San Lucas 22:8-67

⁸Jesús qui³si³ca³sen¹ Pedro cao⁴ Juan, qui³tso²-le⁴: Ta⁴nquion¹³, tˀe²ntao³ tˀa³tsan⁴² pa²xco⁴, jme¹-ni³ nca³ coi⁴chi³-si¹nia¹.

⁹Je² qui³tso²-le⁴: Jña¹-ni³ nca³ me³-li² nca³ cˀoe¹ntai³⁴-jin⁴.

¹⁰Jesús qui³tso²-le⁴: Coe⁴-ni³ cˀia⁴ nca³ coi⁴tja¹sˀaon³ ya⁴ na⁴xi⁴na³nta¹-ve⁴, sa⁴te¹jion³ jnco³ cho⁴ta⁴xˀin⁴ xi³ yˀa³ jnco³ ni³sa³na³nta¹, tain¹tjen⁴nqui³-lao⁴³ sa³ˀnta³ ni³ˀya³ jña³ cjoa⁴ˀa³sˀen³.

¹¹Cˀoa⁴tˀin²-lao⁴³ je² xi³ tsˀe⁴ ntˀia³: Maestro xo⁴ tso²-li²: Jña¹ ti¹jna³ je² cuarto jña³ nca³ coa²cjen⁴ cao⁴ cho⁴ta⁴-na⁴ je² pa²xco⁴.

¹²Cˀia⁴ je² coa⁴co²-no³ jnco³ cuarto xi³ je³, xi³ ti¹jna³ son²ncˀa³, xi³ je³chon³nta³. Tˀe²yo³ntao³ ya⁴-ve⁴.

¹³Qui³ tso²cˀoa⁴, coan³sjai³-le⁴ jo³ qui³tso²-le⁴, tsa³cˀe¹nta³ je² pa²xco⁴-ve⁴.

¹⁴Cˀia⁴ nca³ ji³cho²ca³ hora, Jesús tsa³cˀe²jna³tˀa³ ya¹mi²xa⁴, cˀoa⁴ cao⁴ pa²stro⁴.

¹⁵Qui³tso²-le⁴: Cjai¹nca³ to⁴nˀion¹ tse³ coan³me³-na³ nca³ coa²cjen⁴cao⁴-no³ je² pa²xco⁴-vi⁴ to⁴nqui³-le⁴ni³ nca³ cjoa³ˀa³ cjoa⁴ñˀain³.

¹⁶Cˀoa⁴xin³-no³ nca³ tsi² tsa² ti⁴squi²ne⁴-sa³nia³ pa²xco⁴ sa³ˀnta³ nca³ coi⁴tjo³son² ya⁴ cjoa⁴te¹xo³ma³-le⁴ Ni³na¹.

¹⁷Qui³scoe¹ jnco³ cho⁴tsin¹, qui³tsjoa³ cjoa⁴nta³, qui³tso²: Chjoao¹³ je²-vi⁴, cˀoa⁴ ti⁴cˀa³vi¹jin³-lao⁴³ xi²nquio⁴³.

¹⁸Cˀoa⁴xin³-no³ nca³ li²coi³ ti⁴scˀoi⁴-sa³nia³ je² na³nta¹to³tse⁴²-ve⁴ sa³ˀnta³ nca³ cjoa⁴ˀai¹ cjoa⁴te¹xo³ma³-le⁴ Ni³na¹.

¹⁹Qui³scoe¹ nio⁴xti²la⁴, qui³tsjoa³ cjoa⁴nta³, qui³si³xcoa⁴, qui³tsjoa³-le⁴ cho⁴ta⁴-le⁴, qui³tso²: Je²-vi⁴ yao³-na⁴ ni¹ xi³ tsjoa³ xi³ tˀa³tsaon⁴³, cˀoa⁴tˀiaon⁴³ coi³-vi⁴ jme¹-ni³ nca³ nta³ cˀoe¹jin³ta³con²-si¹ni³nao¹³.

²⁰Cˀia⁴ nca³ je³tsa³cjen², cˀoa⁴-ti⁴sˀin² qui³sˀin³ cao⁴ je² cho⁴tsin¹, qui³tso²: Je² cho⁴tsin¹-vi⁴ je² ni¹ xi³ cjoa⁴cho⁴tse⁴ xi³ vˀe³nta³coa⁴ cao⁴ njin¹-na⁴ xi³ xi¹jten⁴ tˀa³tsaon⁴³.

