San Lucas 12:9-47

⁹To⁴nca³ je² xi³ coi⁴tso⁴ nqui³xcon⁴ cho⁴ta⁴ nca³ tsi² tsˀan⁴, cˀoa⁴²-ti⁴ sˀe⁴ˀma³-le⁴ nqui³xcon⁴ a²ncje⁴-le⁴ Ni³na¹.

¹⁰Je² nca³tsˀi³ xi³ nchja⁴ˀaon³-le⁴ ˀnti¹-le⁴ cho⁴ta⁴, cˀoa⁴-sˀin² cha⁴tˀa³-le⁴, to⁴nca³ je² xi³ nchja⁴ˀaon³-le⁴ je² Espíritu Santo, li²coi³ cha⁴tˀa³-le⁴.

¹¹Cˀia⁴ nca³ cjoa⁴ˀai¹cao⁴-no³ ntˀia³ sinagoga, cˀoa⁴ ya⁴ nqui³xcon⁴ cho⁴ta⁴ti¹tjon² cao⁴ cho⁴ta⁴xa¹, a³li² vˀe²xcon¹-jin²lao⁴³ jo³-sˀin² a³xo⁴ jme³-ni³ xi³ coi⁴no²cjoao⁴³ a³xo⁴ jme³-ni³ xi³ coi⁴xon¹³.

¹²Nca⁴ je² Espíritu Santo coi⁴tso⁴ya³-no³ nca³ ti⁴coi³-ni³ hora jña³-le⁴ xi³ ma³chjen¹ nca³ coi⁴xon¹³.

¹³Qui³tso²jnco³-le⁴ xi³ tsˀe⁴ cho⁴ta⁴ncjin²: Maestro, cˀoa⁴tˀin²-lai⁴ ntsˀe³ nca³ ca²ta³si¹jao²ya³ je² cjoa⁴tjao² xi³ sˀe⁴-na³jin⁴.

¹⁴To⁴nca³ Jesús qui³tso²-le⁴: Ji³ xˀin⁴, ˀya¹ xi³ qui³si³cˀe¹jna³-na³ jo³-ni³ xca²le⁴ nca³ an³ si³jao²ya³-no³ tso³jmi² xi³ tsaon⁴³.

¹⁵Cˀia⁴ Jesús qui³tso²-le⁴ nca³tsˀi³: Cho¹tsaon³, cˀoa⁴ ti⁴coi²ntao³ yao³-no³ ja⁴tˀa³tsˀe⁴ nca³yi³je³ cjoa⁴chi⁴nca⁴, nca⁴ je² cjoa⁴vi³jna³chon³-le⁴vi⁴ cho⁴ta⁴, a³li²coi³-jin² xi³ tso²-ni³le⁴ nca³ ncjin² tso³jmi² xi³ tjin¹-le⁴.

¹⁶Cˀia⁴ qui³tso²ya³-le⁴ jnco³ cjoa⁴xco¹son², qui³tso²: Tse³ tso³jmi² qui³tsjoa³ je² na³nqui³-le⁴ jnco³ cho⁴ta⁴nchi⁴na¹.

¹⁷Je² ti¹fa²cao⁴ jco⁴, ti¹tso²: Jme¹ xi³ sˀian³, nca⁴ tsin²-na³ jña³ coi³ncha³xcoa¹³ tso³jmi²-na⁴ xi³ ma³jcha¹.

¹⁸Cˀoa⁴qui³tso²: Je²-vi⁴ cˀoa⁴sˀian³. Si³qui³xo²ya³ ni³ncˀa³-na⁴, cˀoa⁴ cˀoe³nta³ xi³ nqui²sa⁴ je³. Ya⁴-ve⁴ coi³ncha³xcoa¹³ nca³yi³je³ xi³ coan⁴jcha¹-na³ cao⁴ tso³jmi²-na⁴.

¹⁹Cˀoa⁴xin¹-le⁴ ni⁴ma⁴-na⁴: Ni⁴ma⁴, cjai¹nca³ ncjin² tso³jmi² tjin¹-li² xi³ ncjin² no¹ si⁴ncha¹tjao². Ti⁴cja¹yai³, ti⁴chi³, tˀoi⁴, cjoa¹ya³tsjoai³ ta³coin²³.

