San Marcw 5:6-25

⁶Zijtri baguiaax Jesús, baxüünx bigchaaglojx laaman abiꞌ bazuxibix lojman.

⁷Zianz guneex rejs rëbix: ―¿Xhie rënl con naj Jesús, Xiꞌn Dios yuꞌ xanyabaa? Rniaaban lojl ad gusagzil naj.

⁸Rëbix zian, guial cayëb Jesús lojx: ―¡Xindxab, barii luxdoo xin guin!

⁹Dxel gunabdiidx Jesús lojx rëbaman: ―¿Chu lal? Badxiꞌxan rëbix: ―Legión lan din zien nayajcan.

¹⁰Abiꞌ rëbix lojman chitëë guixhiaalaman xindxab guin ree lood ren.

¹¹Abiꞌ gajxh yagaj rigaꞌ zien ree cüch cayaw reeb.

¹²Zianz rëb ree xindxab guin loj Jesús: ―Guxhaal dunujn lod zaꞌ ree cüch guin din yadxuꞌn lën reeb.

¹³Dxel cwëjb Jesús barii ree xindxab guin luxdoo xin guin persi bayu reex lën ree cüch guin. Cost tioꞌp mil na̱j reeb. Dxel guzuloj cuxüün reeb, zianz bitidyaꞌ reeb roꞌ balaꞌ xt lojnijs, lod guꞌ reeb nijs zianz güjt reeb.

¹⁴Guiáad ree bén cayajp laa reeb, baxüün reeman bicojn reeman luguiedx në ree dajn abiꞌ zien ree bejn wej biquiaa ni goc.

¹⁵Chi bidxin reeman lod zaꞌ Jesús, baguiaa reeman xin barii xindxab guin ree luxdoo, zojbix najcw xabix, ma badëdguienx. Abiꞌ bidxeb reeman.

¹⁶Guiáad ree bén baguiaa gra ni goc con xin guin, në con ree cüch guin, be reeman diidx loj ree bén bidxin.

¹⁷Dxel guzuloj rëb reeman loj Jesús din yazaman niz ladx reeman.

¹⁸Chi bayu Jesús loj barcw guin, naguiejn rüjn xin barii xindxab guin ree luxdoo din chinalix laaman.

¹⁹Per ad cwëjbt Jesús, rëbaman: ―Baguiaj lidxil, bignaj xfamilil, biguie diidx loj reeman gra ni ma been Dios por lüj, xhie tëë naag bayaman lüj.

²⁰Dxel ziax, guzuloj rëbix loj ree bén zojb niz Decápolis gra ni been Dios por laax, abiꞌ graczi reeman badxaloj.

²¹Chi badxin Jesús loj barcw stiblad roꞌ nijs guin, dád zien ree bejn bidoꞌp, persi roꞌzi nijs guin bayaꞌnman.

²²Dxel bidxin tijb bén rniabee lën tijb xyadoo ree bén Israel, laman Jairo. Chi baguiaaman Jesús, bazuxibaman lojman,

²³abiꞌ guzajcaman laaman liaadx, rëbaman: ―Ma cayëjt da xiꞌnan. Yoꞌsii din gudxiib yaal guijquim din yayajquim din guibanm.

²⁴Zinët Jesús bén guin, dád zien bejn zinal laaman xt rixaꞌt reeman laaman.

²⁵Loj graczi reeman noꞌch tijb béngunaa, ma gojc chiptioꞌp ijz ragxuuman ryajbaman rejn.