Text copied!
CopyCompare
El Nuevo Testamento en otomí de San Felipe Santiago, Edo. de México - SAN JUAN - SAN JUAN 9

SAN JUAN 9:9-37

Help us?
Click on verse(s) to share them!
9Cʉ ddaa ya, mí ma̱: ―Guejnʉ.― Nu cʉ pe ddaa ya, bi ma̱jmʉ: ―Ncjahmʉ guejnʉ, pe jin gui guegue.― Nu car hñøjø bi ma̱ntsjɛ: ―Guejquigö.―
10Bi dyönijʉ, bbʉ: ―¿Ja ncja xcá xoj yir dö ya bbʉ?―
11Cja̱ bi da̱j ya car hñøjø ca múr godö jma̱ja̱: ―Car hñøjø ca i tsjifi ʉr Jesús bi dyøti bøjöy, bi pɛbigui yʉm dö, cja̱ bi xijqui: “Gui ma pʉ jar tanque Siloé, ma bú xʉdö.” Eso, dú ma xʉjqui yʉm dö, cja̱ bi xogui.―
12Diguebbʉ ya, pé bi dyönijʉ: ―¿Jabʉ i bbʉh car hñøjø‑ca̱?― Cja̱ bi da̱ guegue: ―Jin dí pa̱di.―
13Diguebbʉ ya bi ttzix car hñøjø ca múr godö jma̱ja̱, gá ma pʉ jabʉ mí bbʉh cʉ fariseo.
14Mí nsabado, gue car pa ca mí tzu̱jpi cʉ judio, bbʉ mí dyøti bøjöy car Jesús cja̱ bi xojquibi quí dö car godö.
15Nubbʉ́, guejti cʉ fariseo bi dyönijʉ ja bi ncja gá xoh quí dö. Cja̱ bi ma̱n car hñøjø ca múr godö jma̱ja̱: ―Car Jesús bi pɛbigui bøjöy jam dö, ma ya, dú má xʉdö, cja̱ nuya dí janti.―
16Diguebbʉ ya, bi ma̱n cʉ dda fariseo, bi hñi̱na̱jʉ: ―Jí̱ xcuá hñe̱h ca Ocja̱ car hñøjø‑ca̱, porque jin gui tzu̱jpi nʉr pa gá nttzöya.― Nu cʉ pe dda cja̱hni ya bi ma̱jmʉ: ―Hnar cja̱hni ca di ndu̱jpite, ¿cja di jogui di dyøti milagro ncja ngu̱ ga dyøti guegue?― Cja̱ bi weguejʉ por rá ngue car Jesús.
17Nubbʉ, pé bi yojpi bi dyönijʉ car godö: ―Xiquiguɛ, ¿Te guí mbe̱nguɛ digue car hñøjø ca xpá xoquiqui yir dö? ¿Cja xcuá hñe̱h ca Ocja̱ guegue?― Bi da̱h car hñøjø, bbʉ: ―Dí i̱ngö ʉ́r jmandadero ca Ocja̱.―
18Nu cʉ fariseo‑cʉ jin gá hñemejʉ ¿cja cierto múr godö jma̱ja̱ car hñøjø‑ca̱? hasta bi nzojmʉ cár ta co cár me,
19cja̱ bi dyönijʉ: ―¿Cja gue nir ttʉhui‑nʉ, guí ma̱jmi múr godö desde bbʉ mí hmʉy? ¿Ja ncja ga cca̱hti ya bbʉ?―
20Ma ya, bi da̱dihui cár ta ʉ́r me, bi ma̱jmi: ―Dí pa̱dibbe, guejnʉ ʉm ttʉgöbbe‑nʉ, múr godö desde bbʉ mí hmʉy.
21Cierto, hne̱je̱, ya xqui cca̱hti, pe jin dí pa̱dibbe já xcá ncja. Guejtjo jin dí pa̱dibbe to xí xojquibi yí dö. Guegue ya xí ncja̱hni. Guejtsjɛ guegue gui dyönijʉ ¿ter bɛh ca̱ xí ncja? Guegue xta ma̱ntsjɛ.―
22Bi da̱di ncjapʉ cár ta co cár me, como mí tzu̱hui cʉ hñøjø cʉ mí mandado pʉ jár ni̱cja̱ cʉ judio. Ya xquí ma̱n cʉ möcja̱ cʉ mí mandado, bbʉ to di ma̱, car Jesús múr Cristo ca xquí hñi̱x ca Ocja̱, gueguejʉ di fongui jár templojʉ, cja̱ jin di nu̱ rá zö.