²⁰To⁴nca³ Ni³na¹ qui³tso²-le⁴: Chi⁴coin¹³, je² ni⁴tjen⁴-vi⁴ cjoa⁴ˀai¹ si¹je¹-nca¹ni³ ni⁴ma⁴-li⁴, cˀoa⁴ nca³yi³je³ xi³ to⁴nqui³-ni³ tjio¹nta³-li², ˀya¹ tsˀe⁴ coan⁴.

²¹Cˀoa⁴-sˀin² je² xi³ vˀe¹xco¹-le⁴ yao³-le⁴ cjoa⁴nchi⁴na¹ xi³ ti⁴tˀa³tsˀe⁴-ni³, a³li² nchi⁴na¹-jin² tˀa³tsˀe⁴ Ni³na¹.

²²Cˀia⁴ Jesús qui³tso²-le⁴ cho⁴ta⁴-le⁴: Coi³ cˀoa⁴xin³-no³, a³li² vˀe²xcon¹-jin²lao⁴³ yao³-no³ tˀa³tsˀe⁴ cjoa⁴vi³jna³chon³-no³ jme³ xi³ chi⁴nao⁴³, ni⁴ xi³ tˀa³tsˀe⁴ yao³-no³ jme³ xi³ chˀa²cjao¹³.

²³Je² cjoa⁴vi³jna³chon³-na¹ nqui²sa⁴ chji¹-le⁴ cao⁴-ni³ tsa² xi³ chi⁴ne⁴², cˀoa⁴ je² yao³-na¹ nqui²sa⁴ chji¹-le⁴ cao⁴-ni³ tsa² chi⁴nca³ xi³ chˀa²cja¹.

²⁴Cho¹tsen³-lao⁴³ nčha⁴², ni⁴vˀe¹ntje²-jin² jno⁴, ni⁴vˀe¹xco¹-jin², ni⁴tjin¹-jin²le⁴ jña³ vˀe¹xco¹, ni⁴ni³ncˀa³-jin² tjin¹-le⁴, cˀoa⁴ Ni³na¹ si¹cjen². Cˀoa⁴ jon² nqui²sa⁴-sa³ chji¹-no³ cao⁴-ni³ tsa² ˀnti¹ni⁴se³-ve⁴.

²⁵ˀya¹-ni³ xi³ jon²-vi⁴ xi³ coan⁴-le⁴ si⁴²ncˀa³-sa³ yao³-le⁴ jnco³ nta³, nta³ tsa² vˀe²xcon¹-lao⁴³ yao³-no³.

²⁶Tsa² tsi² tsa² coan⁴-no³ xi³ to⁴choa³ tjin¹, a¹-ni³ nca³ vˀe²xcon¹-si¹ni³lao⁴³ yao³-no³ tˀa³tsˀe⁴ cjoa⁴ xi³cˀa³-ˀni³.

²⁷Cho¹tsen³-lao⁴³ na³xo¹ jo³-sˀin² ma³jcha¹, li²coi³ si¹xa¹, ni⁴va¹ˀa³-jin², cˀoa⁴ cˀoa⁴xin³-ni³no³, li²coi³ tsa³cˀa³cja¹ na³jño³ xi³ cˀoa⁴cjoan³ nta³ tsa² Salomón cao⁴ nca³yi³je³ cjoa⁴je³ya³-le⁴.

²⁸Cˀia⁴ tsa² Ni³na¹ cˀoa⁴-sˀin² si¹cˀa³cja¹ je² xca⁴jña¹-ve⁴ xi³ tjio¹ ntˀai⁴-vi⁴, cˀoa⁴ xi³ si⁴²cˀa³tsao³jin³ lˀi¹-le⁴ nca⁴ja¹ nchaon³-li⁴, a³ tsi² nqui²sa⁴ si⁴²cˀa³cja¹-no³ jon², cho⁴ta⁴ xi³ to⁴choa³ ma³cjain¹-no³.

