San Lucas 1:38-80

³⁸Ábati taríñagun María. —Lidámun Nabúreme Búngiu nugúya, adǘgaleí le baríñagubei náu. Lárigiñe, ába lídin ánjeli.

³⁹Lídoun dan ligía, ába tídin María furése lídoun ában ubúrugu le labádinaguabei buri wǘbü Judéa,

⁴⁰ába tebélurun lúbiñoun Zacarías, ába tabúsurun tun Elisabét.

⁴¹Dan le tagáambuni Elisabét tabúsurun, ába lánjingichagun tiraǘ turágeirugu, ába liábin Sífiri Sándu tuágun.

⁴²Ábati taríñagun láu umálali le jéreti. —Binílaadibu Búngiu sügǘ jáu sun jiñáriñu, binílaali gíñe biraǘ.

⁴³¿Cátanañadina lun tiábin lúguchu Nabúreme bisídana?

⁴⁴Láu nagáambuni babúsurun, ába lánjingichagun niraǘ nurágeirugu láu ugúndani.

⁴⁵Gúndaatibu bugúya le afíñerubei, luágu lagúnfuliruba lan cátei le laríñagubei Wabúreme bun.

⁴⁶Ábati taríñagun María. Rútu nuwáni uweíriguni lun Nabúreme,

⁴⁷gúndaagua tugúya nanígi luágu Búngiu le Nasálbaragüle,

⁴⁸lugúndun gudémejabujaali nun, nugúya le lidámun. Lúmagiñe guelé, jaríñaguba sun gürígia luágu fuleíseiwaadina lan,

⁴⁹ladǘga adǘgaali Búngiu, le Súnti Gabáfu, cátei weínamuti nun, sánduti líri.

⁵⁰Súnwandan gudémebaña lan ja inébejabúbaña lun, lun.

⁵¹Adúgaali oúnwenbun buri cátei, adǘgaali lun ni cáta jamá ja barǘguabaña joúngua.

⁵²Gidálaaña ja gabáfubaña lídaangiñe jaweírigun, ja ǘnabubaña, ába ladǘgüniña lun weírigu jamá.

⁵³Já buga lamábaña, quimúlegüda lumútiña, ánjeinti ja rísibaña, míchugunti ni cáta joun.

⁵⁴Íderagua lumútiña linásiñun Israél, ja esériwidubaña lun, mabúlieidun lumúti lun gudémejabu lan,

⁵⁵queí meja lidáradun jáma binádu wagǘbürigu— Abrahám jáma ladǘgawagun—lun gudémejabu lan joun lun sun dan.

⁵⁶Ába teréderun María ǘrüwa játi ñi, lárigiñe, ába tagíribudun jábiñoun.

⁵⁷Ába lagúnfulirun dan lun tagǘriajan Elisabét, ába tagǘriajan ában wügǘri irájü.

⁵⁸Dan le jagáambun tubésinanigu jáma tidújeñu luágu lubuídun cátei le ladǘgübei Búngiu tun, ába jagúndaarun úara túma.

⁵⁹Luágu liwídün wéyu, ába lerésibiruni circuncisión, le liseíni luágu láni lan Búngiu irájü ligía. Buséntiña yebéti jíchuguni líri lúguchi luágu, le Zacarías,

⁶⁰ába taríñagun lúguchu. —Uá, Juánba líri.

⁶¹Ába jaríñagun tun. —¿Cági uágu? Úati ni ában jádaangiñe binébaanfaangu gíriti Juan.

⁶²Ába jálügüdüni lúguchi irájü láu seíni ca lan íri labúseerubei líchugun luágu.

⁶³Ába lamúriajan ában murúsun fuláansu, ába labǘrüdün luágun. “Juan líribei.” Ába laweíridun janígi súngubei láu cátei le.

⁶⁴Lídan méme óra ligía, ába gayáraajaali lan ladímurejan Zacarías, ába líchugun uweíriguni lun Búngiu.

⁶⁵Ába laweíridun janígi besínagu láu cátei le, ába labájüdawagún cátei le lídan sun fulásu geyégua jáu.

⁶⁶Sun ja agáambubalin, ába jeréderun asáminara, ába jálügüdagun jámagua, jaríñaga. —¿Cáteibeí funasan irájü le? Ladǘga biní lumútija Búngiu le tímatimaati.

⁶⁷Ába liábin Sífiri Sándu luágun Zacarías, le lúguchi irájü ligía, ába ladímurejani Zacarías dimúrei le laríñagubei Búngiu lun, ába laríñagun.

⁶⁸Buídulá ladímurejoún luágu Wabúreme le Jabúngiutebei gürígia ja Israelítagu, ladǘga ñǘbinjali woun, wagía le lánigu, áni sálba láadiwa.

⁶⁹Rújali ában Asálbaragülei le gabáfuti woun jádaangiñe linébaanfaangu Davíd, lé meja esériwidubei lun.

⁷⁰Ítara líña meja laríñaguni Búngiu jádaangiñe láni profétagu ja edéregeragubaña joúngua lun, lúmagiñe meja binádu dan,

⁷¹luágu lasálbarubádiwa lan jaweí wáganiñu lúma jaweí sun ja iyéreejabúbaña woun.

⁷²Ítara líña gudémejabu lan Búngiu joun binádu wagǘbürigu, arúfudaleí luágu mabúlieidagun lan lueí lidáradun le sándubei jáma.

⁷³Niján lé meja laríñagubei lun wáguchi Abrahám.

⁷⁴luágu leséfurubadíwa lan jaweí wáganiñu, lun gayáraabei lan wesériwidun lun manúfudeiga,

⁷⁵láu úarani, derégeguñu wagía woúngua lun, sun dan le wabágaridubei.

⁷⁶Áni bugúya nisáaniraü, láni Búngiu le íñubei proféta lúba bagúarúniwa, ladǘga baráansejaba lubá Wabúreme,

⁷⁷subúdi lámuga ǘma lánina asálbaruni joun lánigu, le áubei ferúdunawa lan jafígoun.

⁷⁸Wabúngiute, láu lísiñejabu lúma lugúdemejabu, loúnajabei Crístu wámoun siélugiñe

⁷⁹lun larúgoungadágüdün jáu ja lídaanbaña lubúriga lúma jáu ja luágubaña ǘma le oúwenibei lébeja, lúma lun ladúndejani wapásun lídoun ǘma le anǘgübaliwa lídoun darángilaü.

⁸⁰Aweírideina ligíati irájü ligía, afáragadagueina gíñe lídan láni espíritu. Ába laganoún lídan fulásu mageírawati darí lúmoun wéyu le lagúmeserun luwádigimari lun Búngiu jagánagua lumútuniña Búngiu ja Israelítagu.