SAN LUCAS 24:8-30

⁸ꞌBa kio jaꞌetsjenre yanchjinbiu mé= xi kitsu Jesús.

⁹ꞌBa kionga je jaꞌeni tsju yeꞌere nijmi ngayéje kibi xutare xi tejngu ko ngatsiꞌi xuta xi yakꞌa.

¹⁰María Magdalena ko Juana ko María xi nare Santiago ꞌba ko yanchjin xi yakꞌa xi tjenko, kui xi jaꞌekeꞌere nijmi nchja chinga apóstol.

¹¹Tunga nchja chinga apóstol tu kjuaska kuánre en xi inyabeꞌere nijmi yanchjinbiu, ꞌba bi kuakjainre.

¹²Tunga Pedro tsisetjen ꞌba tsangatsanga nga kiji tsju. ꞌBa kionga kiskutsejenya tsju, tu najñu xi kisꞌextejun yojore= tsabe. ꞌBa jendiba ngani ndaba nga tjimakun=re mé= xi kuán.

¹³ꞌBa ndekuini nixtjinbiu jó xutare Jesús inyafi naxinanda chi xi Emaús ꞌmi, naxinanda xi tejnguru kilómetro mare naxinanda Jerusalén.

¹⁴ꞌBa nga inyafi, inyafako nijmi xinkjin ngatꞌare ngayéje xi kuán.

¹⁵ꞌBa yejerañu inyafo nijmi, ndekui fani Jesús kitsitiñatꞌare ꞌba ñatjen kijiko ngaya ndiyo.

¹⁶Tunga nchjabiu bi be ꞌyá= ni kui, ngatꞌa Naꞌenchana ꞌechjaꞌndere nga skuexkun.

¹⁷ꞌBa Jesús tsiningiyare: —¿Mé= xi techuba nijmiko xingiu nga temangiun ndiyo? ꞌBa nchjabiu ba tjinre nga tsikinyaꞌñu.

¹⁸ꞌBa kio xuta xi Cleofas ꞌmi kitsure: —¿A tu ji sani xi jaꞌekitjajme naxinanda Jerusalén xi bi be mé= xi kuán saꞌe fa tiña ngandaꞌe?

¹⁹ꞌBa Jesús tsiningiyare: —¿Mé= xi kuán? ꞌBa nchjabiu kitsure: —Ngatꞌare xi kuataꞌen Jesús tseꞌe Nazaret. Kui xi kuán jngu profeta xi kitsaꞌen kjuakun yaꞌe, ꞌba ko en xi kisꞌere kjuaꞌñu yakuya ngixkun Naꞌenchana ko ngatsiꞌi xutankjiun.

²⁰Tunga xi ngakure naꞌmiu ko xutaxa ni kitsingantsja, tuxi kjuinikꞌenni, ꞌba kisꞌetꞌa kru.

²¹ꞌBa ji̱n kjinikjaꞌetsjee̱n tsakaiñu nga kui= xi sindai naxinanda Israel. Tunga je kuaján nixtjin nga ꞌba kuán.

²²ꞌBa nde yakꞌa yanchjin xi tjin ngajinni̱ kaminyakunni̱. Ngu saꞌe tajña kafi tsju,

²³tunga bi kamasjaire yojore Jesús. ꞌBa kafaꞌetsuni nga ankjele kamatsejenre ꞌba nga kui katsure nga tijñakun Jesús.

²⁴ꞌBa jaskan yakꞌa nchja xi tjin ngajinni̱ ꞌba nde kafi tsju ꞌba ꞌba fa tsaꞌen kabe jofa katsu yanchjinbiu, tunga bi kabe Jesús.

²⁵ꞌBa Jesús kitsure: —¡Á chikunñu ꞌba taja koni inimanu nga bi nda makjainnu ngayéje xi kitsu nchja chinga profeta!

²⁶¿A bi tjinnere nga kjuaꞌaxtiu kjuanima xi Cristo ꞌmi, kionga kje sa̱kujínre kjuajere?

²⁷ꞌBa saꞌe Jesús kitsuyare nchjabiu jó tsunire ngayéje xujun enre Naꞌenchana nga tinchja ngatꞌare kui. ꞌEtutsꞌinnire xujun xi kitsiꞌindu Moisés kaꞌnda nga kitsikjetꞌa ngayéje xujun xi kitsiꞌindu nchja chinga profeta.

²⁸ꞌBa kionga je kuatiñare naxinanda chi ña inyafi nchjabiu, Jesús kitsaꞌen joni tsa kuaje ndiya.

²⁹Tunga nchjabiu ꞌenere nga kꞌuejñako, ꞌba kitsure: —Tenikonii̱ ngaꞌe, ngatꞌa je kuangixun ꞌba je tjimaꞌña. Kui kjua Jesús kikoni, ꞌba tsikꞌejñako nchjabiu.

³⁰ꞌBa kionga je tjindutꞌa yamixo, Jesús kiskjebe niñuxtilo ꞌba kitsjare kjuanda Naꞌenchana. ꞌBa yakjanya ꞌba kitsjare nchjabiu.