²¹To⁴nca³, coe⁴-ni³, ntsja³ je² xi³ cˀoe⁴²tˀain³ na⁴jmi¹ xi³ tˀa³tsˀan⁴, i⁴ ti¹jna³tˀa³cao⁴-na³ ya¹mi²xa⁴-vi⁴.

²²Xi³ cjoa⁴qui²xi⁴ je² ˀnti¹-le⁴ cho⁴ta⁴ coai⁴ jo³-sˀin² nca³ to⁴nqui³-ni³ xa¹ tji¹nta³-ni³, to⁴nca³ ma⁴-xo¹ni³ je² cho⁴ta⁴-ve⁴ xi³ cˀoe⁴²tˀain³ na⁴jmi¹ xi³ tˀa³tsˀe⁴.

²³Cˀia⁴ nca³tsˀi³ cho⁴ta⁴-le⁴ tsa³cˀe¹tsˀia⁴cao⁴ nca³ qui³tsi²na³nqui³-le⁴ xi¹ncjin¹ jña³-le⁴ xi³ cˀoa⁴sˀin⁴² je²-vi⁴.

²⁴Cˀoa⁴coan³ nca³ tsa³cjao¹ti³ya³-ni³ ˀya³-ni³ xi³ ti⁴je²-ni³ xi³ coa⁴sen⁴jna³ ti¹tjon².

²⁵Cˀia⁴ Jesús qui³tso²-le⁴: Je² cho⁴ta⁴ti¹tjon²-le⁴ cho⁴ta⁴ xi³ li² judío-jin² si¹cˀe¹yo³nqui³ cho⁴ta⁴-le⁴ tˀa³tsˀe⁴ cjoa⁴te¹xo³ma³-le⁴, cˀoa⁴ je² xi³ va³te¹xo³ma³-le⁴, je² ni¹ xi³ cho⁴ta⁴nta³ cˀoa⁴ˀmi²-le⁴.

²⁶To⁴nca³ jon²-vi⁴ a³li² coi³-jion²³, to⁴sa³ je² xi³ ti¹tjon² jin³-no³, ca²ta³ma³ jo³-ni³ tsa² je² xi³ ma³ˀnti¹. Cˀoa⁴ je² xi³ cho⁴ta⁴ti¹tjon², ca²ta³ma³ jo³-ni³ tsa² je² xi³ si¹xa¹.

²⁷Jña¹-le⁴ xi³ ti¹tjon²-ˀni³, a³ je² xi³ vˀe²jna³tˀa³ ya¹mi²xa⁴, a³xo⁴ je² xi³ vˀe¹ya³ tso³jmi². A³ tsi² tsa² je² xi³ vˀe²jna³tˀa³ ya¹mi²xa⁴-vi⁴. Cˀoa⁴ an³ nia¹³ xi³ ti²jna⁴jin³-no³vi⁴ jo³-ni³ tsa² cho⁴ta⁴ xi³ si¹xa¹-no³.

²⁸Jon² nio¹³ xi³ tsa³qui³yo³cao⁴ntsjai²-nao¹³, cˀia⁴ nca³ chˀao³ qui³cho²tˀa³-na³.

²⁹Cˀoa⁴ an³ cˀoa⁴-sˀin² tsjoa³-no³ cjoa⁴te¹xo³ma³, jo³-sˀin² nca³ qui³tsjoa³-na³ Nˀai³-na⁴,

³⁰jme¹-ni³ nca³ coi⁴chi³-si¹nio³, sˀio⁴-si¹nio³ tˀa³ ya¹mi²xa⁴-na⁴, ya⁴ jña³ va³te³xo³ma²³, cˀoa⁴ coi⁴yo³son²-si¹nio³ ya¹xi²le⁴, cˀoa⁴ si⁴²coi²ntao⁴³ xi³ te³jao² ntje⁴-le⁴ Israel.

³¹Cˀoa⁴-ti⁴ qui³tso² je² Nai³-na¹: Simón, Simón, coe⁴-ni³, Satanás qui³si³je¹-no³ nca³ si⁴²tsje³-no³ jo³-ni³ tsa² trigo xi³ sˀe⁴tsao³jne³nqui³.

