San Lucas 1:12-52

¹²Zacarias angelta ricusha ashcata manzharira.

¹³Chi angel randi paita cuintara, Zacarias nisha, ama manzharinguichu. Dios can paita tapuushcata uyasha rangami, camba huarmi Isabel shuc cari huahuata huahuayangami nira. Huahuayacpi Juan nishcata shutichingui nira.

¹⁴Chi huahuata huahuayacpi cushiyanguimi, chasnallata camba churimanda ashca runagunahuas cushiyangaunami nira.

¹⁵Diospacpi yapa balic runa tucungami. Paiga vinotas ima machachina yacutahuas mana upingachu. Astahuanbas pai pagarishca urasmanda Diospa Samai yuyaita cushcami anga.

¹⁶Pai chasna asha israel runagunata yachachicpi ashcaguna jatun Diosta cuti catingaunami.

¹⁷Dios cachamungaraushca runa shamunagama camba churi runagunata yachachiungami. Camba churi ñaupa causac Eliascuinta Diospa yuyaihuan ushaihuanbas puringami. Chasna purisha yachachisha yayagunahuan churigunahuan alichingami, mana uyac runaguna uyac tucungahua pai camachingami. Chasna camachisha tucui runagunata yachachingami Dios cachamungaraushca runata catinauchun nisha.

¹⁸Angel chasna rimacpi Zacarias tapura, Can sirtupacha rimashcata imasata yachasha. Ñáuca yapa rucu mani, ñuca huarmihuas huahuata mana tupaibac, paihuas yapa rucu man nira.

¹⁹Chasna nicpi angel rimara, Ñáuca Gabriel mani, Diospacpi shayac mani nira. Pai ñucata cachahuarami cai cushi shimitaga canda rimangahua.

²⁰Ñáuca rimashca shimiga sirtu pactaringami. Cunanga ñuca rimashca shimita can mana quirishcamanda shuc shimitas mana rimac tucungui, ñuca rimashcashina camba churi pacarinagama mudu tucungui nira.

²¹Angel Zacariashuan rimaushcai tucui canzhaibi auc runaguna pai imamanda Diosta alabana huasi ucuibi unaita tiyaushcata mana yachanaurachu.

²²Zacarias ña llucshisha rimanata mana usharachu. Mudu mana rimac tucusha maquillahuan ricuchira. Chasna racpi runaguna asirtanaura pai Diosta alabana huasi ucuibi tiyausha muscuibicuinta ricushcata.

²³Diosta alabana huasibi tarabashcahuasha Zacarias paihua quiquin huasima rira.

²⁴Mana unayasha paihua huarmi huicsayara. Chasna huicsayasha paihua huarmi pichca (5) quillagama huasimanda mana canzhama llucshira.

²⁵Chasna huicsayashami Dios cunan ñucahuacpi yapa alita rashcami nisha rimara, ñuca llaquirishcata pai pasachishcami huahuata mana tupac ashcamanda runaguna ama mas asihuanauchun nisha.

²⁶Sucta (6) quillahuasha Dios paihua angel Gabrielta provincia Galileama cachara Nazaret nishca llactama.

²⁷Paita cachara shuc Maria nishca malta huarmihuagma. Chi huarmiga ñaupa causac israelgunata mandac rey amu Davidmanda mirai mara, Jose nishca runa tapushca mara.

²⁸Angel shamusha Mariata rimara, Cambagma shamuni canda rimangahua. Diosca cambacpi tiyaun. Tucui huarmigunamanda balichishca tucunguimi can.

²⁹Chasna rimacpi Maria yapa manzharisha, Imangahuata chasna rimahuan nisha yuyarira.

³⁰Pai chasna yuyariucpi angel nira, Ama manzharichu Maria. Diospacpi balichishca mangui.

³¹Huahuata huahuayanguimi, carihuahuata. Paita Jesus nishcata shutichingui.

³²Pai yapa ali mandac amu tucungami. Jahuapachai Diospa Churi nishcami anga. Camba churi paihua huañuc apayaya rey amu Davidcuintallata mandac tucunga jatun Dios munashcaraicumi.

³³Chasna rasha tucui israel runagunata huiñai mandagmi tucunga. Pai mandanaga ima uraspas mana tucuringachu.

³⁴Chita uyasha Maria angelta rimashca, Cari illac mani. Imasata ñucaga huahuayasha cari illacca.

³⁵Angel randi paita rimashca, Diospa Samai cambagmami shamunga. Jatun Diospa ushaihuanmi puyucuinta cataitucungui. Chimanda can huahuayangaraushca churiga jucha illac manga, Diospa Churi man nishca tucunga.

³⁶Chasnallata canda nini camba aillu Isabel ña apa aushcai huahuayasha shuc churita charingami. Mana huahuayagashallata cunanga sucta (6) quilla tuputa charishca.

³⁷Dios tucuitaga ushac man nisha angel rimashca.

³⁸Tucuita uyashcahuasha Maria rimashca, Jatun Diosta cadsuc mani, chasna tucuchun can rimashcacuinta. Chasna rimashcahuasha paihuagmanda angel llucshisha rira.

³⁹Angel cuintashcahuasha mana unayasha Maria Judea provinciama shuc llactai rira urcu partita.

⁴⁰Chima pactasha Zacariaspa huasima yaicusha Isabelta saludara.

⁴¹Saludashcata Isabel uyacpi paihua huicsa ucuibi auc huahua cushparira. Isabel Diospa Samaihuan yaicushca asha cushihuan rimashca,

⁴²Tucui huarmigunamanda Dios canda mas yali balichishca mangui nira. Camba huahuas Diospacpi balichishcami saquiringa.

⁴³Mana balicchani ñuca jatun amuhua mama ñucama shamungahua.

⁴⁴Ñáucata can saludacpimi ñuca huicsa ucui tiyauc huahuaga cushihuan cushparihuara.

⁴⁵Dios canda rimashca shimi pactaringaraushcata can quirishcamandami cushi mangui nisha Isabel rimashca.

⁴⁶Isabel rimashcahuasha Mariaga casna nisha Diosta alabara, Ñáuca shungu ucui jatun Diosta yapa balichiuni.

⁴⁷Pai quishpichic ashcamanda ñuca tucui shunguhuan cushiyani.

⁴⁸Ñáuca Diosta cadsuc, pugri agllaita ñucata yuyarihuashcami. Cunanmanda tucui runaguna ñucamanda Dios paita balichishcami nishami cuintangaraunguna.

⁴⁹Tucuita rac Dios jatun rashcataga ñucahuacpi rashcami. Paiga jucha illac sumac man.

⁵⁰Pundamanda huiñaigama tucui paita manzhac runagunata yuyarisha yanapashami cuiran.

⁵¹Pai rashcagunamanda ushaita ricuchishcami. Balic mani nisha alabariccunata anchuchishcami.

⁵²Mandac runagunataga paiguna mandanamanda Dios llucshichishcami, randi mana balichishca runagunataga mandac tucushun nisha churashcami.