San Marcos 4:24-39

²⁴Gazeꞌ nu na gaꞌm: ―Orzeꞌ nap bduꞌ cuen der de riidz nu reñ ru nim, gun dub gal nu ricy yac der de riidz zeꞌ, dub ñi gyet lag zir ru cuen.

²⁵Gun yu nu ricy yac de riidz zeꞌ nay gal na tub mbecy nu ricy cup la coz. Yu nu ricy cup sheñ, sheñ zir gad niy. Zeꞌ yu nu sac ni, gashtal coz miiñ nu ricy cup yu gruuñ niy ―nam.

²⁶Orzeꞌ naꞌm: ―Gyel gubier ni Ñgyoozh rac ñi gal nu rac nu tub mbecy nu rnuuz mbigy. Mbecy rza nuuz yu mbigy zeꞌ.

²⁷Orzeꞌ raas yu. Or zaꞌ yu yeshtey. Lat nu zaab za la dzi niy, mbigy zeꞌ driib ñi. Gazeꞌ nu raly ñi. Nunu wagad lagy yu lac mod driib ñi nunu ni lac mod raly ñi.

²⁸Gun ub la yu ricy ñi nu driib mbigy zeꞌ. Orzeꞌ nu loga la raly tub gyizh. Orzeꞌ gazeꞌ nu daꞌ zaꞌ niñ. Orzeꞌ lat zeꞌ raly de mbigy nu daꞌ nañ gyez zeꞌ.

²⁹Orzeꞌ ornu bi gul de mbigy zeꞌ, lueg la shiꞌñ yuñ gun bi pshuub dzi nu dudeꞌñ. Niꞌ ziꞌl mod rac nu gyel gubier ni Ñgyoozh ―nam.

³⁰Gazeꞌ nu na gaꞌm: ―¿La ñuu coz nu rac gal nu rac nu gyel gubier ni Ñgyoozh? ¿La ñuu coz saapa̱ nu gyel gubier nim?

³¹Gyel gubier ni Ñgyoozh rac ñi gal nu rac nu tub mbigy ya urnishtas. Ornu rdunuuz ñi, miiñ zir ñi par dela mbigy nu yuꞌ gyishlombecy.

³²Tees ornu dunuuz ñi, orzeꞌ raly ñi. Orzeꞌ zily zir ñi yac ñi gazeꞌ deꞌ zir yag miꞌ. She rgyich yaañ mas gal de chigyiñ rzaa ma teez ma lat gaꞌl nu rbic de yaañ zeꞌ. Ni mod rac nu gyel gubier ni Ñgyoozh ―nam.

³³Zañ riidz tiily nu na gal nu na de ndeꞌ mniim. Ni mod blyuum de riidz ni gyel gubier ni Ñgyoozh ni dey. Dub gal mod nu gac gyet lag dey cuen, dub ni mniim lo dey.

³⁴Tees wanniim lo dey benu walab nu de riidz tiily zeꞌ. Nunu ornu ub zim nu de yu nu rsyaꞌ lom, orzeꞌ pshaal mi dela riidz zeꞌ lo dey.

³⁵Laab dzi zeꞌ, or becheñ, orzeꞌ Jesuuz nam rab mi dey: ―Yaa der chan gal naa tub laꞌ gaꞌ dzu ruꞌ nisyudoo ―nam.

³⁶Orzeꞌ bzeeñ dey dela mbecy zigy, za nu dey Jesuuz laab nañ barc nu bi rim zeꞌ. Nunu za gaꞌ reñaꞌ barc zeꞌ nu za barc nu rim zeꞌ.

³⁷Tees lat nu za dey zeꞌ, sij la bruꞌña tub gyey bi ily. Orzeꞌ de nguuly lo nisyudoo rzuꞌñ nañ barc zeꞌ se nu dzaa ziꞌl ñi.

³⁸Zeꞌ Jesuuz mbish mi nas mi par iiñ barc zeꞌ lo tub almad. Gazeꞌ nu pcueeñ dey mi. Orzeꞌ na dey rab yum: ―¡Masht! ¿A se la la nu ricy ñi nir nu nit lo den lo nis? ―na dey.

³⁹Gazeꞌ nu weshtem nunu bicy mi mandaar lo bi. Orzeꞌ nam rab mi nisyudoo: ―¡Guri! ―nam. Orzeꞌ guri bi nunu se ri zu la byac.