuina e xunbama nɛn.

⁷Muxu ɲaxine na bira, e raxɔrima nɛn. Koni tinxin muxune denbayaan sabatima nɛn.

⁸Muxun matɔxɔma a xaxilimayaan nan ma fe ra. Koni naxan bɔɲɛ ɲaxu, na raɲaxuma nɛn.

⁹A fisa walikɛ keden yi lu i yii, i lu muxudiyani, benun i xa i yɛtɛ findi muxu gbeen na, donseen yi dasa i ma.

¹⁰Tinxin muxuna a yengi dɔxɔma a xuruseene xɔn nɛn. Koni kininkinin mi muxu ɲaxine yi mumɛ!

¹¹Naxan na a bɔxɔn nawali, na lugoma nɛn. Koni naxan na bira fe fuune fɔxɔ ra, na xaxili mi na.

¹²Muxu ɲaxine kunfama se muɲaxine nan xɔn. Koni tinxin muxune salenne sabatin nɛn.

¹³Muxu ɲaxina hakɛ falane a suxuma nɛn alo luti ratixina. Koni tinxin muxun futuxuluma nɛn tɔrɔyaan yii.

¹⁴Muxun fala xuiin nan a ralugoma se faɲine ra, a wali xɔnna yi findi a saranna ra.

¹⁵Xaxilitarena a yɛtɛ sigati kiin nan yatɛxi kira kɛndɛn na. Koni fe kolonna nan a tuli matima maxadi xuine ra.

¹⁶Xaxilitarena a xɔlɔn mayitama nɛn mafurɛn. Koni xaxilimaan yagi feen suturama nɛn.

¹⁷Naxan na sereyaan ba ɲɔndini, na tinxinna nan fenma. Koni wule seren yanfan nan tima.

¹⁸Naxan na falan ti a xunna yi, na muxune bɔɲɛn nan kalama alo dɛgɛmaan nan sɛgɛn tima. Koni fe kolonne falane dandanna nan tima.

¹⁹Ɲɔndin luma nɛn habadan. Koni wulen sii mi na.

²⁰Naxanye fe ɲaxine yitɔnma, yanfan nan ne bɔɲɛni. Koni sɛwan na kanna xa naxan bɔɲɛ xunbenla rasoma.

²¹Fe ɲaxi yo mi tinxin muxune liyɛ. Koni fe ɲaxin nan muxu ɲaxin sɔtɔma han a wasa.

²²Wule falane mi rafan Alatala ma. Koni ɲɔndi falane rafan a ma.

²³Xaxilimana a kolonna luxunma nɛn. Koni xaxilitarene e daxuyaan nawangama nɛn.

²⁴Naxanye walima a xɔdɛxɛn na, ne mangayaan sɔtɔma nɛn. Koni salantenna raɲanma konyiyaan nin.

²⁵Kɔntɔfinla muxun bɔɲɛn tɔrɔma nɛn. Koni fala faɲina a rasɛwama nɛn.

²⁶Tinxin muxun findixi yɛɛratiin nan na a xɔyin xa. Koni muxu ɲaxine kirana e ralɔma ayi nɛn.