SAN LUCAS 22:18-47

¹⁸Chi cáhán rī jiín ró jeē ndé vijna te ma cóho ga rī ndūxi uva, chi nde quiji quɨvɨ̄ ndacu Yaā Dios jniñu nɨ́ɨ́ ñayɨ̄vɨ́, te sáá te coho tucu ri. Achí yá.

¹⁹Te ni quihin ya pan, te ni nacuatáhú yá, te ni tahú cuéchí yá, te ni jēhe ya nuū de jíjnáhan de. Te ni cahān yā: Yāha cúu yɨquɨ cúñu rī jeē socō rī jeē chunaa rī cuēchi ró jíjnáhan ró. Te níní caji rō súcuan jeē cáñuhun ni rō ruhū jeē ni jíhī rī jehē rō. Achí yá.

²⁰Te suni súcuan ni sáha ya jiín copa ndūxi uva, ná ni cuu ni cuxíni ya. Te ni cahān yā jiín de: Yāha cúu nɨñɨ̄ rī jeē cuáha ri jeē cúu contrato jeé, te catɨ jeē ndundoo cuēchi ró jíjnáhan ró.

²¹’Te vijna chi tēe nastúu ruhū, néne de jíín rí nuū mesa yáha.

²²Chi ruhū, Yaā ní nduu tēe, jendaá cúu jeē quihín rī cuu rī nájnūhun je ni sándaā Yaā Dios jeē súcuan coo. Te nacā xeēn ndoho tēe jeē nastúu ruhū, achí yá.

²³Yūcuán na te ni caquejéé de cácajnūhun jnáhan de ndé ɨɨn de cúu jeē nastúu de ya.

²⁴Yūcuán na te yōhyo ni cacahān de sɨquɨ̄ ndé ɨɨn de cújéhnu ga nuū jnáhan de.

²⁵Te ni cahān Jesús jiín de: Rey tācá nación chi cándacu nīhin de jniñu nuū ñáyuu cájnɨɨ de, te cácahān i jeē tée cásáha vāha cúu jeē cácujéhnu nuū i.

²⁶Te róhó jíjnáhan ró, ma cóo ró súcuan. Chi núu ndé ɨɨn ró cújéhnu ga, te sa nasáha lulí ró maá ró. Te núu ndé ɨɨn ró ndácu jniñu, te sa nasáha ró máá ró tēe jéjníñu nuū jnáhan.

²⁷¿Te ndé ɨɨn cúu jeē cujéhnu ga, á tée yéji nuū mesa, chí tée jéni cohō? ¿A násūu tée jeē yéji nuū mesa cúu jeē cujéhnu ga? Te ruhū nasūu súcuan cúu ri, chi ni nasáha ri maá rí nájnūhun tēe jéjníñu nuū rō, chi vēji ri sáha ri jeē nihín tahú rō.

²⁸’Te máá ró cácuu tēe jeē niní cáhīin jíín rí tāca quɨ́vɨ̄ jeē ndóho ri jnūndóho.

²⁹Núu súcuan te nájnūhun ni sáha Tátá rī jeē ndácu ri jniñu, suni súcuan sáha ri jeē ndacu ró jniñu jíjnáhan ró.

³⁰Te caji rō coho ró jíín rí ini ñuu nuū ndacu ri jniñu. Te cucōo ró ɨɨn ɨɨn mesa jeē sándaā rō jniñu ndɨhúxí uū yucūn Israel. Achí yá.

³¹Te suni ni cahān maá Jítoho yō jiín Simón Pedro: Simón, cuni sōho ró, chi ni jicān Satanás rohó jíjnáhan ró jéē coto ndee rohó nájnūhun jeē síjin trigo, te stúu ndé ɨɨn ró cácuu nájnūhun paja jeē nayūhu ró, te ndé ɨɨn ró cácuu nájnūhun trigo jeē candíje nīhin ró.

³²Te ni jicān tahú rī jehē rō návāha ma náyūhu ró jeē ma cándíje ga rō. Te jeē nácandíje tucu ró, te sáha ró jéē íje tāca jnáhan ró jíín jnúhun ri. Achí yá.

