San Lucas 1:38-80

³⁸Naꞌll lle Maríanꞌ anglenꞌ: —Ni zoaꞌ nakaꞌ beꞌnn wen llin keꞌe, wakse gon Diosenꞌ kiaꞌ kanꞌ ba bneꞌo nga. Kaꞌ gok, naꞌ bazaꞌa anglenꞌ zayejeꞌ.

³⁹Bde chop chonn lla, le byejte Maríanꞌ to yell da llia rao yaꞌ ganꞌ nbane Judea.

⁴⁰Naꞌ bllineꞌ rill Zacaríasenꞌ, naꞌ byoeꞌ bwapeꞌ Elisabetenꞌ lliox.

⁴¹Bixha kate bene Elisabetenꞌ balwill Maríanꞌ leꞌe, le bxhiꞌtte bdaꞌo keꞌen lo leꞌen, naꞌ Spíritu ke Diosenꞌ byoꞌn yichjraꞌlldaꞌweꞌ.

⁴²Naꞌ bawereꞌ kwis bnneꞌe zillj, lleꞌe Maríanꞌ: —Dios ba benlaꞌyeꞌ rweꞌ rao yeololte noꞌre, leskaꞌ bdaꞌo koꞌon nak laꞌybeꞌ.

⁴³Xhnaꞌ Xanllo ba nakoꞌ, ker bi zaꞌkandaꞌ. ¿Bixchen zadraꞌnnzoꞌ nadaꞌ?

⁴⁴Kate bnneꞌon, le bxhiꞌtte bdaꞌo kiaꞌn lo liaꞌn bawebeꞌ.

⁴⁵Nbaraz koꞌo rweꞌ ba byejleꞌo, da li gonte Diosenꞌ kanꞌ ba golleꞌ rweꞌn.

⁴⁶Naꞌll bne Maríanꞌ lloeꞌraweꞌ Dios: Lloeꞌrawaꞌ Diosenꞌ do yichj do raꞌllaꞌ.

⁴⁷Naꞌ lo yichjraꞌlldaꞌwaꞌ llaweraꞌ, le Diosenꞌ nakeꞌ wasrá kiaꞌ.

⁴⁸Laꞌkze nakaꞌ ka to beꞌnn wen llin, bibi zaꞌkaꞌ, Diosenꞌ bayaꞌchraꞌlleꞌ nadaꞌ. Naꞌ beꞌnn zan beꞌnn llaꞌa nnaꞌ, naꞌ beꞌnn za chaꞌa yellrio ni, nne akeꞌ kiaꞌ: “Nbaraz ke noꞌrenꞌ.”

⁴⁹Diosenꞌ nakeꞌ beꞌnn wen, napeꞌ yel wak xhen, ba beneꞌ da wen kwis kiaꞌ. ¡Leꞌe nak laꞌye kwis!

⁵⁰Noteze beꞌnn llape Diosenꞌ baraꞌnne, leskaꞌ Diosenꞌ wayaꞌchraꞌlleꞌ leakeꞌ.

⁵¹Naꞌll ba broeꞌreꞌ yel wak xhen keꞌen, naꞌ bachinnjeꞌ xhbab ke beꞌnn yaꞌraꞌll kaꞌ.

⁵²Beꞌnn llnebiaꞌ, beꞌnn llon ka beꞌnn brao, ba blliꞌyeꞌ beꞌnn kaꞌ kaꞌle, naꞌ blepeꞌ beꞌnn yaꞌch, beꞌnn nexjraꞌll kaꞌ.

⁵³Beꞌnn yaꞌche, beꞌnn don, ba beꞌe leakeꞌ ka yerj akreꞌ, zan beꞌnn wniaꞌ kaꞌ, laꞌkze bze taꞌk akeꞌ, bibi beꞌe leakeꞌ.

⁵⁴Ba gokreneꞌ Israelenꞌ, le yell keꞌen, le jadinraꞌlleꞌ wayaꞌchraꞌlleꞌ leakeꞌ.

⁵⁵Ka diꞌll beꞌreneꞌ xozxtaꞌollo Abraham, bneꞌe gonlaꞌyeꞌ yeolol xhiꞌnneꞌ za chaꞌa.

⁵⁶Chonn beꞌo bzorén Maríanꞌ Elisabetenꞌ, naꞌll bazeꞌe zayej rilleꞌ.

⁵⁷Bixha kate bllin lla garj bdaꞌo ke Elisabetenꞌ, bzo to bidaꞌo byio.

⁵⁸Ka gokbeꞌe biꞌch lwelljeꞌ kaꞌ, naꞌ beꞌnn wrill ke akeꞌ, kanꞌ ba gokrén Diosenꞌ Elisabetenꞌ, ren akeꞌ bawerén akreꞌ leꞌe.

⁵⁹Gok xoꞌn lla naꞌ, jweꞌebeꞌ bzobeꞌ sen danꞌ nziꞌi circuncisión. Naꞌ gokraꞌll akeꞌ wsiꞌi akebeꞌ kanꞌ re xabeꞌn, Zacarías.

