San Lucas 1:38-80

³⁸Ta quichaha catyí cu María: ―Yuhu cuví musu Sutu yo Nyoo. Na sacuvi maa ra yoso cuhva catyún ―catyí ña. Yucuan ta cuahan ángel cuan.

³⁹Cuví noo quɨvɨ cuan, numi xaan cuahan cu María noo ñuu ityi Judea nu maa ri maa yucu cuví.

⁴⁰Ta quɨhvɨ̱ ña chichi vehe ra Zacarías. Ta chaha̱ ña nocumi chi cu Elisabet.

⁴¹Cuhva cha chiñi̱ cu Elisabet tuhun caha̱n cu María, natyoño̱ cha lee cha ñohó chichi ña. Ta chitu ña chihin Tatyi Ii Nyoo.

⁴²Ta chaa nacaha̱n ña, ta catyí ña: ―Nyoo sahá ra tumañi iñi chuun cha nuu tandɨhɨ ñusɨhɨ. Ta nasocó ra chi sehun.

⁴³¿Ta yóó ñaha cuví yuhu? Vatyi quichi sɨhɨ Sutu Mañi yo quichi̱ nyehe ña nu nyai.

⁴⁴Cuhva cha chiñi̱ tuhun cahu̱n, ta natyoño̱ sehi cha ñohó chichi. Vatyi sɨɨ xaan cuví chi ra.

⁴⁵Ta sɨɨ xaan cuñí añimon vatyi chinó iñun cha cuacuvi tuhun cahán Nyoo chuhun ―catyí cu Elisabet.

⁴⁶Ta quichaha̱ catyi cu María: ―Sacahní chi Nyoo chihin tandɨhɨ añime.

⁴⁷Ta sɨɨ xaan cuví chii vatyi sacacú Nyoo añime.

⁴⁸Vatyi cuví yuhu noo ñaha ndahvi ta Nyoo tɨɨn cuenda ra chii. Ta vityin tandɨhɨ quɨvɨ cucatyi ñáyɨvɨ chii vatyi cahnu xaan tumañi iñi ñihi̱.

⁴⁹Vatyi Nyoo, cahnu xaan cuví ra. Ta cahnu cha sacuví ra chihin. Ta ii xaan sɨvɨ ra.

⁵⁰Ta tyicuan ri ndahvi cuñí ra chi tandɨhɨ ñáyɨvɨ cha sahá ñáyɨvɨ chi ra.

⁵¹Cahnu xaan cha sacuví ra chihin tunyee iñi iyó chi ra. Sanaá ra cuhva chicá xiñi ñu cahnu sahá chi.

⁵²Sanocueé ra chi ñu sacahnú chii. Ta ra cha ña cahnu sahá chii, sacucahnú ra chi ra.

⁵³Chahá Nyoo cha vaha chi ñu cuñí coto cha vaha, ñu chitó vatyi chiñuhú Nyoo chi. Soco ñu tyayɨɨ cha cuñí maa tyi ñahri chiñuhu chi, chihin nundaha nu ndɨɨ ñu, sacuhún ra chi ñu.

⁵⁴Tyinyeé ra chi ñáyɨvɨ Israel cha cuví musu ra. Ta ña naá iñi ra chi ñu. Nyehé ndahvi ra chi ñu.

⁵⁵Tari cuhva catyí Nyoo chi ra Abraham, sutu yo, ta chi sehe ra, tyicuan caa sacuví Nyoo tyicuan ri maa ―catyí cu María.

⁵⁶Ta cu María ndoo̱ ña chihin cu Elisabet uñi yoo. Ta cha yaha̱ uñi yoo cuan ta cuanuhu̱ ña nya vehe ña.

⁵⁷Ta chaa̱ quɨvɨ cha cuacacu cha lee sehe cu Elisabet. Cacu̱ cue ta rayɨɨ cuví cue.

⁵⁸Ta cha chiñi̱ ñáyɨvɨ cha nyicú yatyin yuvehe ña ta ñáyɨvɨ chi ña cha tyicuan caa, sɨɨ xaan cuví chi ñu. Ta sɨɨ xaan cuñí tucu maa ña. Vatyi vaha xaan cha sacuvi̱ Nyoo chihin ña.

⁵⁹Ta nu cu uña quɨvɨ cha cacu̱ cue, chaha̱n ñu chihin cue vehe ñuhu. Vatyi cuhva cuenda ñu chi cue chi Nyoo. Ta saha̱ ñu circuncidar chi cue tari cuhva iyó maa ñu. Chahnya̱ ñu chiin ñɨɨ cue nu cuví cue rayɨɨ. Ta cuñí ñu sacunañi ñu Zacarías chi cue tari sutu cue.