³³Te ni cahān de jíín yá: Je íyó túhva ná quíhīn na jíín ní vecāa te vēsú na cuu na jíín ní, achí de.

³⁴Te ni cahān yā: Pedro, cáhán rī jiín ró jeē nde ná tu cana líhli vijna, te yūhu ró jeē jnɨɨ ñayuu rohó, te unī jínu cahān rō jeē tu jíní rō ruhū, achí yá.

³⁵Yūcuán na te ni cajnūhun yá de jíjnáhan de: Ná ni tají rí rohó ní jengoo ró jéē tu ní cóndiso ró ñunu ni yɨjnɨ xūhún ni ndijēn, ¿te á ní īyo ɨɨn jeē ní cumanī nuū rō? Achí yá. Te ni cacahān de: Tú ni ɨɨn ní cúmanī.

³⁶Te ni cahān yā: Nde vijna sa cáhán rī jeē cóndiso ró ñunu ró, te suni yɨjnɨ xūhún. Te tēe jeē tu névāha espada jeē coto de máá de, na xíco de tɨcāchí de te na cuáan de.

³⁷Chi cáhán rī jiín ró jeē quee quɨvɨ̄ ndoho yó jnúndóho, chi cánuú squícu jnūhun yáha jéē cahán nuū tútu sɨquɨ̄ rī: Sáha ñayuu jiín yá nájnūhun cásáha i jíín tée sáha cuēchi xeēn, áchí tutu. Chi tāca jnúhun un jéē yosó cáhán sɨquɨ̄ rī, chi squícu nahín, áchí yá.

³⁸Yūcuán na te ni cacahān de: Yāha íyó úū espada, achí de. Te ni cahān yā jiín de: Jíín jéē yáha‑ni, áchí yá.

³⁹Te ni quenda ya cuahān yā yucu Olivos nájnūhun sáha sáha ya. Te tēe cáscuáha jíín yá ni candiquīn de ya cuangoo de jíín yá.

⁴⁰Te nuū ni jínū yā yūcuán, te ni cahān yā jiín de: Cacān tahú rō jijnáhan ró jéē chindéé ñáhán yá rohó jéē ma sáha ró cuéchi núu coto ndee jeneé róhó, achí yá.

⁴¹Te ni jica ya jecu, cūhva jeē jicá jínú yuū jeē squiín. Te ni jecuɨñɨ̄ yɨtɨ́ yá, te suhva ni jicān tahú yā:

⁴²Tátā, núu cúní ni te tejiyo ní jnúndóho yáha jéē ma quíji sɨquɨ̄ ná. Te nasūu jéē cuní maá ná, chi jeē cuní maá ní na cóo, áchí yá.

⁴³Te ni cane ɨɨn ndajéhé andɨvɨ́ núū yā, te ni jēhe fuerza nuū yā.

⁴⁴Te cúcuíhyá ndasɨ́ ni yā jeē quiji jnūndóho sɨquɨ̄ yā, te ni nducú ndéyɨ́ gá yā ni jicān tahú yā. Te ni cane jnañū yā, te tóo nuū ñúhun nájnūhun yúyú náhnu nɨñɨ̄.

⁴⁵Te ná ni ndocuɨñɨ̄ yā jeē ni jícān tahú yā, te ni ndee yā nuū tée cáscuáha jíín yá. Te ni jito ya jeē cáquixī de, chi tuá cáhīyo ndeyɨ́ ni de cacān tahú de jeē cácucuíhyá ndasɨ́ ni de.

⁴⁶Te ni cahān yā jiín de: ¿Naun cáquixī rō? Ndonda te cacān tahú rō jeē chindéé ñáhán yá rohó jéē ma sáha ró cuéchi jeē cóto ndee jeneé róhó. Achí yá.

⁴⁷Te sá cáhán gā yā súcuan, te ni quecoo cuehē ñayuu. Te tēe nání Judas, ɨɨn jnáhan jeē uxí uū tēe scuáha jíín yá, yósnúu de nuū ñáyuu un véji de. Te ni quee de nde nuū Jesús, te ni techūhú de ya, te súcuan ni nastúu de ya.