San Lucas 1:38-80

³⁸A̱nda̱ já na̱cachi María já: —Ndióxi̱ cúú xitoho i̱ ta ná caja mé á tá quia̱hva cúni̱ a̱ xi̱hín i̱. Ná coo tá íin cáchí ndó coo. Tá na̱ndihi na̱cachi María cán ña̱ yóho já na̱quee táto̱ Ndióxi̱ cán cua̱ha̱n.

³⁹Ta mé tañu qui̱vi̱ já já xínu María na̱sa̱ha̱n ñá in ñuu ndáca̱a̱n chí yúcu̱ cuéntá Judea cán.

⁴⁰Ta tá na̱qui̱hvi ñá vehe Zacarías, yíi̱ Elisabet cán já na̱ca̱ha̱n Ndióxi̱ ñá xi̱hi̱n Elisabet.

⁴¹Ta tá na̱xini jo̱ho Elisabet na̱ca̱ha̱n Ndióxi̱ María xi̱hi̱n ñá chí na̱candita ña̱ loho ndáca̱a̱n ti̱xi Elisabet cán chí i̱vi̱ la̱á na̱ndicutú nda̱a̱ ñá xi̱hi̱n ínima̱ yi̱i̱ Ndióxi̱.

⁴²A̱nda̱ já na̱cayuhú cóhó Elisabet já na̱cachi ñá já xi̱hi̱n María: —Ni in túhún toho na̱ji̱hí co̱ó na̱caja máni̱ Ndióxi̱ xi̱hi̱n tá quia̱hva na̱caja máni̱ á yo̱hó. Ta na̱caja yi̱i̱ mé á ja̱hyún.

⁴³Ta co̱ó sa̱ha̱ toho ye̱he̱ ná quisún yóho, ñá cúú náná xitoho i̱ coto nihnún ye̱he̱.

⁴⁴Jáchi̱ tá na̱xini jo̱ho uun i̱ ña̱ na̱ca̱ha̱n Ndiósu̱n xi̱hín i̱ i̱vi̱ la̱á na̱ca̱nda̱ ja̱hyi i̱ ini ti̱xi i̱ jáchi̱ na̱caji̱i̱ íní a̱.

⁴⁵Ta̱hví na̱cuún jáchi̱ na̱candúsún ña̱ na̱cachi Ndióxi̱, xitoho í xu̱hu̱n. Jáchi̱ caja tá caja mé á ña̱ na̱cachi a caja —na̱cachi Elisabet cán xi̱hi̱n María.

⁴⁶A̱nda̱ já na̱cachi María já: Cája cáhnu i̱ Ndióxi̱, xitoho í xi̱hi̱n ínima̱ i̱.

⁴⁷Ta cáji̱i̱ ndiva̱ha ini i̱ xi̱hín ña̱ cája Ndióxi̱, mé a̱ jáca̱cu ye̱he̱.

⁴⁸Jáchi̱ na̱ndicu̱hu̱n ini a sa̱há ye̱he̱, ñá ndáhví, ñá cúú in mozo mé á. Ta cachi ña̱yivi ndúu viti xi̱hín na̱ va̱xi qui̱ví canduu ñuyíví yóho ña̱ na̱caja cua̱ha̱ Ndióxi̱ ña̱ma̱ni̱ xi̱hín i̱.

⁴⁹Jáchi̱ mé Ndióxi̱, mé a̱ cuu caja tócó ndihi ña̱ha na̱caja cua̱há ña̱ náhnu xi̱hín i̱. Ta yi̱i̱ ndiva̱ha qui̱vi̱ mé á.

⁵⁰Ta níí tiempo táhvi̱ ini mé á sa̱ha̱ tócó ndihi ña̱yivi, na̱ cája cáhnu mé á.

⁵¹A̱ ju̱ú quia̱hva náhnu ña̱ha na̱caja mé á. Na̱sa̱hnu̱ a̱ nu̱ú na̱ ndíñehe jícó mé.

⁵²Ta na̱candaa mé á chuun ndahá da̱ náhnu ta na̱jánuu ndáha̱ mé á da̱. Ta na̱ndiñehe jícó mé á na̱ na̱jánuu ndáha̱ mé ñuyíví yóho.

⁵³Ta na̱jándicutú nda̱a̱ mé á ña̱ha nu̱ú na̱ na̱ndima̱ní ña̱ha cuxu. Ta na̱candaa mé á ña̱ na̱sacomí na̱ cui̱cá já na̱taxí a̱ na̱ cán ná quee na cu̱hu̱n na̱.

