San Lucas 8:39-54

³⁹—Quia tiajinia quia quiaarohua. Quia pueya niquiara quia pohuatasuhua taa Pueyaso miirii maninia quiajaniyani. Pueyanoori quiaarohua. Puetunu na tiacajiniajanaa pohuatasuhuari taa Jesu miiriucuaa maninia nojuajani.

⁴⁰Jesu jaara niuutiaquiaariuhua caminia taquijiria na pueyata, pueyari na timitiarohua na tiuquishacariuhua. Puetunu nojorijianaari na sashiriquiaa.

⁴¹Jiyacaritij, tamonu pueyanoori Jesuucua tiuquishii. Na sesaari quijia Jairo. Nojuajaari Pueyaso secojojua tia jiyaniijia quiquiaari cuno tiacajinia. Jesu cariquimiaji mojoquetaseeri na secojonura na tiajinia Jesu quianura.

⁴²Neyatuniyojuaari quera cusoriquiaa jiyacari. Majaari socua niquiohuaraca na quiniu quijia. Doce marijiaari tari shocojoquiaari cuno neyatu. Jesu quiasacari Jairota, jiyanohua queraatia pueyari nata quiojoriquiaajuhuaj. Pueyari jiyanohua na tanuujuriquiaa, nata nojori quiojosacari nucuaco.

⁴³Tamonu maaji cusosuuri cuno pueya tajinia quiriquiaajuhuaj. Doce marijiaari tari na shocojoquiaari pueyaracaanu na naatesacari. Cuno maajiiri puetunu na cumaneeca puecaquiaarijianaa najuhuanaj, na naarajosaanura juucua. Naarajonaari maja na naata na naataniniu quiquiaari.

⁴⁴Maaji cusosuuri Jesu nijiniji catecanoquiaari nocua. Na tucuaque toque casaca quiasee jiyasohuari. ¡Na nanacaari ritia curetaquee!

⁴⁵Jiyacaritij, Jesuuri pueya nequesotaree: —¿Cante cua quiareeni? Puetunu na shocuaqueya pueyajanaari sequeree: —Maja canaa quianu quirii quiajaniya. Pedroori Jesu sequeree: —Niishitiojonanaa, ¿majateeri quia niquiniucuaja? Queraatia pueyacuajaari quia tanuujiya.

⁴⁶Jesuuri saaja sequeree: —Maja. Cusosu cua quiareeni. Niishiyanijia cua cumaacaari tari na naatanirii.

⁴⁷Maaji niishishacari na miishano jiyasohuaja tari niishishaaree, Jesuucua nimiaari. Na puerenuta tetecariquiaari. Jesu cariquimiaji mojoquetaseeri. Puetunu pueya niquiarajanaa pohuatareeri casaara Jesu na quiareeni. Pohuatareejaariuhuaj taa na naataquee ritiani, Jesu na quiasacari.

⁴⁸Jesuuri na sequeree: —Sanaunaa, cucua quia tiuuniuucua, quiaari naatarohua. Quioojia quia cajitiriohua. Juhuajaniya quia quiaarohua.

⁴⁹Jesu pocoojosacarijia cuno maajitia, tamonu pueyanoori tiuquiquiaari Jairo tiajiniji. Jairo sequeseeri: —¡Quia niyatu tari cusoquee! Maja najuhuana riniu paniniu Niishitiojona quia tiajiniara.

⁵⁰Jesu tojishacari cuno pueyano sequesano, Jairo sequereeri: —Maja puerenu. Cucua quia tiuuri saaja. Quia niyatucuaja naatanutaniuhua.

⁵¹Jesu tiuquishacari Jairo tiajinia, nojuajaari maja na shanacunu quirii quenaaja tamonu pueyano tiuquiniuria macuucua. Saaja nata tiuquitiamaa cutaraari Pedro, Santiago, Juan, maaji samiriu que, na nucuanio.

⁵²Puetunu tii quiniaa pueyajanaari maaji samiriuucua nujuqueturiquiaa. Sapiyonuuriquiaajaariuhuaj. Jesuuri nojori sequeree: —Maja najuhuana nia nujuquenu. Maaji samiriu maja macu, nareja maqueyano.

⁵³Naa Jesu sequesacaritij, pueyari na saroojotaree saaja. Nojoricuajaari niishiriquiaa maaji samiriuuri seetanujuanaa macu quiriquiaa.

⁵⁴Jiyacaritij, Jesuuri macuucua tiuquiquii. Na juaashiquiajiniji na quiaseeri. Jiyanohua na sequereeri: —Maaji samiriuniaa, ¡quia sanere!