²⁹Jon²-ˀni³, a³li² vi³jnchi³sjai³-jion²³ jme³ xi³ chi⁴nao⁴³, jme³ xi³ sˀio⁴³, ni⁴coi³-jin² si⁴cjao¹jion³.

³⁰Nca³tsˀi³ na⁴xi⁴na³nta¹ xi³ tjin¹ i⁴ son³ˀnte³-vi⁴ va¹sjai³ nca³yi³je³ je² cjoa⁴-vi⁴. Je² Nˀai³-no³ ve³-ni¹ nca³ ma³chjen¹-no³ je² cjoa⁴-vi⁴.

³¹To⁴nca³ ti⁴jnchi¹sjao³ cjoa⁴te¹xo³ma³-le⁴ Ni³na¹, cˀoa⁴ nca³yi³je³ je² cjoa⁴-vi⁴ cˀoai⁴son²-no³.

³²A³li² jcon³-jion²³, jon² xi³ to⁴choa³ ma³-ni³ xi³ ti³yo³jtion¹³, nca⁴ je² Nˀai³-na¹ cjai¹nca³ coan³tsjoa³-le⁴ nca³ tsjoa¹-no³ cjoa⁴te¹xo³ma³-le⁴.

³³Ta⁴te²nao³ xi³ tjin¹-no³, cˀoa⁴ tˀai² cjoa⁴tjao²-lao⁴³ xi³ yo⁴ma⁴. Ti⁴ntao³ xi³jtsa³taon⁴ xi³ tsi² tsa² coan⁴jchi¹nca³, cjoa⁴nchi⁴na¹ xi³ ti¹jna³tjao² ya⁴ ncˀa³jmi³, xi³ ni⁴cˀia³-jin² cha⁴, jña³ tsin² cho⁴ta⁴che¹-jin², ni⁴cho⁴qui³xo³-jin² si¹qui³tson¹.

³⁴Ya⁴ jña³ ti¹jna³ cjoa⁴nchi⁴na¹-no³, cˀoa⁴²-ti⁴ ya⁴ ti¹jna³ ni⁴ma⁴-no³.

³⁵Tˀe²xco¹nquio³ cja¹ntia³-no³ na³jño³-no³, cˀoa⁴ lˀi¹-no³ ca²ta³ti².

³⁶Cˀoa⁴ jon²-vi⁴ cˀoa⁴²-sˀin² nco³ya³-lao⁴³ je² cho⁴ta⁴ xi³ co³ya³-le⁴ nai³-le⁴, nca³ cjoa⁴ˀai¹-ni³ jnco³ cjoa⁴vi³xan³, jme¹-ni³ nca³ nti⁴ton⁴ sco¹ˀai²-si¹ni³le⁴ cˀia⁴ nca³ cjoa⁴ˀai¹, cˀoa⁴ si⁴²cja³ne³tˀa³ xo⁴ntjoa⁴.

³⁷Jo¹ to⁴nta³-le⁴ je² cho⁴ˀnta³-ve⁴ xi³ je² nai³-le⁴ sa⁴te¹jin³ nca³ tjio¹co³ˀnta³, cˀia⁴ nca³ cjoa⁴ˀai¹. Xi³ cjoa⁴qui²xi⁴ xi³ xin³-no³, je² nai³-le⁴ cˀoe⁴²xco¹nqui³ cja¹ntia³-le⁴ na³jño³-le⁴, si⁴²cˀe¹jna³tˀa³ ya¹mi²xa⁴ cho⁴ˀnta³-le⁴, cjoa⁴ˀai¹, cˀoe⁴²ya³-le⁴.

³⁸Nta³ tsa² cjoa⁴ˀai¹ nai³-le⁴ nca³ las diez nca³ coan³njion², nta³ tsa² cjoa⁴ˀai¹ tsa² las dos nca³ ta⁴njion²ya³-sa³, tsa² cˀoa⁴-sˀin² sa⁴te¹jin³ cho⁴ˀnta³ nca³ tjio¹co³ˀnta³, jo¹ to⁴nta³-le⁴ je² cho⁴ˀnta³ xi³ cˀoa⁴cjoan³-ve⁴.

