San Lucas 22:15-25

¹⁵Yalni Comam tet ebnaj: —Hayeltaxam chiwochehan chiwecꞌtzehan huneꞌ wah yin̈ kꞌin̈ Pascua tiꞌ yeb hex yet yalan̈to maẍto chincaman.

¹⁶Chiwalan teyet, matxa chiwecꞌtzehan huneꞌ kꞌin̈ tiꞌ masanto chij isba tzet yelapno ye huneꞌ tiꞌ yet chꞌoc sunil yalan̈ yip Comam Dios, ẍi Comam.

¹⁷Lahwi tuꞌ xin, yinican̈ Comam chꞌen copa, bay ayayto yal teꞌ uva, yakꞌni yuchꞌandiosal tet Comam Dios, yalni Comam hacaꞌ tiꞌ: —Chahwej lah, ucꞌwej, awecꞌo teyin̈ hununex.

¹⁸Caw chiwalcanojan teyet, matxa chiwucꞌan yal sat teꞌ uva masanto yet chꞌoc sunil yalan̈ yip Comam Dios.

¹⁹Lahwi tuꞌ xin, yinican̈ Comam ixim pan, yakꞌni Comam yuchꞌandiosal tet Comam Dios, iskꞌaxpon Comam ixim, yakꞌni Comam ixim tet ebnaj, yalni Comam: —Haꞌ huneꞌ tiꞌ yechel innimanilan chiwakꞌan yin̈ camical yu hecolchahi. Wawej, yu quinhenanitijan, ẍi Comam.

²⁰Lahwi iswaꞌilo Comam yeb ebnaj yinipaxocan̈ Comam chꞌen copa, yalni Comam: —Haꞌ huneꞌ ayayto yul copa tiꞌ haꞌ chakꞌni henab yin̈ huneꞌ acꞌ trato akꞌbil yu Comam Dios, chij isba yet chimalto inchiqꞌuilan yu hecolchahi, ẍi Comam.

²¹Yajaꞌ naj chinanicojan yul iskꞌab ebnaj chichiwa iscꞌul win̈an, ayco naj sat meẍa coxol tiꞌ.

²²Hanin Akꞌbilintijan texol yu Comam Dios, yilal wecꞌan yin̈ camical hacaꞌ halbil yu Comam Dios, yajaꞌ cꞌanchꞌan naj chinanicojan yul iskꞌab camical, ẍi Comam.

²³Hayet yaben ebnaj huneꞌ tuꞌ, yichico ebnaj iskꞌamben tet hunun yin̈ mac chꞌanico Comam yul iskꞌab camical.

²⁴Lahwi tuꞌ xin, yichico ebnaj iscuywom iscajlen isba yin̈ mac ecꞌbal yelapno ye xol ebnaj.

²⁵Yalni Comam Jesús tet ebnaj: —Haꞌ ebnaj ayco yahawo txꞌotxꞌ nime con̈ob ay yip ebnaj yiban̈ anma. Ebnaj ayco yahawilal tuꞌ xin chihallax cꞌulal yin̈ ebnaj yu anma.