San Marcw 6:9-40

⁹con xgurëch reeman, con tijbzi lajd najcw reeman.

¹⁰Dxel rëbaman loj reeman: ―Yu lod guidxindi, tijbzi yagaj yayaꞌndi xt guidxin dxej yazadi luguiedx guin.

¹¹Bal yuꞌ guiedx lod ad rënt reeman lëjt o ad rënt reeman gucaagdiajg reeman ni rnieedi, gol barii yagaj, gol gudxijp guxyuj guiaꞌdi ziꞌc sen guial ad rënt reeman guzoob reeman diidx. Din naj rni lojdi, guial dxej ni yadëëd ree bejn cwent loj Dios mazri casti naroob yayal reeman guial loj ree bén Sodoma në Gomorra.

¹²Zianz brii reeman ziguiedx reeman loj ree bejn guial rayal yayüjn reeman xgab por xtol reeman.

¹³Abiꞌ rabëë reeman zien ree xindxab luxdoo ree bejn, zien tëë ree bénragxuu gudëëb reeman sejt, abiꞌ bayüjn reeman laa reeman.

¹⁴Chi biguiejn rey Herodes ni rüjn Jesús guial ruzaꞌt ree bejn laaman guidibczi, rëb reeman: ―Waj, bén baroobnijs bejn ree ma baban, zeel rajpaman guialrniabee rüjnman milagr ree.

¹⁵Per yuꞌ reeman rëb: ―Elíasan, bén rudëë xtiidx Dios loj ree bejn. Yuꞌza reeman rëb: ―Tijb bén rudëë xtiidx Dios loj ree bejnan lasaꞌ ree bén gocli.

¹⁶Chi biguiejn Herodes rëb reeman zian, rëbaman: ―Wajn, xin gunabeen biruꞌ yëjn, laaxan ma baban yan.

¹⁷Rëb Herodes guin zian din laagajcaman gunabee gunaaz reeman Waj, abiꞌ badxeꞌman laaman ladxguiib por Herodías. Herodías na̱j xbéngunaa Felip bijch Herodes. Per Herodes cwaꞌman Herodías.

¹⁸Abiꞌ guial rëb Waj loj Herodes: ―Ad laat tiaꞌ xbéngunaa bijchil.

¹⁹Zeel bidxeꞌch Herodías Waj, guyënman nugüjtaman laaman. Per ad rileꞌtan,

²⁰din rdxeb Herodes guial ragbeeman rüjn Waj ni rën Dios, rüjn tëëman ziꞌc rayal, zeel ad cwëjbtaman xhie nüjnnë Herodías Waj. Majsi ad ragbeet Herodes xhie güünman por ni rëb Waj lojman, per ruladxaman gucaagdiajgaman ni rnieeman.

²¹Per bidxin dxej been Herodías ni rënman. Chi bazaꞌ Herodes ijz, abiꞌ beenman lanij, badxeꞌman tijb guialraw par bén rniabee ree në par ree bén rniabee ree suldad nëtëë ree bén zojbloj niz Galilea.

²²Dxel guyu xiꞌn Herodías lod cayajc lanij guin zianz bayaꞌm. Abiꞌ Herodes con ree xbioozaman dád bayuladx reeman ziꞌc bayaꞌm. Zeel rëb rey guin lojm: ―Gunab ni rëntzil, naj gune laan.

²³Xt badëë xtiidxaman gudëëman ni guiniabtzim, majsi garol ni rajpaman.

²⁴Dxel bariim bignabdiidx loj xniaam, rëbim: ―¿Xhie ganaaban? Badxiꞌman laan rëbaman: ―Gunab guijc Waj bén ruroobnijs bejn ree.

²⁵Laa bayugajquim lod zaꞌ rey Herodes, rëbim lojman: ―Yan gajc rënan guneel guijc Waj, bén ruroobnijs bejn ree, guneelan loj tijb pliajt.

²⁶Dád guyu naya Herodes, per mal badëëd xtiidxaman guidib loj ree bén rigaꞌ, zeel ad bileꞌt nibexuuman nudëëman ni gunabim.

²⁷Dxel gunabee Herodes tijb suldad din chicaꞌx guijc Waj.

²⁸Zianz wej suldad guin lën ladxguiib guin, gutüꞌx guijc Waj badxeꞌxan loj pliajt binëxan lojm. Dxel bayü loj xniaamin.

²⁹Chi gogbee ree xbejn Waj guial ma güjtaman, bacaꞌ reeman xcuerpaman persi biquieꞌch reeman laaman.

³⁰Chi bayejc ree xi apóstoles Jesús, be reeman diidx lojman gra ni been reeman në ni balüü reeman.

³¹Dxel rëb Jesús loj reeman: ―Gol guda, yoꞌ dunujz ree niz lod achut bejn zojb din yaziiladx ree taꞌn. Rëbaman zian guial dád zien ree bén zia zien tëë ree bén zëëd, xt niꞌqui guial gaw reeman ad rileꞌtan.

³²Dxel Jesús con ree bén na̱j ree apóstoles zë reeman loj barcw tijb luar lod achut zojb.

³³Per dád zien ree bejn baguiaa guial zë reeman, abiꞌ bayünbee reeman laa reeman zeel zien ree bejn brii luguiedx guin ree ruxüün reeman, abiꞌ yalojl laa reeman bidxin lod zë Jesús con ree xbejnman.

³⁴Chi baguiajt Jesús loj barcw guin, baguiaaman bén guixiuj rigaꞌ yagaj, abiꞌ bayaman laa reeman guial zaꞌ reeman ziꞌc xiil achut rajp. Dxel guzuloj balüüman laa reeman, zien ree ni balüüman laa reeman.

³⁵Chi ma gudxe, gubig ree xbejnman, rëb reeman lojman: ―Ma gudxe yan, abiꞌ achut bejn zojb niz guie.

³⁶Güjdx loj ree bén guin din che reeman ranch ree në ree guiedx ni rigaꞌ gajxh chisii xhienin gaw reeman.

³⁷Per rëb Jesús loj reeman: ―Lëjt gol badëëd ni gaw reeman. Dxel rëb reeman lojman: ―Per zroꞌ daꞌt milia ryaadx din yoꞌ ni gaw ree bén guin, ziꞌct ni rüjn bejn gan loj tioꞌp gayuu dxej.

³⁸Abiꞌ rëb Jesús loj reeman: ―¿Bël guiadxtil caꞌdi? Gol baguiaa don. Chi baguiaa reeman, dxel rëb reeman: ―Gaay guiadxtil con zatioꞌp bëjl.

³⁹Dxel gunabeeman din cwe tibcwaa gaj reeman loj guixyaꞌ.

⁴⁰Zianz gurej reeman zian, yuꞌ lod gure tibgayuu reeman, yuꞌ lod gure tüꞌpchii reeman.