San Lucas 2:9-29

⁹Aan kolpsye lëë tu xangly Dios ptsiñ lo xaa ni lëë xbini Dios bibëly lo xaa aan tir ptsyeb xaa.

¹⁰Per lëë angly chëb: —Ktsyebty to, por tiits nii kuuñ kle styoo do ni styoo kchësy meñ syelynin.

¹¹Lëë xaa nii këmbës to kiid kteelaa lëë do koly leñ xkyedzy David natse. Lëë xaa nak Crist nii xñabey.

¹²Tsiñee kan do tu mëëd yeeñ nii nchal ladx nix laañee xkyëtuu ma, lëë do kyeñ nii nli tiits nii niyaa lo do.

¹³Aan misme wor go lëë tub yox angly byety kpaa par ktee angly skizh lo Dios xñee angly:

¹⁴¡Skizh Dios nii sob kpaa! ¡Xtee xaa xkyalnsaak xaa lo kchë meñ nii xleni xaa lo kislyu!

¹⁵Loxsye byëp angly kpaa, lëë xaa nii xkyënap mëkwxiily chëb lo xcombañer: —Kol tsoo leñ kyedzy Belén tsiin tyon noo nii biidnë Dios lo no.

¹⁶Lëënlëdy lëë xaa si aan tsiñee ptsiñ xaa, lëë xaa kon Mariy ni José ni lëë xaa kon mëëd yeeñ nii nix laañee xkyëtuu ma.

¹⁷Lëë xaa bitiits nii lëë angly kukëb lo xaa cho nak mëëd nii koly.

¹⁸Aan kchësy meñ psee biñ nii bitiits xaa nii xkyënap mëkwxiily.

¹⁹Per lëë Mariy iip bnitylasty Mariy kchë ngo, tugak kwyow styoo me.

²⁰Lëë xaa nii xkyënap mëkwxiily bi aan lëë xaa ptee skizh lo Dios porñee kon xaa ni biñ xaa kchë nii chëb angly lo xaa.

²¹Tse nii ptsiil mëëd xmal, lëë mëëd kwyobey, aan lëë mëëd pcholë Jesús, por destye worñee karty kak xiñ Mariy, lëë angly chëb xa kcholë mëëd.

²²Tsiñee lëë Mariy kwte lo kyalsyañ sinak xñabey xley Moisés, lëë me kwey Jerusalén par tsini me Jesús leñ lidzy Dios.

²³Por leñ kitsy nii kë xley Dios xñee nii kchësy mëëdpkiy klo jkab lo Dios.

²⁴Lëë me kuksakon nii xñabey xley Dios. Lëë ley xñee nii schilo kokon meñ chop ngog o chop kaa palom lo Dios.

²⁵Tiemp ko kwyo tu xaa nii pcholë Simeón leñ kyedzy Jerusalén. Buen xaa ni psoob xaa xtiits Dios ni kwëmbës kaa xaa nii lëë Dios kteelaa meñ Israel. Kokni Kyalbini Ntson xaa.

²⁶Lëë Kyalbini Ntson chëb nii kejty xaa deelñee kandy xaa kiid Crist.

²⁷Lëë Kyalbini Ntson pxaal Simeón lidzy Dios, aan tsiñee lëë José ni Mariy ptsiñni Jesús par kuuñtsyey xaa nii xñabey ley,

²⁸lëë Simeón kwteetsy Jesús aan lëë xaa ptee skizh lo Dios chëb xaa:

²⁹Blaa na, Tat Tios, ketyaa, por lëën kon nii lëël beeñ cumplir xtiitsoo,