⁶⁰Soco sɨhɨ cue catyí ña: ―Ma cuvi. Juan, cunañi cue.

⁶¹Ta quichaha catyí ñu: ―¿Ñáá tuhun sacunañún Juan chi cue? Yori ñáyɨvɨ chi ndo cha nañí tyicuan caa ―catyí ñu.

⁶²Ta quichaha ndaca tuhun ñu chihin seña ri chi sutu cue. Vatyi coto ñu ñáá sɨvɨ cuñí ra cha cunañi cue.

⁶³Ta chica̱n sutu cue noo vitu, ta nuu vitu cuan tyaa̱ ra tyehe caa: “Juan cuví sɨvɨ cue”, tyaa̱ ra. Ta tandɨhɨ maa ñu cuan iyo xaan cuñí ñu tuhun cuan.

⁶⁴Ta nacaha̱n ra Zacarías caa cuhva ri cuan. Ta quichaha̱ sacahnu ra chi Nyoo.

⁶⁵Tandɨhɨ maa ñu iyó yatyin ri yuvehe ñu, yuhví xaan ñu tuhun ihya. Ta tandɨhɨ maa ñáyɨvɨ cha iyó yucu ityi Judea cuan nacatyí ñu chi tahan ñu tuhun ihya.

⁶⁶Ta tandɨhɨ maa ñáyɨvɨ cha chitó tuhun cuan, ndichi̱ xiñi ñu, ta ndaca̱ tuhun ñu chi tahan ñu: ―¿Yóó ra cuví cha lee cuan? ―catyí ñu. Vatyi ndicha, Nyoo nasoco xaan ra chi cue.

⁶⁷Sutu cue, ra Zacarías, tyitú ra chihin Tatyi Ii Nyoo. Tyicuan ta quichaha̱ cahan ra tuhun cha chahá Nyoo chi ra, ta catyí ra:

⁶⁸―Cahnu xaan ra cuví Sutu Mañi yo Nyoo cuenda yo ñu Israel. Vatyi quichi̱ ra nu nyicú yo, cha cuví yo ñáyɨvɨ chi ra. Ta sacacu̱ ra chi yo.

⁶⁹Ta chaha̱ ra noo ra cahnu chi yo, cha cusacacu chi yo. Tata ra David ra cha sacuvi̱ tyiño nuu Nyoo vachi ra.

⁷⁰Tyicuan caa caha̱n Nyoo chihin yuhu ra cacuví profeta cuenda ra ta cha naha.

⁷¹Vatyi tyicuan caa cusacacu ra chi yo ndaha ra xaan iñi chi yo, ra cha tasɨ cuñí nyehé chi yo.

⁷²Tyicuan caa cundahvi cuñí nyehé ra chi ñáyɨvɨ chi yo ta cha naha. Ta ma sanaa ra iñi ra tuhun caha̱n ra.

⁷³Ican ihya tuhun caha̱n Nyoo chihin ra Abraham sutu yo.

⁷⁴Catyí ra vatyi cusacacu ra chi yo ndaha ra xaan iñi chi yo. Vatyi ma yuhvi ca yo sacahnu yo chi ra.

⁷⁵Ta maa ra sanducachi ra iyó yo nuu ra. Ta vaha coo yo nuu ra tandɨhɨ quɨvɨ cha cuacoo yo ñayɨvɨ̱ ―catyí ra Zacarías.

⁷⁶Ta catyí ra Zacarías chi cha lee cuan tyehe caa: ―Ta yoho sehi, profeta Nyoo cahnu cucatyí ñáyɨvɨ chuun. Vatyi cuhun ityi nuu Sutu Mañi yo. ta cucahun tuhun ra chihin ñáyɨvɨ vatyi cha cuñí quichi ra.

⁷⁷Ta cusacoton chi ñáyɨvɨ vatyi cunasaha Nyoo tucahnu iñi cuatyi ñu. Ta tyicuan caa ta cacu añima ñu.

⁷⁸Vatyi Sutu yo Nyoo cuñí ra chi yo. Ta cundahvi cuñí ra chi yo. Ta saquichí ra noo ra tyinyeé chi yo. Tari noo ñuhu̱ ñanyii cucuvi ra.

⁷⁹Vatyi chihin cha sañahá ra chi yo sacundichín ra nu nyicú yo nu ñaa iñi cha catyi cuatyi yo. Ta cusañaha ra chi yo yoso caa quɨhvɨ yo ityi vaha ―catyí ra Zacarías.

⁸⁰Ta cha luhlu cuan cuahan chahnu ra. Nyee cuñí ra chihin Tatyi Ii Nyoo. Ta chicoo̱ ra noo chiqui ndɨɨ nyacua nya quɨvɨ cha chicoho̱n nuu ñáyɨvɨ Israel chi ra.