SAN LUCAS 1:38-80

³⁸Maríana anjilta niran: «Tayta Diosninchipa maquinćhu cawä. Nishayquinuylla camacächun.» Chaynuy niptin, anjil aywacuran.

³⁹Chaypita María juclla camaricuriycur, puntan-puntan Judá quinranćhu juc marcaman aywaran.

⁴⁰Zacaríaspa wasinman ćhayar, tïyan Isabelta wamayaran.

⁴¹María wamayaptin paćhanćhu caycällar, Isabelpa wamra cuyuriran. Espíritu Santu rimachiptin sumaj cushicushpan wiyächipaypa Isabel niran:

⁴²«María, chay-chicaj warmi captinsi, ima allish Tayta Diosninchi jamllata acracushcashunqui. Wamrayquitapis acracusha. Ishcaniquita yanapayculläshunqui.

⁴³¿Imaraj carä Washäcujpa maman watucamänanpäga?

⁴⁴Watucamar shimiquita wiyaptï, wamräsi cushicuyllawan paćhäćhu cuyuriran.

⁴⁵Tayta Diosninchipa shiminta aunishayquipita cushish cawaj-aywanqui.»

⁴⁶Chaura María niran: «Llapan shungüwan Tayta Diosninchita alliman ćhurä.

⁴⁷Jatunpa cushicü. Tayta Diosninchi Washäcujnï.

⁴⁸Runacuna pampaman ćhuramaptinsi, Tayta Diosninchi llaquipämasha. Cananpita llapan runa ninga: ‹Ima allish Tayta Diosninchi Maríata acracusha. Imaraj cushicun.›

⁴⁹Mana tantiyashäcunata Munayniyuj Tayta Diosninchi camacächisha. Payga manchapacuypämi. Imatapis allillata ruran.

⁵⁰Manchapacujcunata imaypis Tayta Diosninchi llaquipan.

⁵¹Munayniyuj cayninwan imatapis camacächin. Sumaj-tucujcunata mashtaypa-mashtar ushyarin.

⁵²Alli-tucuj mandajcunata jargun. Pampaman ćhurashcunata alliman ćhuran.

⁵³Puchuy-puchuy jananćhu cawajcunata pishipacuyman ćhuran. Pishipacuyćhu cawajcunata puchupacushancaman tarichin.

⁵⁴Maquinćhu cawaptinchi, Israel runa-masintïta yanapaycäman. Imaypis llaquipaycämanchi.

⁵⁵Auquillü Abrahamta aunishan-jina, willcancunata aunishan-jina imaypis mana jungamangachu. Canancamanpis yanapaycäman.»

⁵⁶Quimsa quilla-yupay tïyan Isabelpa wasinćhu María juyaran. Jinarcur wasinpa cuticuran.

⁵⁷Quillan ćhayamuptin, Isabel ullgu wamranta jishyacuran.

⁵⁸Jishyacuptin, castancunapis, ricsinacushancunapis watucuran. Jatunpa cushicuran: «Ima allish Tayta Diosninchi yanapashcashunqui wawata tarinayquipaj» nir.

⁵⁹Wamra pusaj junajyuj captin yaćhachishancunata ćharcur, mallwata jïruran. Papäninpa jutinwan tincunanpaj: «Zacarías» nir jutichayta munaran.

⁶⁰Maman niran: «Mana. Juanmi jutinga.»

⁶¹Runacunam ichanga niran: «Juan jutiyuj castayquicunapis mana canchu.»

⁶²Chaymi ima jutinta ćhurapänanpäpis maquillanwan tantiyachir, Zacaríasta tapuran.

⁶³Tapuptin, papilta mañarcur: «Juanmi jutin» nir isquirbiran. Chaura llapan mancharicäcuran.

⁶⁴Zacaríasna rimariran. Tayta Diosninchita alliman ćhuraran.

⁶⁵Chaura Zacaríaspa castancuna, Isabelpa castancuna sumaj manchariran. Rimay ćhayaptin, Judea quinranćhüpis runacuna manchariran.

⁶⁶Chay willapata mayar, yarpaćhacuran: «¿Imapäraj Isabelpa wamran yurisha? Llapan alli ricanga» nir. Isabelpa wamranta Tayta Diosninchi yanapaycashanta llapan runa musyaran.

⁶⁷Espíritu Santu rimachiptin Tayta Diosninchi yarpashanta musyachicur, Zacarías niran:

⁶⁸«Ima allish Tayta Diosninchi Israel runacunata mana junganchu. Payga shamusha nuwanchita jishpichimänanchipaj.

⁶⁹Wiyacuj Davidpa castallanpita munayniyuj runata jatarachisha washämänanchipaj.

⁷⁰Chaynuy cananpaj unay willacujnincunawan Tayta Diosninchi musyachicuran.

⁷¹Musyachimaranchi ñacachicuj runacunapita washämänanchitapis, chiquicuj runacunapita jishpichimänanchitapis,

⁷²auquillunchicunata llaquipar aunishanta ćharcucänantapis.

⁷³Auquillunchi Abrahamta Tayta Diosninchi auniran

⁷⁴allilla cawananchipaj, chiqui runacunapita jishpichimänanchipaj. Maquinćhu cawaycar,

⁷⁵shungun yarpashallanta rurashunpaj. Wañuyman ćhayashanchicaman llapan juchapita wanacushunpaj.»

⁷⁶Wamran Juanta Zacarías niran: «Wawallau wawa, jamta: ‹Llapanta Camaj Tayta Diosninchipa willacujnin› nishunquipaj. Washäcujta ñaupapanquipaj. Runacunata willapanquipaj Washäcujta shuyaränanpaj.

⁷⁷Tantiyachinquipaj: ‹Tayta Diosninchi juchanchita jungaycur, washämäshunpaj› nir.»

⁷⁸«Inti jigamuptin pacha achicyashan-jina shungunchipis achicyacäcunga llaquipäcuj Tayta Diosninchi Washäcujta caćhamuptin.

⁷⁹Tayta Diosninchita mana wiyacur, llapanchi wañuy jananćhu cawaycanchi. Washäcuj shamurmi ichanga, alli cawayta tarichimäshun. Yanapämäshun Tayta Diosninchipa maquinćhu manchapacur cawananchipaj.»

⁸⁰Chaura wiñashanman-tupu Juan runayaran. Espíritu Santu shacyächiptinpis, Tayta Diosninchipa shungun munashannuylla cawaran. Ichanga yatalla tiyacuran. Tayta Diosninchipa shiminta Israel-masincunata willapayta jallaycurraj llapan ricay puriran.