⁵⁴Na̱chindeé a̱ na̱ Israel, na̱ cája chúun cuéntá mé á. Ta co̱ó na̱ndindójó a̱ ta̱hvi̱ ini a sa̱ha̱ ná.

⁵⁵Jáchi̱ quia̱hva já na̱sa̱ha̱n mé á tu̱hun a caja a̱nda̱ ama cáa qui̱vi̱ xi̱hi̱n Abraham ta xi̱hín tásáhnu jícó yo̱, na̱ na̱quixi chi̱chi mé dá, já na̱cachi María cája cáhnu ñá Ndióxi̱.

⁵⁶Ta na̱cando̱o María na̱sahi̱in ñá vehe Elisabet ti̱xi u̱ni̱ yo̱o̱. A̱nda̱ já na̱quee ñá cuanúhu̱ ñá vehe ñá.

⁵⁷Tá na̱ndindaa qui̱ví cacu ja̱hyi Elisabet já na̱cacu in ta̱a loho.

⁵⁸Ta tócó ndihi ña̱yivi ndúu yati xi̱hi̱n ñá xi̱hín na̱ cúú táhan ñá na̱sa̱ha̱n na̱ xíto nihni na ña̱. Ta cáji̱i̱ íní na̱ jáchi̱ na̱canda̱a̱ ini na ña̱ na̱caja Ndióxi̱ cua̱há ña̱ma̱ni̱ xi̱hi̱n ña̱.

⁵⁹Ta tá na̱xi̱nu̱ ña̱ loho cán u̱na̱ qui̱vi̱ já na̱sa̱ha̱n na̱ na̱chica̱a̱n na̱ marca yiquí cu̱ñu a tátu̱hun íin costumbre na̱. Ta na̱ca̱hán na̱ cananí a̱ Zacarías tá quia̱hva naní tátá a̱.

⁶⁰Joo já na̱cachi Elisabet já: —A̱ cánaní toho da já. Juan va cananí da̱ —na̱cachi ñá xi̱hín na̱ cán.

⁶¹A̱nda̱ já na̱cachi na cán já xi̱hi̱n ña̱: —Ndá cuéntá quéa̱ cananí ja̱hyún já ta ni in túhún toho na̱ vehún co̱ó naní já.

⁶²A̱nda̱ já na̱cuu ndáha̱ ná nu̱ Zacarías cán ña̱ ndáca̱ tu̱hún na̱ da̱ ndaja coo cananí ña̱ loho cán.

⁶³A̱nda̱ já na̱xi̱ca̱ Zacarías cán in tutu nu̱ ná ta já na̱ca̱hyí da̱ já: “Juan cananí da̱.” Tá na̱cahvi na̱ cán ña̱ yóho já na̱catóntó ndihi na.

⁶⁴Ta chí sa̱ mé hora já na̱ndica̱ha̱n tucu Zacarías. Já na̱casáhá da̱ cája cáhnu da Ndióxi̱.

⁶⁵Xi̱hi̱n tócó ndihi ña̱ na̱ya̱ha yóho na̱catóntó ndihi na̱ na̱sanduu yati xi̱hi̱n Zacarías cán. Ta níí cúú ñuu válí ñúhu chí yúcu̱ cuéntá Judea cán na̱ndicui̱ta nuu tu̱hun sa̱ha̱ tócó ndihi ña̱ na̱ya̱ha yóho.

⁶⁶Ta tócó ndihi na̱ na̱xini jo̱ho ña̱ yóho na̱casáhá ndícani ini na sa̱há. Já na̱casáhá ndáca̱ tu̱hún táhan na já cáchí xi̱hi̱n táhan na já: —Ndá ta̱a cacuu ta̱a loho yóho tá ná cuahnu da. Na̱cachi na ña̱ yóho jáchi̱ na̱xini táhyí na̱ ña̱ma̱ni̱ náhnu cája Ndióxi̱ xi̱hín ta̱a loho cán.

⁶⁷A̱nda̱ já na̱ndicutú ínima̱ Zacarías, tátá Juan cán xi̱hi̱n ínima̱ yi̱i̱ Ndióxi̱. Já na̱casáhá da̱ cáha̱n da̱ tu̱hun sáhan Ndióxi̱ nu̱ dá ca̱ha̱n da̱. Já na̱cachi da já:

⁶⁸Cáhnu ná cacuu Ndióxi̱, mé a̱ cúú xitoho ña̱yivi na̱quixi chi̱chi Israel. Jáchi̱ na̱quixi a jáca̱cu a mí, na̱ cúú cuéntá mé á.

