San Lucas 20:5-27

⁵Na' ḻegacze' gose' ḻježe': ―¿Bi ṉacho? Še ye'chone' Dios gwseḻa' ḻe', na' ye'e chio': “¿Bixc̱hen' ca gwyejḻe'le c̱he'?”

⁶Na' bi gac ye'chone' beṉac̱h gwseḻa' ḻe', ḻe yogo'te beṉe' že' nga chesejḻe'e Diosen' gwseḻe' da' Juanṉa' be'e xtiže'na', na' yosožie' chio' yej še ye'chone' ca'.

⁷Na' gose'e Jesúsen': ―Bi ṉezeto' non' gwseḻa' da' Juan.

⁸Nach Jesúsen' gože' ḻegaque': ―Ḻecz ca' neda' bi yapa' le'e bi yeḻa' gwnabian' chonḻenda' da' ca'.

⁹Na' be'e jempl nga bzejni'ide' beṉe' ca' chosozenag c̱he', gwne': ―To beṉe' goze' to cue' xen yag uvas na' bocua'aṉen' ḻo na' beṉe' ca' yesonen' žin na' gwze'e gwyeje' zito' na' jasoe' sša.

¹⁰Cate' bžin ža yosyotobe' cosešen', nach gwseḻa' to xmose' lao beṉe' ca' nac ḻo na'gaque' yag uvasen' cont yosyonežjue'ne' to tlacw coseš dan' yesyezi'en. Na' beṉe' ca' nac ḻo na'gaque' yag uvasen' goseyine' mosen' na' to ga'alze bosyose'ene' bibi goso'ene'.

¹¹Nach x̱an yežlion' gwseḻe' yeto mosen', na' ḻecze gosot goseyine' ḻe' na' gosonde' ḻe' zgot, na' to ga'alze bosyose'ene' bibi goso'ene'.

¹²Na' x̱an yežlion' gwseḻa'che' mos gwyoṉe, na' ḻecze gosotlate'ne' gosone'ne' güe', na' besyebeje'ne' gan' že' yag uvas ca'.

¹³’Na' x̱an yežlion' gwne': “¿Nacxe gona'?” Nach beyone' xbab gwne': “Seḻa' xi'iṉa' ben' chacchgüeda', ḻe šeca güesezi'e xtiža' ḻe'.”

¹⁴Perw beṉe' ca' nac ḻo na'gaque' yag uvasen' cate' besele'ede' xi'iṉe'na', gose' ḻježe': “Benga yega'aṉlene' yežlio nga cate' gat x̱e'. Ḻe da gotchone' cont yega'aṉlenchon.”

¹⁵Nach besyebeje' ḻe' gan' že' yag ca' na' gosote'ne'. Nach Jesúsen' gwṉabde' beṉe' ca' zjanžaguen': ―¿Nacxe gon x̱an yežlion' len beṉe' ca' bocua'aṉlene' yežlio c̱hen'?

¹⁶Šeje' šjetue' ḻegaque' na' yodie' yežlion' ḻo na' beṉe' yoble. Na' beṉe' ca' že'na' cate' gosende' diža' quinga dan' be' Jesúsen' gosene': ―¡Catec da' mal juisyw dan' goc!

¹⁷Na' Jesúsen' gwṉa'chgüe' ḻegaque' na' gwne': ―¿Bixe zejen da' nga nyojen ḻe'e Xtiža' Diosen'? žan: Yej dan' bi gosaclaže' güen yo'o ca' yosoc̱hine', ḻen ba naquen yej squin.

¹⁸Na' ca nac yejna', note'tez beṉe' lažo' ḻo yeja' na' cue'žošje', na' note'tez beṉe' chiže' yeja' cate' lažon' na' gwšošjen ḻe'.

¹⁹Na' beṉe' ca' chososed chosolo'e dan' bzoj da' Moisés na' bx̱oz gwnabia' ca' ḻa' besyeyiljwlaže'te nacle yesone' yesezene' Jesúsen', ḻe gosacbe'ede' Jesúsen' be'e jemplna' ṉec̱he dan' bi chesejnilaže' ḻe'. Perw bibi gosone', ḻe besežebe' bi yeson beṉe' ca' že'na' beṉe' chesejḻe'e c̱he Jesúsen'.

²⁰Da'nan' goseseḻe' beṉe' yosogüia yeseṉe'e Jesúsen' cont yesebeje'ne' diža' da' yosode'ede' cont yesagüe' xya c̱he' lao gobernador ben' chnabia'. Gosacde' gone' xbab do laže'gaque' chosozenague' c̱he'.

²¹Nach gose'e ḻe': ―Maestrw, ṉezeto' diža' da' cho'o na' da' chsed chlo'edo' beṉe' zejen to ḻicha. Ṉezeto' toz can' chono' len note'tez beṉe'. Na' ṉezeto' diža' ḻi cho'o chsed chlo'edo' beṉe' can' chazlaže' Diosen' goncho.

²²Na' da'nan' zedeṉabeto' le' ¿naquen binḻo no c̱hixjo da' cheyaḻa' c̱hixjwcho c̱he ben' nac ḻa'zelagüe beṉe' gwnabia' ben' chi' Roma, še bi?

²³Na' gocbe'e Jesúsen' gague do lažen' chese'ene' ca', san chesaclaže' yesagüe' xya c̱he xtižen'. Na' gože' ḻegaque': ―¿Bixc̱hen' chaclaže'le yoslažo'le neda' len xtižan'?

²⁴Ḻe gwlo'e neda' to mechw. ¿No lao dan' da' ḻe'e mechw nga? na' ¿no la' dan' nyoj ḻe'en ni? Nach gose'ene': ―C̱he César ben' nac ḻa'zelagüe beṉe' gwnabia' ben' chi' ciuda Roma.

²⁵Nach gože' ḻegaque': ―Ḻe gwnežjo beṉe' gwnabian' da' nac c̱he beṉe' gwnabia', na' ḻe gwnežjo Dios dan' nac c̱he Dios.

²⁶Na' bi gosezaque'de' yososlažoe' ḻe' len xtižen' lao beṉe' ca' že'na'. Na' besyebande' can' boži'e xtiža'gaquen', na' bich bi gose'ene'.

²⁷Na' ḻecze besežin baḻ beṉe' saduceo gan' zoa Jesúsen'. Beṉe' ca' chesene' beṉe' guaten' bi yesyebane'. Nach goseṉabde' ḻe', gose'ene':