SAN LUCAS 22:12-46

¹²ꞌBa kio kui kuakunu jngu ngaꞌnde teya xi je tijñanda ꞌba xi ngankꞌare niꞌyo tijña. Kio tꞌendo xi xina.

¹³ꞌBa xutare kiji ꞌba ꞌba fa tsaꞌen kuasjaire jotsaꞌen jaꞌba je kitsure Jesús. ꞌBa kio ꞌenda xi skine jñu sꞌi pascua.

¹⁴ꞌBa kionga je echu chu̱ba̱ nga kuakjen, Jesús ko apóstoles tsikꞌendutꞌa yamixo.

¹⁵ꞌBa Jesús kitsure: —¡A tu ꞌñu= mejénna̱ nga ñatjen skinaa̱ ko jun xichine tseꞌe sꞌi pascuabi, kionga kje faꞌaxtiujía̱n kjuanima!

¹⁶Ngatꞌa ꞌba xin_nuu̱ nga bi nde skineña̱ xi tseꞌe sꞌi pascua ꞌnda nga̱ ku̱ajngu jó tsunire sꞌiu ña batexuma Naꞌenchana.

¹⁷ꞌBa ꞌbatsaꞌen kiskjebe chutsinbiu ꞌba kionga je kitsjare kjuanda Naꞌenchana, kitsu: —Chjubio kibi ꞌba tikaꞌbisun_ru xingiu.

¹⁸Ngatꞌa xin_nuu̱ nga bi nde binu kꞌuiña̱ kaꞌnda nixtjin nga kuatexuma Naꞌenchana.

¹⁹ꞌBa jaskan kiskjebe niñuxtilo ꞌba kionga je kitsjare kjuanda Naꞌenchana, kitsijoya ꞌba kitsjare xutare, nga titsu: —Kui=bi xi yojona̱, xi singantsja nga kueya nga tu kjuanda tsojon. ꞌBa tiꞌon, tuxi kjuaꞌetsjenninu ngatꞌa tsaꞌan.

²⁰ꞌBa kionga je tsakjen, ꞌba nde kiskjebe chutsinbiu, nga titsu: —Kui chutsinbi xi bakutsejen kjua xatse xi tiꞌbendakoni Naꞌenchana ko xutare ngatꞌare jinna̱ xi titsen nga tu kjuanda tsojon nga sꞌe̱nda kjuo.

²¹’Tunga ngandaꞌe, xuta xi singantsjana̱ ꞌba nde tijñatꞌakona̱ yamixabi.

²²Ngatꞌa ꞌba= ku̱anre Kiꞌndire Xuta xiꞌiun jotsaꞌen kisꞌenda ngatꞌare kui, tunga ¡nimaxuni xuta xi singantsja kui! —kitsu Jesús.

²³ꞌBa ꞌbatsaꞌen xutare ꞌetutsꞌinre nga tsiningiyare xinkjin ꞌyá= xi singantsja.

²⁴ꞌBa kio xutare josiko xinkjin ngatꞌare ꞌyá= xi ngisa tjun tijña ngajinre.

²⁵Tunga Jesús kitsure: —Rey xi batexuma naxinanda xi bi judío ꞌñu batexumare xutare. ꞌBa nchja xi tjinre xa mejénre nga xuta kuetsure nga nda inyatsaꞌen.

²⁶Tunga ngajinnu bi ꞌba ku̱an. Tusa xi ngisa tjun tijña ngajinnu ngatatsaꞌen yojore joni tsa kui xi ngisa kiꞌndi. ꞌBa xi batexuma ngatatsaꞌen yojore joni tsa kui xi chuꞌndare xi yakꞌa.

²⁷Ngu, ¿ꞌyá= xi ngisa tjun tijña? ¿A xi ꞌbejñatꞌa yamixo nga kjine=, asa chuꞌnda xi ꞌbeya xichine=? ¿A bi tsa xi ꞌbejñatꞌa yamixo? Tunga an tejñajin_nuu̱ joni chuꞌndanu.

²⁸’Jun bi kjinikumanuu̱ kionga kichutꞌayakona̱.