³²To⁴nca³ an³ tsa³cˀe³tsˀoa²ntjai²-le²³, jme¹-ni³ nca³ tsi² tsa² ntia³² cha⁴ xi³ ma³cjain¹-li², cˀoa⁴ ji³, cˀia⁴ nca³ cjoe⁴cˀo¹fa³ya³-ni³, ti⁴nˀioin¹³-con³ ntsˀai³.

³³Cˀia⁴ Pedro qui³tso²-le⁴: Señor, ti²jna⁴nta³-nia¹³ nca³ cjoi¹cao⁴-le²³ nta³ tsa² nto⁴ya¹, nta³ tsa² cjoa⁴vi³ya³.

³⁴Cˀia⁴ Jesús qui³tso²: Pedro, cˀoa⁴xin³-le²³ nca³ li²coi³ squi¹ˀntia¹ cha¹xi³cha¹ ntˀai⁴-vi⁴ sa³ˀnta³ ji³ jan² cˀa³ coi⁴jna³ˀma³cao⁴-nai¹³ nca³ tsi² coi³ ˀya³xcon³-nai¹³.

³⁵Cˀia⁴ Jesús qui³tso²-le⁴: Cˀia⁴ nca³ an³ qui³si³ca³sen¹-no³, a³li² cao⁴ xi³jtsa³taon⁴-jin², ni⁴ cao⁴ na⁴ˀya³-jin², ni⁴ cao⁴ jte¹-jin², a³ tjin¹ xi³ cha³-no³. Cˀoa⁴ je² qui³tso²: Ni⁴jme³-jin².

³⁶Cˀoa⁴ qui³tso²-le⁴: To⁴nca³ ntˀai⁴-vi⁴ je² xi³ tjin¹-le⁴ xi³jtsa³taon⁴, ca²ta³cjoe¹, cˀoa⁴-ti⁴ je² xi³ tjin¹-le⁴ na⁴ˀya³, ca²ta³cjoe¹. Je² xi³ tsin²-le⁴ qui⁴cha⁴nto³-le⁴, ca²ta³te¹na³ tso⁴nca⁴-le⁴, ca²ta³tse³.

³⁷Coi³ cˀoa⁴xin³-no³, je² xi³ tji¹tˀa³ xon⁴-ve⁴ ma³chjen¹-ni¹ nca³ coi⁴tjo³son²-sa³ tˀa³tsˀan⁴: Tsˀa³xqui⁴cao⁴ cao⁴ cho⁴ta⁴ xi³ tsˀa³ntjai²cjoa⁴. Nca⁴ je² xi³ qui³chji³ tˀa³tsˀan⁴ tjin¹-ni³ nca³ coi⁴tjo³son².

³⁸Cˀia⁴ je² qui³tso²-le⁴: Señor, coe⁴-ni³ jao² qui⁴cha⁴nto³. Cˀoa⁴ je² qui³tso²-le⁴: To⁴coan⁴²-ni³.

³⁹Cˀia⁴ Jesús ji³tjo³, qui³ jo³-sˀin² nca³ coan³nca³-le⁴ ya⁴ ni³nto³ Olivos, cˀoa⁴-ti⁴ cho⁴ta⁴-le⁴ qui³tjen⁴nqui³-le⁴.

⁴⁰Cˀia⁴ nca³ ji³cho² je² ˀnte³-ve⁴, qui³tso²-le⁴: Tˀe²tsˀoao³ jme¹-ni³ nca³ tsi² tsao⁴jin³-si¹nio³ je¹ cˀia⁴ nca³ chˀao³ si⁴²cao⁴-no³.

⁴¹Cˀia⁴ Jesús tsa³ca³sen²xin²-le⁴ jo³-ni³ tsa² jnco³ la⁴jao⁴ xi³ cjin³ sa³te¹, cˀoa⁴ tsa³ca³sen²xco¹nchˀin³, tsa³cˀe¹tsˀoa³.

⁴²Qui³tso²: Nˀai³, tsa² me³-li² chja⁴ˀa²xin²-nai¹³ je² cjoa⁴ñˀain³, to⁴nca³ li²coi³ jo³-sˀin² nca³ me³-na³ nca³ an³, to⁴jo³-sˀin² nca³ me³-li² nca³ ji³.

⁴³Cˀia⁴ coan³tsen³jnco³-le⁴ a²ncje⁴ xi³ tsˀe⁴ ncˀa³jmi³, xi³ qui³tsjoa³-le⁴ nca³nˀion¹.

