San Lucas 1:5-58

⁵Lëë Herodes nak rey xtañ meñ Judea tiemp nii kwyo tu pxosy nii pcholë Zacarías. Lady tub tiiy pxosy nii pcholë Abías kwyo Zacarías. Sabely pcholë tsiil xaa, lo xtiiy Aarón sëëd me.

⁶Psoob Zacarías xtiits Dios chop tsiil. Por ngo ni tu cho pchilody nlis kiy pe cos lo xaa.

⁷Per lëë xaa kol le chop xaa aan pchilody nyap tsiil xaa mëëd.

⁸Lëë tu tse lëë xtiiy Zacarías pchal sëëb leñ lidzy Dios,

⁹aan nak xcostumbre pxosy nii klo xko xaa rif parñee kan xaa dyon cho sëëb lo pkoog, aan lëëtyee Zacarías pchal sëëb lo pkoog tsiko kox yaal lo Dios.

¹⁰Kchë meñ kwche ley chool lay mentre lëë yaal noyek.

¹¹Aan lëë tu xangly Dios byaklo lo Zacarías lo pkoog. Nëzli laañee noyek yaal byaklo angly.

¹²Tsiñee lëë Zacarías kon angly, byeñdy xaa pe nyuñ xaa aan tir ptsyeb xaa.

¹³Per lëë angly chëb: —Zacarías, ktsyeebtyoo, por lëë Dios biñ nii xñaboo, aan lëë tsiiloo Sabely kap tu mëëd nii kcholë Juan.

¹⁴Aan lëël kle ni ndaly gaa meñ kle tsi lëë mëëd ko kaly.

¹⁵Por tu xaa non kak xiñoo lo Dios. Kidy xaa viñ ni kidy xaa cos nii chuuñ ksudzy, ni lëë Kyalbini Ntson sëëb leñ styoo xaa antes nii kaly xaa.

¹⁶Lëë xaa ktikche styoo meñ Israel lo Dios.

¹⁷Lëë xiñoo Juan tenech lo Dios, ni siñee kwyo kyalbini leñ styoo Elías, tsow leñ styoo xaa, ni sinak nii kwnabey Elías kñabey xaa, parñee kisyaal xaa xtily meñ nii xtilyni xiñ, ni parñee ksoob meñ ntseeb tiits. Singo mod lëë xaa kluuy xa kyëmbës meñ Dios.

¹⁸Tsigo lëë Zacarías kwnabtiits lo angly chëb: —¿Xa mod kniladzyaa nii sak nrii cumplir? Por kwyoxaa ni kwyox tsiilaa.

¹⁹Tsigo lëë angly kwëb chëb: —Naa nak Gabriel. Lo Dios tugak son, aan lëë xaa pxaal naa syelynin tiits re lool.

²⁰Per lëë na como bnilastyoo tiits nii byelynin, lëël kyaan ngop, aan chilody kñeel axte tse lëë kchë nrii kak cumplir.

²¹Mentre lëë kchë ngo kayak leñ lidzy Dios, lëë kchë meñ nii nche ley xñee penak nii no klyëë Zacarías lo pkoog.

²²Tsiñee lëë xaa pchoo, pchilody nyee xaa, aan axte tsigolye lëë meñ byeñ nii no pe cos kon xaa lo pkoog, xaktyee señ xko xaa aan singo byaan xaa.

²³Tsi lëë nii no kuuñtsyey Zacarías leñ lidzy Dios byal, lëë xaa sey lidzy xaa.

²⁴Loxsye ngo lëë tsiil xaa kok xiñ, aan kaay mëë pchoody me lidzy me porñee nladzy me:

²⁵“Lëë Dios bnee kyalnsaak re lon parñee ktelastraa tsiñee kan meñaa.”

²⁶Tsiñee kok xoop mëë nii nak xiñ Sabely, lëë Dios pxaal angly Gabriel tu kyedzy nii lë Nazaret. Galilea ngab kyedzy ko.

²⁷Leñ kyedzy ko kwyo tu kwnaa yeeñ nii pcholë Mariy, aan lëë me pchootiñle par ktsiilña me tu xaa nii lë José. Lo xtiiy David sëëd José.

²⁸Lëë angly kwsëëb leñ lidzy me aan lëë angly pkëëptyux me chëb: —¡Xle Dios lool ni lëë Dios nakni lii!

