San Lucas 22:2-51

²Hane nahmi xi matitjun cojo cha vicuya cjuachacun ne, jemu tivangui xu me chuva rë hacutjin xi tsiquehen me Jesús. Peru táhahma xu tisahmi me xcusun vëhë ta, tsëhë xi tsacjun xu me xuta.

³Hya xi camá xu ne, Satanás ne, cavisehen xu cahntsua xahasen rë Judas, cha xi hacuaha hmí rë Iscariote, ngu cha ngajñi rë me xi tejó xi má ladu rë Jesús.

⁴Ngajan xi Judas jan ne, quiji cavisiajmicjín xu cha cojo ngujo nahmi xi matitjun cojo ngujo cha mayu yungun hacutjin cuma xi cjuaha xuta xi cuacun vë Jesús.

⁵Hane nahmi xi matitjun cojo mayu jan ne, jemu ndaja camá xu rë me, hisca caviyuju cacun me xi sua me cha tujún.

⁶Hane Judas ne, cojo cjuatacun vëhë ne, camangu cacun cha, sehe ngajan xi cavangui xu cha ngu hora xi tsajin cjín xuta, xi sahmi cha entregadu Jesús cojo xuta xi cuacun jan.

⁷Cavechú xu nixtin tsëhë suhi rë pan xi hacuiin cojo san rë pan má, nixtin hya xi meje rë xi cueya chu tsánga.

⁸Sehe ngajan xi Jesús ne, catsingatju xu me Pedru cojo Juan ngu tixa, hane cuitjin xu cachja me: ―‍Tángun tuhunchjinu xi xinëënguixuun tsëhë suhi. ―‍Cuatjin xu cachja me.

⁹Sehe ngajan xi me xi cuacun jan ne, cavinenguise xu me Jesús cuitjin: ―‍¿Hane jani meje nuju xi cuihinchjini ni? ―‍Cuatjin xu cavinenguise me.

¹⁰Hane Jesús ne, cuitjin xu cachja me: ―‍Chutsujun ni, xi cjuhun tjehen nandya jan ne, ngajan cuechuntuhun ngu cha xi yaniji ngu nisa nandá, hane tánguntjengun cha hisca xi cjuhun ndihya hiscan cjui cha,

¹¹sehe tinújun cojo nai rë ndihya jan cuitjin: “Cuitjin cjua xi catsingatju maestru tsujun: ¿Jarë cuartu xi tuhun, sehe ngajan sínë niñu tsëhë suhi cojo xuta ladu naha?” Cuatjin tinújun cojo rë me.

¹²Hane me vëhë ne, tsingacun nuju me ngu cuartu jyë xi tacun ngahnga hiscan xi ha tjin chjine ndihya. Hane ngajan tuhunchjinu xi xinëë. ―‍Cuatjin xu cachja Jesús.

¹³Hane xi quiji me xi jo jan ne, cavetjucaa jain yëjë cjua xi cachja Jesús cojo rë me. Hane ngajan cavëhëndaja xu me xi sinë nguixun Jesús cojo rë me tsëhë suhi.

¹⁴Hane xi cavechú hora ne, cafaha xu Jesús cahndë́ rë me xcun maxë cojo xingu xingu apóstol.

¹⁵Hane sehe cachja xu me cojo apóstol jan cuitjin: ―‍Jemu meje sínë cojo nuju comida tsëhë suhi vihi chaja sa xi cjuehe cjuaveya naha ta,

¹⁶tsëhë xi nguehe cuichjá cojo nuju ta ha quihndë tsajin nixtin xi cúya sínë nga comida tsëhë suhi vihi. Sínë nga, peru hisca hya xi cuinduva Nina sahmi me gubiernu ta, tsëhë xi cjuatacun xi vicuya naja suhi vihi ne, hya cuetjucaa jain. ―‍Cuatjin xu cachja Jesús.

¹⁷Hane xi cafahatsja xu me ngu vasu ne, sehe casua me nacuechji rë Nina, sehe cachja xu me cuitjin: ―‍Juhun vihi ne, sehe siuhun tsë tsë cojo xingun ta,

¹⁸hacuaha cuichjá nga cojo nuju ta quihndë cojo nixtin xi cjuiniji sa ne, ha quihndë cuyaan cuëhë xan rë uva. Cuëhë, peru hisca hya xi cuinduva Nina sahmi me gubiernu. ―‍Cuatjin xu cachja Jesús.

¹⁹Hane xi cafaha me ngu niñutsju hacuaha casua me nacuechji rë Nina ne, sehe cavotohocja xu me niñutsju jan. Hane xi casua rë me apóstol jan ne, sehe cachja xu me cuitjin: ―‍Vihi ne, yojo naha vi, xi tisuá xi cueya ngatsë nuju. Cuitjin nihñu xcusun vihi yasen ni, cojo sa xi ninguitsjun ná. ―‍Cuatjin xu cachja Jesús.