⁴⁴Cjai¹ aon³ cji³ma³-le⁴ ni⁴ma⁴-le⁴ nqui²sa⁴ to⁴nˀion¹ tsa³cˀe¹tsˀoa³, cˀoa⁴ qui³tjo³nta¹ jo³-ni³ tsa² tse³ njin¹ xi³ ca²tin³ xi³ qui³tsao³va³ tˀa³na³nqui³.

⁴⁵Cˀia⁴ nca³ tsa³qui³so¹tjen⁴-ni³ nca³ ti¹vˀe¹tsˀoa³, ja³ˀai³con³-le⁴ cho⁴ta⁴-le⁴, coan³sjai³-le⁴ nca³ cjio³fe² tˀa³tsˀe⁴ cjoa⁴fao¹-le⁴.

⁴⁶Qui³tso²-le⁴: A¹-ni³ ti³yo³fe²-si¹nio³. Ti⁴so²tjaon⁴³, tˀe²tsˀoao³ jme¹-ni³ nca³ tsi² tsao⁴jion³ je¹ cˀia⁴ nca³ chˀao³ si⁴²cao⁴-no³.

⁴⁷Cˀia⁴ nca³ to⁴jo³ ti¹nchja⁴-sa³ Jesús, coe⁴-ni³ ja³ˀai³ cho⁴ta⁴ncjin², cˀoa⁴ je² xi³ Judas ˀmi², jnco³ xi³ te³jao²-ve⁴, tjen⁴ti¹tjon²-le⁴ nca³ je². Ji³cho²nčhˀoe² Jesús nca³ cˀoe⁴²ntso³ˀa².

⁴⁸Cˀia⁴ Jesús qui³tso²-le⁴: Judas, a³ je² cjoa⁴vˀe²ntso³ˀa²-vi⁴ cha³ni²tˀa³-ni³ je² ˀnti¹-le⁴ cho⁴ta⁴.

⁴⁹Je² xi³ tjio¹cao⁴ Jesús, cˀia⁴ nca³ tsa³ve³ jme³ xi³ coan⁴-ve⁴, qui³tso²-le⁴: Señor, a³ si⁴qui²ˀaon³-ni¹⁴jin⁴ cao⁴ qui⁴cha⁴nto³.

⁵⁰Cˀia⁴ jnco³ cho⁴ta⁴-le⁴ qui³si³qui²ˀaon³ jnco³ cho⁴ˀnta³-le⁴ na⁴ˀmi³ti¹tjon², tsa³ca³te³tˀa³ xo⁴ño³ nca³qui²xi⁴.

⁵¹Cˀia⁴ Jesús qui³tso²: Ti⁴cˀe¹jnao³ to⁴ˀi⁴² tjen⁴-vi⁴, cˀia⁴ qui³si³cao⁴ xo⁴ño³, qui³si³nta³-ni³.

⁵²Jesús qui³tso²-le je² cho⁴ta⁴ti¹tjon²-le⁴ na⁴ˀmi³ cao⁴ cho⁴ta⁴ xi³ nca³jco⁴-le⁴ cho⁴ta⁴ xi³ si¹coi²nta⁴ yo⁴nco⁴ cao⁴ cho⁴ta⁴jchi¹nca³ xi³ ji³nčhoa³con³-le⁴: A³ tˀa³tsˀe⁴ jnco³ che¹ ca²vi²tjo⁴cao⁴³ qui⁴cha⁴nto³ cao⁴ ya¹.

⁵³Ya⁴ tsa³ca²te⁴jna³cao⁴-no³ ni⁴čhjin³ nca³ nchaon³ ya⁴ya³ yo⁴nco⁴, a³li²coi³ qui³cho²mi³tjaon⁴³ ntsao⁴³ nca³ qui³nto³va³-nao¹³, to⁴nca³ je²-vi⁴ tsaon⁴³ hora, cˀoa⁴ tsˀe⁴ cjoa⁴te¹xo³ma³-le⁴ cjoa⁴njion².

⁵⁴Cˀia⁴ qui³tsoa³, qui³cao⁴, qui³sca³ni¹sˀen³ ya⁴³ ntˀia³-le⁴ na⁴ˀmi³ti¹tjon²-le⁴. Pedro qui³ co³tsen³tjen⁴nqui³-le⁴.

