San Lucas 1:5-58

⁵Casale casaleri Herodes tinun miya Judea tobi mantamin josa, israelita patele manca jominue Zacarías mumun. Abías tinun bolonbi patele jominue. Ya unilachi sona Elisabet mumun jominue. Elisabechi familialanan Aaronchi alicala joto, patelela pejominlanue.

⁶Zacaríabe Elisabebe Diosichi cale sen jominlanue. Diosichi mantaca jera meráto nenaminlanue.

⁷Elisabet mantimini na quitumin jotonan, sinuca jominue. Zacaríanan unica jominue.

⁸Junni Zacaríachi bolon patelela ti quino jonatiya quinaminlanue Diosichi cale.

⁹Patelelachi mite jeralelachi mumunca pilaquidobi chuteto, mancachi mumunca quiratuminnan camin jominlanue mo Diosichi yabi wino jonunca miichun. Junni Zacaríachi mumun chutecaca calaquinan, yari junbi wito, insienso lucuca nin ponaminue.

¹⁰Ya insiensoca nin ponasari, jerale tsachila urachinan mérato Diosibe rocainaminlanue.

¹¹Aman jun quiranari pansile nechi Miya Diosichi anjeli quirainue. Jun insienso nin ponanunle tsa nan tala wiruranue.

¹²Zacarías ya anjelica wepanato quirato, jeletinue.

¹³Anjeli mantimini itsantinue: —Zacarías, wepanatude! tinue. Nu rocainanunca Diosi meraca joe tinue. Junca meránan, nuchi sona Elisabet na quichunae. Junni ya náca Juan mumun polaquina!

¹⁴Ya naieque layan tsachila son tilatichunae tinue. Nunan duque peson tichunae tinue.

¹⁵Jun naoca Diosi fe mantá tan tsachi joe tichunae tinue. Bino, nin warente cuchituchunae tinue. Ya nainunle nechi Diosichi Tenca yaca jera caya jochunae tinue.

¹⁶Duque israelítalaca Miya Diosibe mancayaisa carichunae tinue.

¹⁷Matu to Elías cuwenta Diosichi mantaca petachunae yape apalanan, nalalanan parejo seque mantenca calaquisa. Tsachilaca payichunae yape merátuchi timinlari manmeralaquisa. Junsi tenca tanla paca fiquica manmerása carichunae. Tsachilaca micarichunae tinue yape seque mannenalarasa, Miya jano joeque.

¹⁸Junni anjeli Zacaríabe tsantica josa, Zacarías itsanque panhanue: —Meráde! La unica joyoe. Lachi sonanan sinuca joe tinue. ¿Junto niyaito miicaichunan? tinue na quirano jonunca.

¹⁹Junni anjeli itsantinue: —Gabriel joyoe. Diosichi cale wiruramin joyoe tinue. Diosi laca erecae yape in sen fiquica nube cuenta polarisa.

²⁰Junni nu meráde! La na quichunae tica jonan, nuchi sonari na quino ma fenan na quichunae. Junni la tsanticaca nuri quereituto, patumin ichunae ya náca mumun pono fecári.

²¹Junni Zacaríabe anjelibe tsanque cuenta quilaquinasa tsachilari urachi méraminlanue. Diosichi ya urachi Zacaríaca mérato, wepananaminlanue ¿Niyaito tsancari piyanhinan? tito.

²²Junni Zacarías manlotobi, pano podeitunue. Junto tedechi molde quito quirawonan, miilainue Diosichi yabi yachi quirajanueque.

²³Junni Zacarías Diosichi yabi jera quino jonunca quito manjinue.

²⁴Aman junni nanni inale Zacaríachi sona Elisabet na winue. Na witobi, mante pe fecári tsaito chuminue. Junsi

²⁵itsantinue: —Miya Diosi chiqueca laquirato quirato, seque quee tinue. Na quitumin joyoeque luraminca piyarie tinue na quisa carito.

²⁶Sota pe poleto, Gabriel tinun anjeli manpatanue. Diosi ereca jun manpatanue Galilea toca. Nasaret puebloca jato,

²⁷junto unila iton sonachica janue Maríachica. Ya Maríari unilabe cayaino jotonan, cacayaica itominue. Ya unilari José mumun jominue. Matu to miya Davichi alica jominue.

²⁸Junni aman ya anjeliri Maríachica jato itsantinue: —Nube saludainayoe tinue. Miya Diosi nube rato, nuca duque laquirae tinue. Diosi nuca duque pansi josa carichunae tinue. Uyan sonalaca fécari pansi josa carichunae tinue.

