San Lucas 21:11-35

¹¹Achqha lugarpitaj jallp'a qharcatenka. Cay pachapi yarekaycuna onkoycunapiwan canka, janaj pachapitaj mulljachicoj jinacuna athun señalcunapiwan riqhurenkacu.

¹²“Caycuna manaraj pasachcajtin, jap'isunquichis, ñac'arichisunquichistaj. Sinagogapi juchachasunquichis, carcelman churasunquichis, gobiernocunamantaj entregasunquichis nokapajta caskayquichisraycu.

¹³Ajinapi nokamanta willarayta atinquichis.

¹⁴Ñaupajtaka ama pensaychischu imatachus contestanayquichista.

¹⁵Noka yachayta koskayquichis parlanayquichispaj. Enemigoyquichiscunaka mana atipayta nitaj cutichicuytapas atenkacuchu.

¹⁶Chaywanpas tatayquichischus, waukeyquichischus, parienteyquichischus chayri amigoyquichischus entregasunquichis. Waquinniyquichista wañuchisunquichis.

¹⁷Tucuy runa chejnisunquichis nokapajta caskayquichisraycu.

¹⁸Chaywanpas umayquichismanta ni uj chujchallapas chincankachu.

¹⁹¡Pacienciawan creeskayquichispi firme caychis salvacunayquichispaj!

²⁰“Jerusalenta soldadocunawan muyuycuskata ricuspa, yachaychis ñut'uskaña cananta.

²¹Judeapi cachcajcuna lomaman escapacuychis; Jerusalenpi cachcajcuna llojsipuychis; campopi cachcajcuna ama llajtaman cutiychischu.

²²Chay castigo p'unchaycunapi tucuy Escrituracuna junt'aconka.

²³¡Ay, llaquiy ari, chay p'unchaycunapi onkoj warmipaj ñuñuchcaj wawayojpajpas! Imaraycuchus cay pachapi athun ñac'ariy canka. Jinallatataj Dios cay llajtayojcunata sinchita castiganka.

²⁴Waquincunaka guerrapi wañonkacu; waquincunatataj presota apankacu waj llajtacunaman. Waj llajtayoj runacuna Jerusalenta dueñochaconkacu, paycunapaj tiemponcu junt'acunancama.

²⁵“Intipi, quillapi, koyllurcunapipas señalcuna canka. Cay pacha llajtacunapitaj runacuna ni ima ruwayta atispa manchariconkacu athun kochapaj lak'acuskan oladancunapaj sinchi suenayninwan.

²⁶Runacuna manchacuywan wañunayankacu, cay pachata tucuy ima pasananta pensaspa. Janaj pachapi caj atiycuna qharcatenka.

²⁷Chaymanta Tataj Churinta riconkacu phuyupi jamuchcajta athun atiyninwan glorioso c'anchayninwan.

²⁸Cay tucuy pasayta kallarejtin, animacuychis; callpachacuspa khawariychis; salvaska canayquichisña cachcan.”

²⁹Cayta nillarkantaj: “Higo sach'ata mayken sach'atapas khawariychis.

³⁰Maypachachus raphincuna ch'ijchiramojtin, yachanquichis k'oñi tiempo kayllachamuchcaskantaña.

³¹Ajinallatataj kancunapas cay tucuy ima pasajtin, yachanquichis cutimunay p'unchay kayllallapiña caskanta, Dios gobernananpaj.

³²“Segurayquichis, tucuy cay imacunaka canka cunan tiempo runa causachcajtinraj.

³³Janaj pacha cay pachapas tucuconka; palabraycunacajka mana pasankachu junt'acunancama.

³⁴“Cuidacuychis, sonkoyquichista ama khoruyachiychischu viciocunawan, machaycunawan, causayniyquichispaj afanacuycunapiwan, chay juicio p'unchay mana konkay jap'inasunquichispaj.

³⁵Uj trampa jina jamonka cay pachapi caj tucuy runacunaman.