⁶⁹Na̱chindahá Ndióxi̱ mé a̱ jáca̱cu mí ná a̱ cúhu̱n yó indayá. Ta íin ndée̱ á caja tócó ndihi ña̱ náhnu. Ta na̱quixi a chi̱chi David, da̱ na̱caja chúun cuéntá Ndióxi̱ sa̱nahá.

⁷⁰Ta ja̱nda̱ sa̱nahá ndiva̱ha na̱sa̱ha̱n Ndióxi̱ tu̱hun a ña̱ caja mé á ña̱ yóho. Ta já na̱jáya̱ha na̱ profeta cán tu̱hun na̱ca̱ha̱n Ndióxi̱ nu̱ú ña̱yivi.

⁷¹Ña̱ na̱cachi mé á quéa̱ jáca̱cu a mí ndahá na̱ i̱hvi̱ yo̱ xi̱hi̱n ndáha̱ na̱ co̱ cúní mí.

⁷²Ta na̱cachi a ta̱hvi̱ ini a sa̱ha̱ tásáhnu jícó yo̱, na̱ na̱sanduu sa̱nahá cán. Ta a̱ ndíndójó toho mé á sa̱há tu̱hun yi̱i̱ na̱sa̱ha̱n nu̱ ná jáchi̱ ña̱ yi̱i̱ cúú tócó ndihi tu̱hun sáhan Ndióxi̱ nu̱ú ña̱yivi.

⁷³Ña̱ yóho cúú tu̱hun na̱cachi Ndióxi̱ jáxi̱nu̱ co̱o a nu̱u̱ tá na̱sa̱ha̱n mé á tu̱hun a nu̱ Abraham, da̱ na̱sacuu tásáhnu jícó yo̱ cán.

⁷⁴Ta na̱cachi mé á xi̱hi̱n dá ña̱ jáca̱cu a mí ndahá na̱ co̱ cúní mí já ná a̱ cáyi̱hví yo̱ caja chúun í cuéntá mé á.

⁷⁵Ta já ná cacuú ña̱yivi nda̱a̱, na̱ na̱ndiquia̱hva mé caja ña̱ cúni̱ mé á tócó ndihi qui̱vi̱ ndúú ñuyíví yóho, na̱cachi Zacarías nu̱ ndíhi ña̱yivi cán.

⁷⁶A̱nda̱ já na̱casáhá da̱ cáha̱n da̱ xi̱hín ña̱ loho ja̱hyi da já cáchí da̱ já xi̱hi̱n á: Ta yóhó, ja̱hyi a, cachi ña̱yivi sa̱hu̱n ña̱ cúún in profeta Ndióxi̱, mé a̱ cúú cáhnu nu̱ ndíhi a. Ta jihna ñúhú cu̱hún jáca̱hún ña̱yivi ña̱ ná cacu tia̱hva na ínima̱ ná ndiquehe na mé a̱ chindahá Ndióxi̱ va̱xi.

⁷⁷Ta xi̱hín ña̱ yóho cuu ca̱xi tu̱hún xi̱hín ña̱yivi ña̱ cája cáhnu ini Ndióxi̱ sa̱há cua̱chi na. Já ná cuu ca̱cu ndaa ínima̱ ná ná a̱ cúhu̱n na̱ indayá.

⁷⁸Sa̱há ña̱ quíhvi̱ ini Ndióxi̱ mí ta sa̱há ña̱ táhvi̱ ini mé á sa̱ha̱ yo̱ sa̱há ña̱ cán quéa̱ ja̱nda̱ indiví nu̱ íin mé á na̱chindahá a̱ in a cuu chindeé a̱ mí ná ndi̱hví ichí sa̱á cuéntá mé á.

⁷⁹Jáchi̱ va̱xi a jándiye̱he̱ a̱ nu̱ú ña̱yivi ndúu nu̱ú naá ña̱ ná caca na íchi̱ nu̱ú cuu coo va̱ha ini na xi̱hi̱n Ndióxi̱, na̱cachi Zacarías xi̱hín ja̱hyi loho da.

⁸⁰Já na̱casáhá sáhnu ta̱a loho cán cua̱ha̱n da̱. Ta ndíndacú da̱ xi̱hín ña̱ha Ndióxi̱ viti. Ta na̱sahi̱in da yucú íchí nu̱ú co̱ ndúu cua̱há ña̱yivi ja̱nda̱ quia̱hva na̱xi̱nu̱ qui̱ví na̱casáhá jána̱ha̱ da̱ nu̱ú na̱ Israel.