²⁹Junni María ya anjelica quirato, yachi fiquica meráto, duque wepananue. Ya ti quichun tsanque saludainanque tenca cato wepananue.

³⁰Junni anjeli itsantinue: —María, jeleratude! tinue. Diosi nuca laquirae tinue.

³¹Meráde! tinue. Nu na wito, unila na quichunae tinue. Ya náca Jesús mumun pona! tinue.

³²Ya na uwaitobi, duque mantá tan tsachi uwaichunae. Ya náca jamochi chumin Diosichi Nao tinun jochunae tinue. Miya Diosi yachi mantá cuwachunae matu to miya Davichi cuwenta. David yachi matu tata joto, israelítalaca mantamin jominue.

³³Junni nuchi nao jun tsanquenan israelítalaca mantamin jochunae tinue. Numatotiya mantato chuchunae tinue.

³⁴Maríari jun fiquica meráto, unila itoyoe tinue. ¿Junni niyaito na queichunan? tinue.

³⁵Junni anjeli manpato itsantinue: —Diosichi Tenca nuchica jachunae tinue. Diosi fécari mantá tan joto, nuca poyochi cuwenta dochunae tinue. Junnan ya sen náca Diosichi Nao tinun jochunae tinue.

³⁶Meráde! Nuchi familia Elisabenan, sinuca jotonan na pun joe tinue. Na quitumin joe latica josanan, sota pe na pun joe tinue.

³⁷Diosi jera ticatiya quino podeimin joe tinue.

³⁸Junni Maríari anjelichi fiquica jera meráto, itsantinue: —Junni tsan jonari, se joe tinue. Miya Diosi panunca meraniquimin joanae tinue. Nu tsantica fiqui se loniisa tenjae tinue. Tsantinunsi anjeli manjinue.

³⁹Junnasa María du minu wewe jito, Elisabet chunun puebloca jinue Judea tobi.

⁴⁰Junni Zacaríachica jito, tamochi wito, Elisabebe saludainue.

⁴¹Junni aman Elisaberi Maríachi fiquica meránan, nari Elisabechi pecolobi wecainue. Junni Elisaberi Diosichi Tencabe jera cayaica joto,

⁴²sonba seque pato, itsantinue: —Diosi nuca pansi josa carichunae tinue yape uyan sonalaca fe pansi josa. Nuchi naocanan pansi josa carichunae tinue.

⁴³Nuchi na chiquechi Miya jochunae tinue. Junni chique duque son joyoe tinue nu quirabi jae tito.

⁴⁴Junni nuchi saludoca meránunsi, chiquechi na wecaie tinue. Duque son tito pecolobinan wecaie tinue.

⁴⁵Nu Miya Diosichi fiquica quereito, duque son jochunae tinue. Ya fiqui tsarasica jochunae tinue.

⁴⁶Junni Elisabechi fiquica meráto, María itsantinue: Chiquechi tencabi Miya Diosica tsaracari seque pánayoe tinue.

⁴⁷Diosi chiqueca se larica joe tinue. Junnan chiquechi tencabi yaca duque son joyoe tinue.

⁴⁸Diosiberi mantaimin jotonan, epe sona joyoe tinue. Tsan josanan Diosi chiqueca duque seque quirae tinue. Junni meráde! Amanale nechi jeralela chiqueca pansi joe tilatichunae tinue.

⁴⁹Diosi duque sonban joto, chiqueca tsaracari seque quee tinue. Ya tsaracari sen patsa joe tinue.

⁵⁰Yaca jeleraminlaca numatotiya laquirato polechunae tinue.

⁵¹Junni yari sonba quimin joe yape sonban Diosi joeque miilaisa. Weyanlari tencabi duque sen joyoe tito, mantá tayoe timinla joe tinue. Diosi mantimini yalaca jera arara sueremin joe tinue.

⁵²Fécari mantá tan tsachilaca epe suwamin joe; epe tsachila jominlaca mantá tan suwamin joe tinue.

⁵³Ano itonlachi sen ano cuwamin joe; oco tsachilachi natiya cuwatuminnan manheremin joe tinue.

⁵⁴Diosi yachi israelita tsachilaca ayudaica joe. Yalaca laquirano joyoeque mantenhito, ayudaica joe.

⁵⁵Chiquilachi matu to tatalabe junca cuenta quito tsantica jominue. Maríari tsanque cuenta quinue.

⁵⁶Junto María Elisabebe peman pe tsansi pechuto manjinue.

⁵⁷Junni Elisabet na quino ma fenan, unila na quinue.

⁵⁸Familialabe quiranunlabe na quica jonunca miito, son tilatinue. Diosi ya sonaca duque laquirato na quirasa carinue tito yaca son tilatinue.