⁶⁰Naꞌ xhnaꞌbeꞌn bneꞌe: —Kaꞌa, bi siꞌbeꞌ kaꞌ, Juan, siꞌbeꞌ.

⁶¹Naꞌ lle akeꞌ leꞌe: —¿Bixchen? Nono biꞌch lwelljre llraꞌ beꞌnn re kaꞌ.

⁶²Naꞌll ben akeꞌ sen rao xabeꞌn, llnnab akreꞌ leꞌe akre lleꞌnreꞌ siꞌi bdaꞌon.

⁶³Naꞌ bnnabeꞌ to bray daꞌo, naꞌ bzojeꞌn bllieꞌn: “Juan, siꞌbeꞌ.” Yeolol beꞌnn kaꞌ llabán akreꞌ.

⁶⁴Naꞌ le gokte banné Zacaríasenꞌ, le bzoraote lloeꞌraweꞌ Dios.

⁶⁵Yeolol beꞌnn wrill ke akeꞌ kaꞌ, blleb akeꞌ kwis, naꞌ yeolol yell kaꞌ zjalliꞌ radj yaꞌ kaꞌ, doxhen yaꞌn ganꞌ nbane Judeanꞌ, goslas diꞌll kanꞌ goken.

⁶⁶Naꞌ yeolol beꞌnn kaꞌ llene diꞌllenꞌ, da xhen llayón akeꞌ xhbab lo yichjraꞌlldaꞌo akeꞌ, ne akeꞌ: —¿Notek gak bidaꞌon? Le nakbieꞌtekze llonlaꞌy Diosenꞌ lebeꞌ tlla tlla.

⁶⁷Spíritu ke Diosenꞌ byoꞌn yichjraꞌlldaꞌo Zacaríasenꞌ, naꞌ benen nench beꞌe diꞌll ki:

⁶⁸Nak laꞌy kwis Xanllo Diosenꞌ ke lliꞌo beꞌnn Israel, le ba breꞌe nench yesreꞌe lliꞌo nakllo yell keꞌe.

⁶⁹Rao dialla David beꞌnn ben xchin Dios batnaꞌ, ba bliseꞌ to beꞌnn nap yel wak nench yesreꞌe lliꞌo.

⁷⁰Ka diꞌllenꞌ beꞌrén Diosenꞌ beꞌnn kaꞌ, beꞌe xtiꞌlleꞌn kanaꞌ, le leakeꞌn bzejnieꞌ akreꞌ beꞌnn xtiꞌlleꞌn.

⁷¹Bchebeꞌ yesreꞌe lliꞌo rao naꞌa beꞌnn kaꞌ, bi zorén lliꞌo wen, naꞌ rao naꞌa beꞌnn kaꞌ, llwie lliꞌo.

⁷²Naꞌ bchebeꞌ wayaꞌchraꞌlleꞌ xozxtaꞌollo kaꞌ, naꞌ bi kwej yichjeꞌ ka diꞌllenꞌ beꞌreneꞌ leakeꞌn.

⁷³Leskaꞌ golleꞌ xozxtaꞌollo Abraham naꞌ,

⁷⁴wllin lla kate yesreꞌe lliꞌo rao naꞌa beꞌnn kaꞌ llwie lliꞌon, nench gak weꞌraolloeꞌ, billbi nxholl sollo chaꞌ gonllo xchineꞌn.

⁷⁵Naꞌllenꞌ gonllo da wen, gakllo rallneꞌe ke chnare.

⁷⁶Naꞌ rweꞌ, xhiꞌnnaꞌ, beꞌnn lloeꞌ xtiꞌll Dios beꞌnn zo yebá, nne akeꞌ koꞌo, rweꞌ kwiarao rao Xanllonꞌ, gonchaꞌo gonoꞌ xhnid ganꞌ tieꞌn.

⁷⁷Rweꞌ wzejnieꞌroꞌ beꞌnn Israel kaꞌ, kanꞌ lleꞌne Diosenꞌ yeziꞌxheneꞌ da xhinnj ke akeꞌn, naꞌ kanꞌ lleꞌnreꞌ yesreꞌe leakeꞌ.

⁷⁸Dios kellonꞌ, yel llayaꞌchraꞌll keꞌen ba beneꞌ, nnaꞌ reꞌllo beniꞌn zaꞌa yebá.

⁷⁹Beꞌnn llaꞌa xchole, ka ga de yel got, reꞌe akreꞌ beniꞌ keꞌen, naꞌllenꞌ reꞌllo garenꞌ kaꞌllo, naꞌ chejnieꞌllo ka gonllo nench chaꞌllo wen.

⁸⁰Bixha bidaꞌon zjaze ll-lliꞌobeꞌ, llejnieꞌtebeꞌ doxhen kanꞌ lleꞌne Diosenꞌ, naꞌ bzoteze bzobeꞌ yiꞌxe ga nak latj dach, bllinte lla broeꞌraobeꞌ beꞌnn Israel kaꞌ.