³⁹To⁴nca³ ca²ta³ˀyao³ je²-vi⁴, tsa² je² nai³-le⁴ ntˀia³ tsa³ve³ tsa²cai³, jo³ chon³ cjoa⁴ˀai¹ cho⁴ta⁴che¹, cjoa⁴qui²xi⁴ tsa³cˀe²jna³con³ˀnta³, cˀoa⁴ li²coi³ qui³tsjoa³ˀnte²-le⁴ nca³ ja³ˀa³sˀen³ ntˀia³-le⁴.

⁴⁰Jon²-vi⁴ tso²cˀoa⁴, cjia³to³con² ti⁴yo³, nca⁴ je² ˀnti¹-le⁴ cho⁴ta⁴ cjoa⁴ˀai¹ coi³ hora cˀia⁴ nca³ tsi² tjin¹jin³-no³.

⁴¹Cˀia⁴ Pedro qui³tso²-le⁴: Señor, a³ to⁴tˀa³tsain⁴-jin⁴ xo⁴ ˀmi²-na³jin⁴ je² cjoa⁴xco¹son²-vi⁴, a³xo⁴ cˀoa⁴-ti⁴ tˀa³tsˀe⁴ nca³tsˀi³ ni¹.

⁴²Cˀoa⁴qui³tso² je² Nai³-na¹: ˀya¹ cho⁴ˀnta³ xi³ si¹coi²nta⁴ cho⁴ˀnta³ xi¹ncjin¹, cˀoa⁴ xi³ nˀion¹tˀa³con³, xi³ nta³ ve³ xa¹, xi³ je² nai³-le⁴ si⁴²cˀe¹jna³ˀnta³ xi³cˀa³ cho⁴ˀnta³-le⁴, jme¹-ni³ nca³ tsjoa¹-si¹ni³le⁴ xi³ coa⁴cjen⁴-ni³ nca³ fi³cho² choa⁴-le⁴.

⁴³Jo¹ to⁴nta³-le⁴ je² cho⁴ˀnta³-ve⁴ xi³ je² nai³-le⁴ coan⁴ sjai³-le⁴ nca³ cˀoa⁴ti¹sˀin¹, cˀia⁴ nca³ cjoa⁴ˀai¹.

⁴⁴Xi³ cjoa⁴qui²xi⁴ xi³ xin³-no³, nca³ je² nai³-le⁴ si⁴²cˀe¹jna³ˀnta³ nca³yi³je³ tso³jmi²-le⁴.

⁴⁵To⁴nca³ tsa² je² cho⁴ˀnta³ coi⁴tso⁴jin³ ni⁴ma⁴-le⁴: Je² nai³-na⁴ cˀoa⁴čhjin³-le⁴ nca³ cjoa⁴ˀai¹, cˀoa⁴ cˀoe⁴²tsˀia⁴cao⁴ nca³ si⁴²qui²ˀaon³ cho⁴ˀnta³ xi³ xˀin⁴ cao⁴ xi³ ya¹nchjin¹, cˀoa⁴ coa⁴cjen⁴, scˀoi¹, coan⁴chˀi⁴.

⁴⁶Cjoa⁴ˀai¹ nai³-le⁴ cho⁴ˀnta³-ve⁴ cˀia⁴ ni⁴čhjin³ nca³ tsi² ti¹co³ya³-le⁴, cˀoa⁴ jme³ hora nca³ tsi² tsa² ve³, coa⁴²-le⁴ sa³ˀnta³ coa⁴te³nca³ yao³-le⁴, cˀoa⁴ sˀe⁴-le⁴ cjoa⁴ñˀain³ cao⁴ je² xi³ tsi² tsa² si¹cji³tjo³son².

⁴⁷Nˀion¹ coa⁴²-le⁴ je² cho⁴ˀnta³ xi³ tsa³ve³ jo³-sˀin² coan³me³-le⁴ nai³-le⁴, cˀoa⁴ li²coi³ tsa³cˀe²jna³nta³, ni⁴cˀoa⁴-jin² qui³sˀin³ jo³-sˀin² nca³ me³-le⁴.