²⁹Tsiñee lëë me kon angly, ptsyeb me biñ me xtiits angly, aan nladzy me penak nii pkëëptyux angly me singo.

³⁰Per lëë angly chëb: —Mariy, ktsyeebtyoo, por xle Dios lool.

³¹Lëël kak xiñ aan lëël kap tu mëëd nii kcholë Jesús.

³²Tu meñ xñabey kak mëëd ko aan Xiñ Dios nii sob kpaa kolë meñ me, ni lëë Dios kaa kso me kak me rey sinak pxusykoltoo me David,

³³parñee kñabey me lo meñ Israel aan iip kyaldy xkyalwnabey me.

³⁴Tsigo lëë Mariy chëb lo angly: —¿Xa kaapaa mëëd con bii tusyaa?

³⁵Lëë angly chëb: —Lëë Kyalbini Ntson kiid lool, ni lëë xkyalntson Dios nii sob kpaa kyab ladyoo sinak nii nyako tu xkey. Por ngo Xiñ Dios kak mëëd nii kaly.

³⁶Ni wi gaa meñ liidzyoo Sabely kap tu mëëd, nikxe nii meñ kol me ni xñee meñ nii chilody kap mëëd. Per lëëw kok xoop mëë nii noy xiñ me,

³⁷por par Dios nody tu cos nii kchilody kak.

³⁸Tsigo lëë Mariy chëb: —Ña Dios non. Na kuuñtsyeyaa nii kaklastyee Dios. Loxsye ngo lëë angly bi.

³⁹Leñ tse go lëënlëdy lëë Mariy si tu kyedzy nii nche nëz kiy Judea.

⁴⁰Aan tsiñee lëë me ptsiñ lidzy Zacarías, lëë me pkëëptyux Sabely.

⁴¹Tsi lëë Sabely biñ nii lëë Mariy xkëëptyux, lëë mëëd nii so noy me bni leñ styoo me, aan wor go kazh lëë Kyalbini Ntson kwsëëb leñ styoo me.

⁴²Tsigo nguiedzy kwnee me chëb me: —Ni tu kwnaa karty kuuñlay Dios sinak beeñlay Dioosoo, ni sinak beeñlay Dios xiñoo.

⁴³¿Cho nakaa parñee kiid kan xñaa Xiñ Dios naa?

⁴⁴Por siikñee biñaa nii lëël xkëëptyux, lëë xiñaa ble aan lëë me bni leñ styoon.

⁴⁵Dichoosoo nii bniladzyoo nii sak cumplir kchë nii në Dios lool.

⁴⁶Tsigo lëë Mariy chëb: Tyub styoon xlen lo Dios.

⁴⁷Ni xle xkyalmbañaa lo Dios nii pteelaa naa.

⁴⁸Por lëë Dios psooblo naa nii nakaa tu kwnaa ndoladzy, aan destye natse lëë meñ kñë lon dichoosoo.

⁴⁹Por ndaly kyalnsaak nii no kneetsy Tat Tios lon. Ntson Tat Tios.

⁵⁰Ni tugak kaa xkëstyoo Dios meñ nii xsoob xtiits me.

⁵¹Con xkyalwnabey Dios bnitylo me kchë nii nyuuñtsyey meñ nyaa.

⁵²Lëë me kwlii kchë meñ xñabey, ni lëë me blisklaa kchë meñ ndoladzy.

⁵³Lëë me ptee nii pkiiñ lo meñ nii no lyaadzy, aan psonëz me meñ rikw singosy.

⁵⁴Beeñ me meñ Israel nii ngab lo me yudar, ni psaanlasty me meñ Israel.

⁵⁵Por singo byaan me tiits chop me pxusykoltoo no Abraham ni xtiiy Abraham nii nare kiid.

⁵⁶Tson mëë kwlës Mariy lo Sabely. Loxsye ngo lëë me sey lidzy me.

⁵⁷Tsi lëë tse kutsiñ nii lëë xiñ Sabely kaly, lëë me kop tu mëëdpkiy.

⁵⁸Aan kchësy meñ nii no kex chilidzy me ni meñ lidzy me kutedy lo me porñee xle meñ nii lëë Dios psaladzy me.