23Eso, bi da̱dihui cár ta co cár me: “Ya xí ncja̱hni. Gui dyönijʉ guejtsjɛ guegue ter bɛh ca̱ xí ncja.”
24Diguebbʉ ya, cʉ fariseo pé bi nzojmʉ car hñøjø ca múr godö jma̱ja̱, bi xijmʉ: ―Nuya, gui xijquije göhtjo ca ncjua̱ni, pa da tti̱htzibi car Tzi Ta ji̱tzi. Nugöje dí pa̱dije i ndu̱jpite car hñøjø ca guí ma̱nguɛ xí xoquiqui yir dö. Xiquiguɛ, ¿te guí ma̱nguɛ digue car hñøjø‑ca̱?―
25Bi da̱j ya car hñøjø, bi hñi̱na̱: ―¿Ja̱di̱? Jin dí pa̱cö ¿cja i ndu̱jpite guegue cja huá ji̱na̱? Guejnʉ́ dí pa̱j‑nʉ́, bbɛto ndúr godö, cja̱ nuya dí cca̱hti. Guejtjo dí pa̱di guegue bi xoguigui yʉm dö.―
26Pé bi yojpi bi dyön cʉ fariseo: ―¿Te xpá cjahqui car hñøjø‑ca̱? ¿Ja xcá xoj yir dö?―
27Car hñøjø pé bi da̱jti bbʉ: ―Ya xtú xihquijʉ, cja̱ jin guí ne gui dyødejʉ. ¿Te rá nguehca̱ pé guí nejʉ gu yojpi gu xihquijʉ? ¿Cja huá guí ne gui tɛnijʉ car Jesús, hne̱je̱?―
28Nu cʉ fariseo, bbʉ mí tsjijmʉ ncjanʉ, bi ndo zanijʉ car hñøjø‑ca̱, bi xijmʉ: ―Nuquiguɛ, guí ne gui tɛn car Jesús, pe nugöje, ji̱na̱guigöje. Dí tɛndije ca ndor Moisés.
29Dí pa̱dije, ca Ocja̱ bi nzoh ca ndor Moisés cja̱ bi un car ley. Nu car hñøjø ca i tsjifi ʉr Jesús, jin dí pa̱dije jabʉ xcuá hñe̱je̱.―
30Nubbʉ, bi da̱h car hñøjø: ―¿Dyo ya‑ca̱ jin guí pa̱quɛjʉ jabʉ xcuá hñe̱je̱, cja̱ guegue xí xoguigui yʉm dö?―
31Dí göhtjojʉ dí pa̱dijʉ, bbʉ i ndu̱jpite hnar cja̱hni, ca Ocja̱ jin gui cjajpi ncaso bbʉ te i öjpi. Nu car cja̱hni ca i bbʉy ncja ngu̱ ga tzøh ca Ocja̱ cja̱ i i̱htzibi, bbʉ te i ödi, da ttuni.
32Desde bbʉ mí mʉj nʉr mundo, nim pa jabʉ xtá ødejʉ cja xtrú xoj yí dö hnar cja̱hni ca múr godö desde bbʉ mí hmʉy.
33Nu car Jesús, bbʉ jí̱ xtrú mɛjni ca Ocja̱, jin di jogui di xoguigui yʉm dö.― Ncjanʉ gá nda̱h car hñøjø ca múr godö jma̱ja̱.
34Cʉ fariseo bi xijmʉ, bbʉ: ―Nuquiguɛ, desde bbʉ ngú hmʉy, guí ndu̱jpite. Jin guí pa̱di ja i ncja ca Ocja̱. Hñi̱x ya, ya xquí ne gui u̱jtiguije.― Nubbʉ, bi fonguijʉ car hñøjø‑ca̱, bi ccahtzijʉ pa ya jin di guati pʉ jár templo cʉ judio.
35Diguebbʉ ya, bi dyøh car Jesús, ya xquí mfongui car hñøjø ca múr godö jma̱ja̱, cja̱ bi ma bú joni. Cja̱ bbʉ mbú ntjɛhui, bi dyöni: ―Nuquɛ, ¿cja guí e̱me̱, ya xí ni̱gui ca hnaa ca di mɛjni car Tzi Ta ji̱tzi hua jar jöy?―
36Bi da̱h car hñøjø, bi hñi̱na̱: ―Xijqui tzʉ, ¿toca̱? pa gu e̱me̱gö.―
37Cja̱ pé bi ma̱n car Jesús, bbʉ: ―Guejquigö, ya xcú cca̱jtigui, cja̱ pé dí ña̱hui ya.―

Read SAN JUAN 9SAN JUAN 9
Compare SAN JUAN 9:9-37SAN JUAN 9:9-37