SAN LUCAS 23:41-52

⁴¹Tehhuanten matechtlapanoltican tleca tictlaxtlahuasque in tlen melahuac totlahtlacol oticchiuque. Huan inin tlacatl ahmo quichiutoc in tlen ahmo cuali.

⁴²Oncan oteiluic: ―Jesús, xinechilnamiquis huan noca xitlocoya ihcuac ahxihuas tenahuac in tetlatequiutilistzin.

⁴³In Jesús omonanquilic: ―Ic nele nimitziluiya, de axan nohuan tiyes nepa neluicac.

⁴⁴Cana nepantla otlayohuac ipan nochin tlali huan ohuehcau hasta cana yiyi horahtiotlac.

⁴⁵In tonaltzintli otliliu huan in tatapahtli tlen ic quitlahcoxelohtoque in tiopantli otzomon inepanco.

⁴⁶Oncan Jesús otzahtzihuac: ―Nohueyitahtzin, temajco nictemactis notonal. Huan ic omihto inon, omicohuac.

⁴⁷Ihcuac in tlayecanqui oquitac in tlen opanoc, otemahuestili in Dios huan oquihto: ―Ic nele inin tlacatl tlamelajcan.

⁴⁸Nochin tlacatl aquin ompa ocatcahque huan oquitaque tlen opanoc, yehhuan oyahque nochten moyoluitectihue ica intlocol.

⁴⁹Huan nochten in aquin oteixmatiyayahque in Jesús, huan noyojqui in sihuamen aquin otecuitlapanuiyayahque den Galilea, otlachixticatcahque huehca ica tlen opanoc.

⁵⁰Ocatca se tlacatl tlamelajcan itoca José den altepetl Arimatea den tlali Judea. Inon se tequihua den hueyixtoque judeahtecos.

⁵¹Inin José oquichiyayaya in tetlatequiutilistzin Dios huan ahmo omosetili inuan in tequihuahmen ica tlen oquichiuque.

⁵²In José oya quita in Pilato huan oquitlahtlanili in tetlacayo in Jesús.