²⁰Hane xi cajnetaha cajinë nguixun me ne, hacuanitjin xu ni casahmi me cojo vasu. Hora xi casua rë me apóstol ne, cuitjin xu cachja me: ―‍Xan vihi ne, vihi jni naha xi cuetju ngatsë nuju. Cuatjin xi cuma chihin compromisu xatsë xi tisahmi Nina cojo xuta.

²¹’Peru chutsujun ni, cha xi sahmi ná entregadu ne, nguehe tacun cha ngajñi naja.

²²Hane ngahan xi Quihndi rë Xuta Jain ngahan ne, hatuxa tjin ná xi cueya sacuatjin cavichaya Nina tsahan. Peru jemu chojyihi tsëhë cha xi sahmi ná entregadu. ―‍Cuatjin xu cachja Jesús.

²³Ngajan xi yëjë xu apóstol jan ne, cavetsihin cavinenguise xicjin me jarë me xi sahmi xcusun vëhë.

²⁴Hya xi camá xu ne, cavetsihin sacuaha xi meje scaanya me ngajñi rë me yo xi chja xuta xi hitsë sa matitjun.

²⁵Ngajan xi Jesús ne, cuitjin xu cachja me: ―‍Yëjë ni xuta xi matitjun nguehe ngasunhndë ne, jercu sahmi yehe me yojo rë me sacuaha xi me vëhë má me nai rë xuta. Hacuaha jercu meje rë me xi yëjë xuta ne, cuichja me xi jemu ndaja me xi matitjun vë.

²⁶Peru ngayun ne, mijí rë xi cuatjin nihñu ta xi meje rë ne, ngu xi matitjun tsëhë ngajñi nuju ne, catitsinguijne yojo rë sacuaha ngu xi chúva nu rë. Hane ngu xi vitexa tsëhë ngajñi nuju ne, hacuaha catitsinguijne yojo rë sacuaha ngu hndixahan.

²⁷¿Yo xi hitsë sa matitjun ni? ¿Há ngu xi tijinë ne, o há tsajin ne, há ngu hndixahan xi cjui cani comida? Xi tijinë ne, hatuxa vëhë xi hitsë sa matitjun. Peru ngahan ne, tejña ngajñi nuju sacuaha ngu hndixahan nuju.

²⁸’Ngayun ne, ngayun xi cacaa nuju cojo yëjë cjuañihi xi cavatjuun camá.

²⁹Vëhë xi sacuaha casuaxa ná Nahmi naha xi ngahan sahme gubiernu ne, cuatjin suáxa nuju xi nihñu gubiernu,

³⁰cojo sa xi ngayun ne, hacuaha xinu siuhun cojo ná ngajan hiscan sahme gubiernu. Hacuaha suáxa nuju xi nichuvun cjuatacun rë yëjë tejó tjë naja, ngayaan xi tjë rë xutachanga naja Israel ngayaan. ―‍Cuatjin xu cachja Jesús.

³¹Hacuaha cachja sa xu Jesús cuitjin cojo Pedru xi hacuaha hmí rë me Simón: ―‍Chutsujun ni Simón. Satanás ne, casacu rë cahndë́ xi tsichuva cjuatacun nuju ngayujun ni.

³²Peru ngayun Simón ne, caféhya rë Nina ngatsë nuju, cojo sa xi hacuiin cumandaya tacún sacuatjin xi mangutacún cojo ná. Hane hya xi ngayun cuyun nga ndiya naha ne, tuhun ngahñu xingun. ―‍Cuatjin xu cachja Jesús.

³³Ngajan xi Pedru ne, cachja xu me cojo Jesús cuitjin: ―‍Tatá. Ngahan ne, tsingatehen cjuë́ ndavaya cojo nuju hisca tsingatehen cueya cojo nuju. ―‍Cuatjin xu cachja Pedru.

³⁴Ngajan xi Jesús ne, cuitjin xu cafayangui me tsëhë Pedru: ―‍Nguehe cuichjá cojo nuju, Pedru. Chaja sa xi squihnda ngu xahnda ne, ha jyan ndiya canújun xi hyúun yo ngahan. ―‍Cuatjin xu cachja Jesús.

³⁵Hacuaha cachja me cojo xuta ladu rë me cuitjin: ―‍Hya xi catsingátju nuju xi cachjá cojo nuju xi chuun tujún, chuun changa hacuaha chuun chuxinxtë ne, ¿há quixi xi tsajin mé camachaja nuju? ―‍Cuatjin xu cachja Jesús. Hane xuta ladu rë me jan ne, cuitjin xu cachja me: ―‍Juun, tsajin mé. ―‍Cuatjin xu cachja me.

