San Lucas 9:42-51

⁴²Pashpara amtuasmin, salizne ussa nainnin kit tɨnta ulninta. Jesúsne salizta parat kit pashparas puzninta. Jesúsne pashpara kakulnin kit paiña papihshta chɨhkara.

⁴³Wanne Dios wat kirɨt akwa iztaspaarɨt. Jesús chiwazha kirɨt akwa, wanne iztaspaarɨt. Suasne usne kammuruza ka kaiznara:

⁴⁴—An pit wat mɨrain. Mɨnpazha nawa aanazi, Ampu namtɨtmikara pizanapa, katsa mikwara chɨhkanapa.

⁴⁵Kammuruzne Jesús kaizta aizpa piankamarachi. Diosne usparuza sun pit piankamninnarachi. Ishkuara akwa, uspane Jesús kaizta aizpa mɨmaarachi, an piankamana.

⁴⁶Paiña kammuruzne usparuzpain ka mɨaamɨzta: ¿Mɨnma an tɨnta i? kizara.

⁴⁷Jesúsne uspa minta aizpa nɨjkul kit pashpara tain kit us tukin kunnin kit

⁴⁸usparuza ka kaiznara: —Une we tɨntaruza an pashpakana sap kit kiwaintawa. We tɨntaruza na akwa kiwaintumikane nawa sap kit kiwaintu. Nawa saptumikane ap Taittara, nawa ɨnintamikasha saptɨnazi. Katmizna uruzpain an we tɨntamikane an tɨnta namtɨnazi.

⁴⁹Suasne Juanne ussa kaizta: —Kamtam. Aune saliz puzninmikasha iztamakpas. Us nua paikukane, usne saliztuza puzninnamtu, us tɨnta ɨnim mɨj akwa. Us aukanain nua kanpamtuchi akwa, aune ussa “Jesústa paikumun, saliztuza puzninnanapa,” kiztamakpas.

⁵⁰Jesúsne ussa kaizta: —Sunkana kaizmun. Aukasa aliz chimikane aumɨza kiwainnamtu.

⁵¹Chiyura nuna kasha pakane, Jesúsne Jerusalén pɨpulumal ɨn min kit ɨmɨzta.