²⁹Kui kjua sjani_nuu̱ kjuaꞌñu nga kuatexumo, jotsaꞌen kitsjana̱ Naꞌenna̱,

³⁰tuxi sinchjañu ꞌba sꞌiuñu tꞌa yamixana̱ ña kuatexumaa̱, ꞌba kuetsubasun yaxile ña siꞌan_ru kjua ntjere xuta Israel xi tejó kaꞌa mani.

³¹ꞌBa Jesús kitsu: —Simón, chanayi Satanás tsiꞌakjua nga kꞌuetsujmeyanu joni ko trigo.

³²Tunga an je ꞌetsa_ra̱ Naꞌenchana ngatꞌa tsiji, tuxi bi sichajani kjuamakjainri. ꞌBa kionga kjuaꞌe ngani ngixkua̱n, tisekue ntsꞌé tuxi kixi kuinyantsjaini.

³³ꞌBa Simón kitsure: —Naꞌen, tjijngu takua̱n nga kjuikora̱ nduya ꞌba kaꞌnda kueyakora̱.

³⁴ꞌBa Jesús kitsure: —Pedro, an xinra̱, kionga kje kjiꞌndajín chaxicha nixtjin ngandaꞌe, ji je ján ndiya kisji nga bi xutana̱ kuáin.

³⁵ꞌBa saꞌe tsiningiyare xutare: —Kionga kitsikasen_nuu̱ ꞌba kixin_nuu̱ nga bi xꞌo chitsa, ninga ton ninga jnde, ¿a tjin= xi kichajanu? ꞌBa nchjabiu kitsure: —Tumé kichajani̱.

³⁶ꞌBa Jesús kitsu nganire: —Tunga ngandaꞌe, xi tjinre chitsa, ngatabaꞌa. ꞌBa nde ngatabaꞌa tonre. ꞌBa xi tsajainre kicha, ngatateña najñu ndujure ꞌba ngatatsejngu.

³⁷Ngu ꞌba xin_nuu̱, nga tjinnere nga kꞌuetjusun enbi xi kuaꞌindutꞌa enre Naꞌenchana ngatꞌa tsaꞌan: “ꞌBa kui xi ꞌba nde kisꞌexkijinre xuta chꞌokun.” Ngatꞌa ngayéje xi kuaꞌindutꞌa ngatꞌana̱ tjinnere nga kꞌuetjusun.

³⁸ꞌBa nchjabiu kitsure: —¡Naꞌen, ngaꞌe tjindu jó kicha! ꞌBa Jesús kitsu ngani: —Je kuán nde.

³⁹ꞌBa saꞌe Jesús ꞌetju ꞌba kiji tjenngi Ya Olivo jotsaꞌen ntsjai. ꞌBa nde xutare kitjenngi ngayeje.

⁴⁰ꞌBa kionga je echu kio, Jesús kitsure: —Chjaꞌa_ru kjuanda Naꞌenchana, tuxi bi xutꞌayakoninú.

⁴¹ꞌBa kitsikjintꞌare jo kjiꞌi ma chanikjaꞌa jngu ndiojo. ꞌBa kio tsakasenkunchꞌin ꞌba jako Naꞌenchana,

⁴²ꞌba kitsure: —Naꞌen, tsa mejénri kꞌuejñatꞌaxinnaa̱ kui kjuanimabi, tꞌejñatꞌaxinnaa̱. Tunga bi ngatjama jotsaꞌen an mejénna̱, tusa jotsaꞌen ji mejénri.

⁴³ꞌBa kuatsejen jngu ankje xi jendibajenni ngankꞌaa nga jaꞌetsjare ngaꞌñu.

⁴⁴ꞌBa kionga ne tse kjuanima tifaꞌaxtiu Jesús, ngisa ꞌñu jako Naꞌenchana, ꞌba nandubare tsixu tꞌanangiu joni tinre jin xi tsiña.

⁴⁵ꞌBa kionga je jetꞌare nga tifako Naꞌenchana, tsisetjen ꞌba jendiba ngani ña tjindu xutare. ꞌBa kjiyufe nga echu ngatꞌa je kitsikjejndare kjuabo.

⁴⁶ꞌBa Jesús kitsure: —¿Ánñu tetsjujñafeñu? Tisetjion ꞌba chjaꞌa_ru kjuanda Naꞌenchana, tuxi bi xutꞌayakoninú.