³⁶Hane Jesús ne, cachja nga xu me cuitjin: ―‍Peru quihndë ne, jarë ngayun xi tjin nuju tujún, tjin nuju changa ne, chuhun, tángun cojo. Hane yo xi tsajin rë ngu quichandujú ne, catiteña tsjanga rë ne, sehe catatsë ngu quichandujú.

³⁷Cuatjin meje rë ta, tsëhë xi nguehe cuichjá cojo nuju ta hacutjin xi camahindu tsahan xcun xujun rë Nina ne, hatuxa tjin rë xi cuetjucaa, cjua xi chja cuitjin: “Cuichja xuta tsëhë me xi ngu xuta tsehen me.” Cuatjin camahindu. Hatuxa cuetjucaa sacuatjin camahindu. ―‍Cuatjin xu cachja Jesús.

³⁸Sehe ngajan xi xuta ladu rë Jesús jan ne, cuitjin xu cachja me: ―‍Chutsujun ni, tatá. Nguehe ne, ha siu jo quichandujú. ―‍Cuatjin xu cachja me. Sehe ngajan xi Jesús ne, cuitjin xu cafayangui me: ―‍Cojo vëhë ne, ha cuma. ―‍Cuatjin xu cachja me.

³⁹Hya xi camá ne, xi cavetju xu me tsëhë nandya Jerusalén ne, sacuatjin xi ha xcusun rë me ne, quiji xu me Ndetjún Olivu. Hacuaha cojo yëjë xuta ladu rë me quiji xu me cojo rë me.

⁴⁰Hane xi cafehe me jan ne, cachja xu me cojo xuta jan cuitjin: ―‍Chjahyun rë Nina xi hacuiin chjaháchuva nuju cojo cjuatacun nuju. ―‍Cuatjin xu cachja me.

⁴¹Hane xi quijixin me hitsë tsëhë xuta ladu rë me jan ne, sehe ngajan cavixcuhnchi xu me xi sahmi me oración rë me,

⁴²cuitjin xu cachja me: ―‍Ngayun Nahmi naha, sá mé ni xi meje nuju ne, chjuhunxun cjuañihi xi cuátju cuma vi. Peru catama sacuatjin xi meje nuju ngayun, hacuiin sacuatjin xi meje ná ngahan. ―‍Cuatjin xu cachja me.

⁴³Hya xi camá ne, cavëë xu me ngu ángel xi canduva tsëhë ngahnga, casua rë me ngahñu.

⁴⁴Hane xi jemu jima ndaya cacun xu me ne, hitsë sa jercu cafehya rë me Nina. Hacuaha ndasueya xi cavetju rë me ne, sacuaha jni xu cún xi cavixu nangui.

⁴⁵Hane xi cavisatjenhnga xu Jesús xi cajnetaha casahmi me oración rë me ne, xi cavuya quiji me hiscan siu xuta ladu rë me jan ne, casacutsja xu me xi siufë, ngatsë rë cjuachoho rë.

⁴⁶Sehe ngajan xi Jesús ne, cuitjin xu cachja me cojo xuta jan: ―‍¿Mé má cuatjin tsjuñufun ni? Tisatjunhngun ne, nihñu oración nuju, sátu chjaháchuva nuju cojo cjuatacun nuju. ―‍Cuatjin xu cachja Jesús.

⁴⁷Jinguyëjë rë xi tichja cuaha xu Jesús ne, ha tu ñahñu jercu cjín xuta cafehe me. Hane cha xi hmí rë Judas, ngu cha ngajñi rë me xi tejó xi má ladu rë Jesús jan ne, titjun xu cha xcun xuta cjín jan cjui cha. Hane xi cafehe cha jan ne, sehe quijitiña xu cha xi cuitatsuha cha Jesús xi sua cha me nina.

⁴⁸Ngajan xi Jesús ne, cuitjin xu cachja me cojo cha: ―‍Judas, ¿há cuatjin cuitatsuhun ná xi nihñu ná entregadu, ngahan xi Quihndi rë Xuta Jain ngahan? ―‍Cuatjin xu cachja me.

⁴⁹Hane xi cajne rcu xuta xi siu cojo Jesús xcusun xi cuma jan ne, sehe cachja xu me cuitjin: ―‍Tatá. ¿Há cuíjin rë me quicha? ―‍Cuatjin xu cachja me.

⁵⁰Hya xi camá xu ne, ngutjen cavaja ngu me jan cha hndixahan rë nahmi xi matitjun tsëhë yëjë ni nahmi, hane cavatësun xu me tyjavañuju quixi cha.

⁵¹Hane ngajan xi Jesús ne, cuitjin xu cachja me: ―‍Camá ni. ―‍Cuatjin xu cachja me. Hane xi cavetahatsja xu me hiscan cati rë cha ne, camandaja xu cha casahmi Jesús.