⁵⁵Cho⁴ta⁴ tsa³cˀe¹tse³ lˀi¹ ya⁴ nca³va³sen³-le⁴ nti³tsin³-ve⁴, cˀoa⁴ tsa³cˀe²yo³ntai³-le⁴ nca³tsˀi³. Cˀoa⁴-ti⁴ tsa³cˀe²jna³jin³-le⁴ Pedro.

⁵⁶Cˀia⁴ jnco³ chjon⁴² cho⁴ˀnta³ tsa³ve³ Pedro nca³ ti¹jna³ntai³ lˀi¹, qui³sco²tsen³ˀa², qui³tso²: Je² cho⁴ta⁴ xo⁴cji³-vi⁴ ya⁴ tsa³cˀe²jna³cao⁴ nca³ je².

⁵⁷To⁴nca³ Pedro tsa³cˀe²jna³ˀma³, qui³tso²: Ji³ chjon⁴², li²coi³ ˀve³xcoan³ nca³ je².

⁵⁸Xi³ ti⁴coan³ jnco³tjo²-nca¹ni³ xi³ cja⁴ˀai¹ tsa³ve³ Pedro, qui³tso²: Ji³-vi⁴ cˀoa⁴²-ti⁴ tsˀe⁴ Jesús. Cˀia⁴ Pedro qui³tso²: Ji³ xˀin⁴, a³li² an³-jian²³.

⁵⁹Jnco³-la⁴ hora scan³-ni³, nqui²jnco³ cˀoa⁴qui³tso²-nca¹ni³: Xi³ ña³qui³ cjoa⁴qui²xi⁴, cˀoa⁴-ti⁴ je²-vi⁴ ya⁴ tsa³cˀe²jna³cao⁴, nca⁴ cho⁴ta⁴ galileo ni¹.

⁶⁰Pedro qui³tso²: Ji³ xˀin⁴, li²coi³ ˀve³ jme³ xi³ si³. Nti⁴ton⁴ cˀia⁴ nca³ to⁴jo³ ti¹nchja⁴-sa³, qui³squi³ˀntia¹ cha¹xi³cha¹.

⁶¹Cˀia⁴ Nai³-na¹ qui³si³cˀo¹fa³ya³, qui³sco²tsen³-le⁴ Pedro. Cˀia⁴ Pedro ja³ˀai³tsjen³-le⁴ en¹-le⁴ Nai³-na¹, jo³ qui³tso²-le⁴: Cˀia⁴ nca³ cje³ cji³ˀntia¹-jin² cha¹xi³cha¹, coi⁴jna³ˀma³cao⁴-nai¹³ jan² cˀa³.

⁶²Cˀia⁴ Pedro ji³tjo³ nti³tsin³, a³li² to⁴cˀoa⁴²cji³ qui³squi³ˀnta¹.

⁶³Je² cho⁴ta⁴ xi³ tjio¹tsoa³nˀion¹ Jesús, tsa³qui³jno²que³, cˀoa⁴ tsa³ca¹-le⁴.

⁶⁴Tsa³ca¹jčho³ˀma³ ncjain¹, qui³si³jtsin³ˀa³, cˀoa⁴ qui³tsi²na³nqui³-le⁴: Cˀoa⁴tˀin²-na³jin⁴ ˀya¹ xi³ ca²vˀe¹-li².

⁶⁵Cˀoa⁴-ti⁴ qui³tso²-sa³le⁴, cˀoa⁴ cjai¹ ncjin² cjoa⁴ qui³nchja⁴ˀaon³-le⁴.

⁶⁶Cˀia⁴ nca³ qui³sˀe³sen¹, coan³ña³ cho⁴ta⁴jchi¹nca³ xi³ tsˀe⁴ na⁴xi⁴na³nta¹-ve⁴ cao⁴ cho⁴ta⁴ti¹tjon²-le⁴ na⁴ˀmi³ cao⁴ cho⁴ta⁴ scribano, qui³cao⁴ Jesús ya⁴ junta-le⁴ve⁴.

⁶⁷Qui³tso²: Tsa² ji³ ni¹³ Cristo, cˀoa⁴tˀin²-na³jin⁴. Jesús qui³tso²-le⁴: Cˀia⁴ tsa² cˀoa⁴xin¹-no³ li²coi³ coan⁴cjain¹-no³.